58
Nguluwi ndo mtagusa wa watagusa
(Kwa yalingwaluchiza kwimba. Kwa kiwhana na “Uleche kuwifya.” Zabuli ya Daudi.)
1 Hemwe vilongozi, ndaze, hambi ndo kukomya mwangutagusa kwa hachi?
Ndaze, mwanguwatagusa wanhu kwa kutanganika?
2 Hebu! Hemwe mwangijesa hela kudita wihe,
hemwe mwemwe mwangweneza kubunza kuli isi.
3 Wehile nawajilila kulawa kupondigwa kwa hewo,
wehile awo, nawadita wihe kulawa mmunda mwa wamai wa hewo, wangulonga udesi.
4 Wana dunga kota dunga ya izoka,
wa wohambe wahuliche kota izoka lilingudinya makutu,
5 lyohambe lihuliche ne lizi lya wateleka mikwandi,
ama lwimbo lwa mteleka mikwandi yazidahe ng'hatu kwa uhawi.
6 Gwa Nguluwi, ubene mizino ja hewo,
ung'humbule, gwa Mkulu Nguluwi, mizino ja misimba ajo.
7 Wajilile kota mazi galigwajilila kuli sangalaza,
howokwega mipinde ja hewo, misale ja hewo jigwe habehi.
8 Wajilile kota ikola vyolilingubagama kuli isanya,
kota himila iwifigwe ne kona isanya.
9 Wang'hali hawavizelele, wang'humbuligwe himahima,
kota miwa ama mikwangwasale ama misolo.
Kwa ng'halazi ya Nguluwi, kwa mbeho wosigwe kutali,
wawele wang'hali wakomu.
10 Watanganiche wosangalala howowona wehile wangugazigwa,
wojenda kuli danda ya wanhu wehile.
11 Wanhu weng'ha wolonga, “Ena, watanganiche wopegwa chonolo.
Kwa kukomya ka baho Nguluwi yalinguwatagusa wanhu wa isi.”