7
Nguluwi kangugana ng'hatu hachi na isungu kusinda kwesela kulya
1 Kuli mwaka wa kane wa ulongozi wa mndewa Daliyo, zuwa lya kane lya mwezi wa tisa, uwele ndo Kisilevu, ulonzi wa Mkulu Nguluwi naumbuyila heni Sekaliya.
2 Wanhu wa muji wa Beteli nawawalajiza wanhu weli, wawele ndo Shaleseli na Legemu-meleki hamwe na wanhu wa hewo, kumlanda Mkulu Nguluwi utambichizo
3 na kuwauza watambika wa Ng'handa ya Mkulu Nguluwi Yawele na Mong'ho na waloli, “Ndaze, tulutilile kulombocheza na kwesela kulya kuli mwezi wa kahano kota vyotuditile kwa mhela wa miyaka minji?”
4 Hamba ulonzi wa Mkulu Nguluwi Yawele na Mong'ho naumbuyila na kulonga,
5 “Uwauze wanhu weng'ha wa isi na watambika, ‘Lomwesele kulya na kulombocheza kuli mwezi wa kahano na mwezi wa saba, kwa mhela wa miyaka makumi saba jipulute, ndaze, namwesela kulya kwa chiwalo cha heni?
6 Ndaze, lomdile na kunwa, haiwele namulya na kunwa kwa chiwalo cha hemwe hela?’
7 Ndaze, awu hauwele wula ulonzi uwele Mkulu Nguluwi nakalonga kwa kukolela waloli walongole, mhela uwele muji wa Yelusalemu hamwe na miji jilinguuzunguluta lojiwele jisindamale na mbuli zake nazali zilutilila goya, mhela uwele wanhu nawali wochikala kuli Negebu na ibalalika?”
8 Ulonzi wa Mkulu Nguluwi naumbuyila heni Sekaliya na kundonjela,
9 “Heni Mkulu Nguluwi Mbele na Mong'ho ndangulonga, ‘Ndikomya mwamule kwa hachi, milajile igano lya kwimilila na isungu hali hemwe.
10 Mleche kuwabunza wafililwe na walume wawo ne walekwa ne wajenzi ne wazunwa. Mleche kunuwila kudita gehile hali hemwe.’
11 “Ila wanhu nawalema kunyhulichiza, nawalutilila kumha heni chigosi na kudinya makutu ga hewo leka waleche kuhulika.
12 Nawazidita nhumbula za hewo ziwe zigagadale kota iganga, leka waleche kuhulichiza malajizo ga heni gondigalajize kwa muhe wa heni kwa kukolela waloli walongole. Ahyo, heni Mkulu Nguluwi Mbele na Mong'ho nandiwazudila ng'hatu,
13 nandonga, ‘Kwa vila nandiwachema nawo hawanyhulichize, lelo, nawo lowanyhemile siwahulichize. Heni Mkulu Nguluwi Mbele na Mong'ho nandonga.
14 Nandiwasambalula kwa chivuluvumbi hali wanhu wa isi zeng'ha wawele hawawazelele. Ahyo isi yowailechile naisigala ilihela wanhu, hakuwele na munhu yoneche yawele nakekala amo, ena, isi ayo ya kunojeza nayali uchiwa.’ ”