5
Kulota kulinguwala chitabu chilinguguluka
Vyondolile kahi nandichona chitabu changuguluka kuli ulanga. Yula mhilisi nakambuza, “Kwanguchona choni?” Nani nandimwidichila, “Ndanguchona chitabu changuguluka kuli ulanga, ulefu wake mita tisa na ugazi wake mita zine na nusu.” Lelo nakandonjela, “Mgati mwa chitabu acho namwandichigwa upanjilo uwele wouvaba isi yeng'ha. Ubanzi umwe nawandichigwa kota wahizi weng'ha wowinjigwa kuli isi na ubanzi wunji nawandichigwa kota weng'ha walingilaha udesi nawo woditilwa hihyo. Mkulu Nguluwi Yawele na Mong'ho nakalonga, ‘Ndougala awo upanjilo kuli ng'handa ya mhizi na ya ayo yalingilaha udesi kwa itagwa lya heni. Upanjilo awo wochikala amo na kuzidumya ng'hatu ng'handa azo hamwe na mbawo zake na maganga gake.’ ”
Kulota kulinguwala mdala mgati mwa chidoto
Yula mhilisi yawele nayali yolongasa na heni, nakoya habehi na heni na kundonjela, “Ulole kuli ulanga leka uchone chilinguya.” Nani nandimuuza, “Ndo chinhu chachi acho?” Naye nakedichila, “Acho ndo chidoto chiwele na wihe wa isi yeng'ha.” Chidoto acho nachali na chigubiko chigongomanywe kwa chuma. Chigubiko acho nachigubuligwa, nani nandimona mdala yekalise mgati. Yula mhilisi nakandonjela, “Mdala ayo ndo kota wihe!” Hamba yula mhilisi nakamkundujiza mgati mwa chidoto mdala ayo na kuchigubika chidoto acho na chigubiko cha lisasi. Londolile kuchanya, nandiwona wadala weli wokuya kwa heni kuno wowembeluswa na mbeho. Nawali na mabawa gawele na mong'ho kota isakulang'hola. Wadala awo nawachinula chila chidoto kulutila kilanga. 10 Lelo, nandimuuza yula mhilisi yawele nayali yolongasa na heni, “Wanguchihilika kohi chila chidoto?” 11 Naye nakandonjela, “Wanguchihilika kuli isi ya Babuloni. Ako wozenga ng'handa kwa chiwalo cha chidoto acho na loiwa isindile kuzenjigwa, wochiwika chidoto acho kuli ng'handa ayo.”