6
Kulanda mhela wa magazo
(Kwa yula yalingwaluchiza kwimba na vinhu vya ng'weso za muziki. Kwimba kwa Sheminiti. Zabuli ya Daudi.)
Gwa Mkulu Nguluwi, uleche kung'hanuchila kwa ng'halazi ya hegwe,
uleche kungaza kwa kuzudila kwa hegwe.
Umbonele isungu, gwa Mkulu Nguluwi, ndahela mong'ho.
Gwa Mkulu Nguluwi, umhe heni mong'ho, ndangutoka mbaka kuli mizeje ja heni.
Muhe wa heni wangugazika ng'hatu.
Gwa Mkulu Nguluwi, kobeteza mbaka nili?
 
Gwa Mkulu Nguluwi, unyhinduchile na kundohola,
undohole kwa chiwalo cha igano lya hegwe lya kwimilila.
Kwa vila haduhu yalingukukumbuchila kula kowawele wabagame
whaani yoweza kukutogola ako kuli isi ya wabagame?
 
Nhoka kwa chililo cha usungu,
chila nechilo ndanguchidoza chinhanda cha heni kwa mahozi,
kwa mahozi ndangudoza chegamo cha heni.
Meho ga heni nagatoka kwa masinzo,
nagabilabila kwa chiwalo cha kugazigwa na mng'honyo.
 
Muche kwa heni hemwe mweng'ha mlingudita wihe,
kwa vila Mkulu Nguluwi nakahulika lizi lya chililo cha heni.
Mkulu Nguluwi nakahulika chililo cha heni,
Mkulu Nguluwi nakakunda kulanda kwa heni.
10 Wang'honyo wa heni weng'ha wobasigwa soni na kudumbizwa ng'hatu,
baho du, wohiluka kumbele na wobasigwa soni.