7
Kulanda kwa kugana kutanzigwa kwa chiwalo cha walinguwabunza wayawo
(Lwimbo lwa Daudi kwa Mkulu Nguluwi kuwala Kushi, Mbenjamini.)
1 Gwa Mkulu Nguluwi, Nguluwi wa heni, ndangubilimila kikala goya kwa hegwe,
undohole kulawa kwa weng'ha walingumbilimisa.
2 Wone uleche, wokuya kundadula heni kota isimba,
wombulunha heni mbaka kutali, kowa kuduhu wa kundohola.
3 Gwa Mkulu Nguluwi, Nguluwi wa heni,
wone nandita mbuli imwe hali azi,
wone ndina nongwa kuli madito ga heni,
4 wone nandimhilusila goloko wa heni wihe honhu ha ganojile,
ama nandimsukula mng'honyo wa heni ne chiwalo,
5 lelo, mng'honyo yambinze na kimbata heni,
yabije ukomu wa heni,
na kuuwika ukulu wa heni kuli nhimbwisi.
6 Winuche gwa Mkulu Nguluwi, kwa ng'halazi ya hegwe,
ukulemeze kuzudila kwa wang'honyo wa heni.
Winuche, gwa Nguluwi wa heni,
hegwe nakulajiza hachi iditigwe.
7 Uwakungajize wanhu wa isi hafungo ha hegwe,
nagwe uwalongoze kulawa kuchanya.
8 Hegwe, gwa Mkulu Nguluwi, kwanguwatagusa wanhu wa isi.
Umhe heni hachi kwa kiwhana na kutanganika kwa heni,
kwa kiwhana na kugoloka kwa nhumbula ya heni.
9 Uudumye wihe wa wanhu wehile,
uwemize nzinzili wanhu watanganiche,
gwa Nguluwi uwele na hachi,
ulinguuzela uviso wa nhumbula na majesa ga wanhu.
10 Nguluwi ndo ngawo ya heni,
heye kanguwalohola wawele wagoloche nhumbula.
11 Nguluwi ndo mtagusa wa hachi,
yalinguugaza wihe chila zuwa.
12 Wanhu wohambe wamgaluchile Nguluwi,
Nguluwi konola ipanga lya heye,
kowika goya upinde wa heye na kuugololela honhu.
13 Kowika goya vinhu vya heye vya kitowa ngondo,
kowika misale ja heye kuli chiluli.
14 Ulole, mwihe kangijesaga wihe,
kangiwikaga goya kuwifya,
na kangwambuzaga uhadi.
15 Kangubawaga isimo,
hamba kangugwilaga amo.
16 Kuwifya kwa heye komhiluchila,
kuwifya komgwila heye yuye.
17 Ndolonga malumbo kwa Mkulu Nguluwi kwa chiwalo cha hachi ya heye,
ndokwimba lutogo lwa itagwa lya Mkulu Nguluwi, Nguluwi yawele kuchanya.