66
Lwimbo lwa kulonga malumbo
(Kwa yalingwaluchiza kwimba. Lwimbo. Zabuli.)
1 Hemwe wanhu weng'ha muisi mumtowele luchenze Nguluwi!
2 Mwimbe kwa chiwalo cha lutogo lwa itagwa lya heye,
mumlavile lutogo lukulu.
3 Mumlonjele Nguluwi, “Madito ga hegwe ndo ga kububuwaza lukami.
Ludali lwa hegwe ndo lukulu ng'hatu mbaka wang'honyo wa hegwe wangisuwata kwa kudumba.
4 Isi yeng'ha yangukufugamila,
wanhu weng'ha wangukwimbila lutogo,
wangulimbila lutogo itagwa lya hegwe.”
5 Muye, mlole mbuli zoyaditile Nguluwi,
nakadita mbuli za kudumbiza hali wanhu.
6 Nakaidita bahali naiwa isi ikalile,
wanhu nawakola amo kwa magulu.
Muye, natwe totowa luchenze kwa chiwalo cha heye.
7 Kangulongoza mazuwa gose kwa mong'ho wa heye,
meho ga heye ganguwalola wanhu wa isi zeng'ha,
leka yoneche yalingumbelenhuka yaleche kujeza kiyinula hali heye.
8 Mumtogole Nguluwi wa hetwe, hemwe wanhu wa isi zeng'ha,
muwikule lutogo lwa heye leka luhulikwe.
9 Heye nakalutiliza ukomu wa hetwe,
hatulechile tugwe.
10 Nakutupima, gwa Nguluwi,
nakutweliza kota sendi vyoilingwelizwa mchiluli.
11 Nakutuleka tugwilizwe muutandawala,
kutupapiza magazo ga kutunya.
12 Nakuwaleka wanhu watubije,
natukolela mchiluli na mmazi.
Ila sambi nakutigala kuli honhu ha kwesela.
13 Ndokuya kuli ng'handa ya hegwe na nhambiko za kulakazwa,
ndokweneza chilaho cha heni,
14 chondonjile na kulagana vyombele kuli magazo.
15 Ndokulavila nhambiko za kulakazwa zinonile,
hamwe na iyosi lya nhambiko za ming'holo milume,
ndolavya nhambiko za ibuguma na mhene.
16 Hemwe mlingumdumba Nguluwi, muye mweng'ha mhulichize,
nani ndowasimila goyanditile.
17 Nandimlilila kwa mlomo wa heni,
lutogo lwa heye nalwali kuli umyango wa heni.
18 Wone ndahalolile gehile mnhumbula,
Nguluwi yahawezile kunyhulichiza,
19 ila ndangukomya Nguluwi nakanyhulichiza,
ena, nakahulichiza kulanda kwa heni.
20 Yatogoligwe Nguluwi,
kwa vila halemile kulanda kwa heni,
ne kusa igano lya heye lya kwimilila kwa heni.