2
Luti kangukola mijito kuli mgunda wa Boasi
1 Nakwali na munhu yumwe kulawa lukolo lula koyalawile Elimeleki, mlume wa Naomi, yawele yochemigwa Boasi. Ayo nayali yazeleche ng'hatu na yawele na lufufu.
2 Luti, Mmoabu, nakamlonjela Naomi, “Ng'hundize ndute kumgunda kulokota visigale kuli mbena za munhu yawele kondajila isungu.” Naomi nakamlonjela, “Goya, ulute mhinza wa heni.”
3 Lelo Luti nakaluta kumgunda, nakawawinza wala walingubeta kuno yolokota miso jowalechile. Nakafika kuli mgunda wa Boasi ne kunuwila, yula wa kulawa kuli lukolo lula koyalawile Elimeleki, nayawele mlume wa Naomi.
4 Hamba, Boasi nakoya kulawila Betelehemu nakawalamsa walingubeta, nakalonga, “Mkulu Nguluwi yawe na hemwe.” Nawo nawamwidichila, “Mkulu Nguluwi nayakutambichize.”
5 Lelo, Boasi nakamuuza chilongozi wa wala walingubeta, “Ndaze, yula mhinza ka whaani?”
6 Aho ndo chilongozi wa wala walingubeta nakedichila, “Ndo mhinza Mmoabu, yoyile hamwe na Naomi kulawila kuli isi ya Moabu.
7 Nakandanda ndimkundize yawawize kumbele walingubeta kuno yolokota visigale hagati ha mibanzi. Lelo nakoya, nakakola mijito kwaluchila hamitondo mbaka sambi, ila nakesela kwa mhela udo hela mchibumuli.”
8 Aho ndo Boasi nakamlonjela Luti, “Mhinza wa heni uhulichize. Uleche kuluta kulokota miso honhu hanji ila kuli mgunda uno hela. Miwinze na wadala awa walingukola mijito kwa heni,
9 ulole honhu howalingubeta, wawinze hewo. Ndiwakanya walume awa waleche kukutunya. Wone uwe na ng'halu, ulute kuli mibiga na unwe mazi gowadehile wala walume.”
10 Luti nakenamiza kwa Boasi mbaka hanyi kwa kuhulichiza, nakamlonjela, “Mhegwa ndaze uganililo na hegwe? Lekachoni kwangumbonela isungu na heni nda mjenzi hela?”
11 Ila Boasi nakamlonjela, “Ndigahulika geng'ha goumditile mkweyo kulawa mlume wa hegwe loyabagame. Ndivizela ndaze vyouwalechile mhaza wa hegwe na mayako, nakuileka isi ya hegwe na ndaze vyowuyile kikala hali wanhu wawele hambe uwazelele kulawa aho hamwande.
12 Mkulu Nguluwi yakuhilusile kwa geng'ha gouditile. Mkulu Nguluwi wa Isilaeli youmbilimile yakwamile hanyi ha mabawa ga heye, yakupe utambichizo wa kuhega.”
13 Luti nakalonga, “Mkulu, hegwe nakundajila isungu ng'hatu. Hanga heni siwele kota yumwe wa vitumagwa wa hegwe, nakundita sangalale ng'hatu na kulonga na heni kwa uliholile.”
14 Mhela wa chilyo, Boasi nakamlonjela Luti, “Uye hano, uye ulye ibumunda na udilize mli mhuzi.” Ahyo Luti nakekalisa hamwe na wala wakola mijito, Boasi nakamha nyhule ikalanjigwe, nakalya na kiguta na kusigaza.
15 Luti vyoyalutilile kulokoteza mbena, Boasi nakawalonjela wakolamijito wa heye, “Mumleche yalokoteze mbaka honhu hawele na nganda ne kumng'hanuchila.
16 Ila lelo, mkweje miso kulawa kuli nganda na mumleche yalokote ne kumng'hanuchila.”
17 Lelo Luti nakalutilila kulokota miso mbaka matinazo. Navyoyapulule ayo shayili nakapata kota kilo kumi.
18 Hamba nakahola mbena ayo na kuluta nayo mbaka kuli mji na kumlajila mkweye chasi choyalokote. Nakalavya kahi chila chilyo choyasigaze hoyegute, hala loyawele yolya na wakola mijito wa Boasi, nakamha.
19 Lelo mkweye nakamuuza, “Nakulokota kohi aga geng'ha? Nawali kuli mgunda wa whaani? Nguluwi yamtambichize ayo yakupele.” Hamba Luti nakamlonjela Naomi kota nakakola mijito kuli mgunda wa munhu yalinguchemigwa Boasi.
20 Lelo, Naomi nakamlonjela Luti, “Mkulu Nguluwi yamtambichize Boasi! Mkulu Nguluwi kenezaga kulagana kwa heye kwa wawele wakomu na wabagame.” Hamba nakalutilila kulonga, “Ayo munhu ka mng'holozetu wa habehi na ndo yumwe wa wala walinguganigwa kutulolela.”
21 Hamba Luti nakalonga, “Nakandonjela kahi ndokoteze hamwe na wakola mijito wa heye mbaka wasinde ng'hatu kubeta.”
22 Lelo, Naomi nakamlonjela Luti, “Ena mhinza wa heni. Ndo inoga kukola mijito hamwe na wadala wanji kuli mgunda wa Boasi, leka uleche kugazigwa kuli mgunda wa munhu yunji.”
23 Ahyo, Luti nakakola mijito na hewo, nakalokota miso mbaka mhela wa kubeta ngano na shayili vyokumalile. Mhela awo weng'ha, nayali yochikala na mkweye.