3
Luti kangupalilwa mlume
1 Hamba Naomi nakamlonjela Luti, “Heni ndanguganigwa ndikupalile mlume leka wikale goya.
2 Lelo ayu Boasi, yawele naukolile mijito hamwe na wakola mijito wa heye wadala, ayu ndo mng'holozetu. Lelo uhulichize, matinazo kowa yopulula shayili.
3 Ahyo, wihovuje na wibakalize unhunyhililo na kuvala goya, hamba ulute honhu hoyalingupululila, ila ulolele uleche kuzeleka kwa heye mbaka hoyosinda kulya na kunwa.
4 Kahi, uvizele honhu hoyowasa na vyoyowa yosinzila, umlutile na kugubula igolole kuli magulu ga heye uwase baho habehi na magulu ga heye. Heye kokulonjela cha kudita.”
5 Luti nakedichila, “Ndodita geng'ha goundonjele.”
6 Ahyo, Luti nakaluta honhu ha kupululila na nakadita kota vyoyalonjelwe na mkweye.
7 Boasi vyoyasindile kulya na kunwa, nakasangalala mnhumbula. Lelo nakaluta habehi na ilundo lya shayili, nakawasa. Luti nakaluta na kugubula igolole kuli magulu ga heye Boasi na kuwasa aho.
8 Nechilo ng'hatu, baho du, Boasi nakalilimka, nakahinduka, nakabubuwala kumona mdala yawasile kuli magulu ga heye.
9 Nakauza, “Hegwe kwa whaani?” Luti nakedichila, “Heni nda Luti, chitumagwa wa hegwe. Ugubiche lupembo lwa igolole lya hegwe mchanya mwa chitumagwa wa hegwe, kwa vila hegwe kwa mng'holozangu ulinguganigwa kundolela.”
10 Boasi nakalonga, “Mkulu Nguluwi yakutambichize hegwe mhinza wa heni, mina kwa geng'ha goulingudita kwangulajila isungu ng'hatu kupuluta gougaditile aho mwaluko, kwa vila huwapalile wasongolo wazunwa ama wawele na lufufu wakuhole.
11 Lelo mhinza wa heni uleche kudumba, ndokuditila geng'ha goulingulanda kwa vila chila munhu mujini kanguvizela kota hegwe kwa mdala yanojile.
12 Ndo kukomya kota yanguganigwa heni kukulolela, ila hana mng'holozo wa habehi kusinda heni yalinguganigwa kukulolela.
13 Ahyo, wikale hano nechilo ayi. Mitondo tolola wone heye kokunda kukulolela ama hebu. Wone yakulolele ndo goya. Wone yaleme, kwa itagwa lya Mkulu Nguluwi yawele mkomu, heni ndokulolela. Uwase hano mbaka mitondo.”
14 Lelo Luti nakawasa aho mmagulu ga heye mbaka mitondo, ila nakenuka kung'hali lufuku leka yaleche koneka, kwa vila Boasi nahaganile munhu yavizele kota mdala nayali honhu ha kupululila.
15 Boasi nakamlonjela, “Utandiche nguwo ya hegwe hanyi.” Luti nakadita ahyo. Boasi nakabohola shayili kilo makumi meli, nakamdwika Luti, hamba nakahiluka mujini.
16 Luti vyoyafichile mujini, mkweye nakamuuza, “Nayali ndaze mhinza wa heni?” Luti nakamlonjela geng'ha goyamditile Boasi.
17 Kahi nakalutilila kulonga, “Nakandonjela ndeche kuhiluka kaye kwa mkweyangu ne chinhu, ahyo nakamha shayili kilo makumi meli.”
18 Naye Naomi nakalonga, “Lelo unyamalile mhinza wa heni, mbaka tulolele chochilawila. Boasi hosindamala lehano mbaka yeneze mbuli ayi.”