56
Kitumbila kwa Nguluwi
(Kwa yalingwaluchiza kwimba. Kwa kiwhana na “Ng'hunda ya Kutali Isindamale.” Zabuli ya Daudi mhela loyebatigwe na Wafilisti kula Gati.)
1 Gwa Nguluwi, mbonele isungu,
kwa vila wanhu wangunhowa.
Nemisi yeng'ha wanhu wangumbunza heni.
2 Nemisi yeng'ha wanhu wangitwanza na heni,
wenji walingidaya wangunhowa.
3 Gwa Nguluwi, lunhwinhwi holukuya,
ndochitumbila kwa hegwe.
4 Ndanguutogola ulonzi wa Nguluwi,
ndangitumbila kwa Nguluwi hambe ndumbe.
Wanhu wohambe wekale mazuwa gose kota Nguluwi, wondita choni?
5 Nemisi yeng'ha wangulonga udesi kwa heni,
majesa ga hewo geng'ha ndo kumbunza heni.
6 Wangiting'hana kiwika goya na kumbinza chinyele,
wangupugajiza geng'ha gondilingudita,
wangugana kung'hopola.
7 Gwa Nguluwi, uwahilusile kwa winji wa wihe wa hewo,
uwagwise wanhu wa isi azo kwa ng'halazi ya hegwe.
8 Hegwe kugazela magazo ga heni,
kwanguwika kukumbuchila kwa mahozi ga heni geng'ha.
Ndaze, geng'ha hagawele kuli chitabu cha hegwe?
9 Chila hondilanda utanzi kwa hegwe,
wang'honyo wa heni wanguhiluswa kumbele.
Ndanguvizela ndikomya Nguluwi ka ubanzi wa heni.
10 Ndangitumbila kwa Nguluwi na kuutogola ulonzi wa heye.
Ndangitumbila kwa Mkulu Nguluwi na kuutogola ulonzi wa heye.
11 Ndangitumbila kwa Nguluwi hambe ndumbe.
Munhu kondita choni?
12 Gwa Nguluwi, ndokweneza chilaho cha heni,
ndokulavila nhambiko za kulonga malumbo.
13 Kwa vila nakundohola kulawa kuli kubagama,
ena, nakunyamila leka ndeche kugwa,
leka njende hali hegwe, gwa Nguluwi,
kuli lumuli lwa ukomu.