57
Kulanda utanzi
(Kwa yalingwaluchiza kwimba. Kwa kiwhana na “Uleche kuwifya.” Zabuli ya Daudi loyasulupuche kwa Sauli na kivisa hali mhalika.)
1 Umbonele isungu, gwa Nguluwi umbonele isungu,
kwa vila kwa hegwe ndangubilimila kikala goya.
Kuli lubehelo lwa mabawa ga hegwe ndobilimila kikala goya,
mbaka aho chivuluvumbi cha kudumya hochikola.
2 Ndangumlilila Nguluwi Yawele Kuchanya,
Nguluwi yalingweneza kunuwila kwa heye, kwa heni.
3 Kongalila utanzi kulawa kilanga na kundohola,
kowabasa soni hewo walingunhowa.
Nguluwi kondajila igano lya heye lya kwimilila na kukundigwa kwa heye.
4 Nanzungulutwa na wang'honyo,
mbasa hali walingugana danda kota isimba,
mizino ja hewo ndo kota migoha na misale,
umyango wa hewo ndo kota ipanga likali.
5 Utogoligwe, gwa Nguluwi, kuchanya kilanga.
Ukulu wa hegwe wenele muisi yeng'ha.
6 Wang'honyo nawambichila utandawala leka wangwilize,
nani nang'ung'uta kwa masinzo.
Nawabawa isimo kuli nzila ya heni,
ila hewo wawo ndo nawagwa amo.
7 Nda nzinzili mnhumbula, gwa Nguluwi,
nda nzinzili mnhumbula.
Ndokwimba na kukutowela luchenze.
8 Ulilimche, gwa nhumbula ya heni.
Vililimche avyo ching'weleng'wele na igombogombo.
Ndolililimla isanya kuwe mitondo.
9 Gwa Mkulu, ndolonga malumbo kwa hegwe hali wanhu wa isi,
ndokwimbila lutogo hali wanhu wa isi zeng'ha.
10 Igano lya hegwe lya kwimilila ndo likulu kilanga,
kukundigwa kwa hegwe kwangwenela mbaka kuli ng'hungugu.
11 Utogoligwe, gwa Nguluwi, kuchanya kilanga.
Ukulu wa hegwe wenele muisi yeng'ha.