6
Kulota kulinguwala mituka ja falasi
1 Nandola kuchanya kahi, nandijona mituka jine ja falasi jilinguya kulawa hagati ha vidunda vili vya shaba.
2 Mutuka wa mwaluko naukwejigwa na falasi wadung'hu na wa keli naukwejigwa na falasi watitu
3 na wa kadatu naukwejigwa na falasi wazelu na wa kane naukwejigwa na falasi wa lanji ya mivu, weng'ha wawele na mong'ho.
4 Nandimuuza mhilisi yawele nayali yolongasa na heni, “Mkulu, mituka ajo jina mana yachi?”
5 Mhilisi nakedichila, “Mituka aji ndo mbeho kulawa banzi zine za isi. Nayali hali Mkulu Nguluwi wa isi yeng'ha na sambi yanguka.
6 Mutuka ulingukwejigwa na falasi watitu wanguluta kuli isi ya kasikazini na wula ulingukwejigwa na falasi wazelu wanguluta kolizinjilaga isanya na wula ulingukwejigwa na falasi wa lanji ya mivu wanguluta kusini.”
7 Falasi awo wawele na mong'ho vyowawele wolawa nawali na maya ng'hatu ga kuluta kuilola isi. Naye mhilisi nakawalonjela, “Goya! Mlute mkailole isi.” Lelo nawaluta na kuilola isi.
8 Hamba yula mhilisi yawele nayali yolongasa na heni nakandonjela kwa lizi, “Ulole! Wala falasi nawaluta kuli isi ya kasikazini, nawaudita muhe wa Mkulu Nguluwi usindamale.”
Yoshua kanguvalizwa itaji
9 Ulonzi wa Mkulu Nguluwi naumbuyila nakundonjela,
10-11 “Ulute kwa Helidayi na Tobiya na Yedaya, wawele nawahiluka kulawa Babuloni. Ukungajize sendi na zahabu za kuhega kulawa kwa hewo na ugongomanye itaji. Hamba ulute na hewo kuli ng'handa ya Yosiya, mwana wa Sefaniya na uliwiche itaji alyo kuli mutwi wa mtambika mkulu Yoshua, mwana wa Yehosadaki.
12 Hamba umlonjele kota Mkulu Nguluwi Yawele na Mong'ho kangulonga hino, ‘Hano hana munhu yalinguchemigwa Izuchila. Heye kolutilila goya hala hoyawele na kuizenga ng'handa ya heni Mkulu Nguluwi.
13 Heye ndo yawele kozenga ng'handa ya heni Mkulu Nguluwi na kopegwa lutogo lwa mndewa na kikalisa kuli chigoda cha heye cha undewa leka kuwalongoza wanhu wa heye. Habehi na chigoda acho cha undewa, kochikala mtambika, nawo weli wokola mijito hamwe kwa kikala goya.
14 Itaji alyo lyowichigwa kuli Ng'handa ya heni Mkulu Nguluwi kwa kukumbuchila kwa Helidayi na Tobiya na Yedaya na Yosiya, mwana wa Sefaniya.’
15 “Wanhu walingikala isi za kutali wokuya kutanza kuzenga Ng'handa ya heni Mkulu Nguluwi.” Namwe movizela kota Mkulu Nguluwi Yawele na Mong'ho ndo yandajize kwa hemwe. Aga geng'ha golawila wone molihulichiza lizi lya Mkulu Nguluwi, Nguluwi wa hemwe.