2
Nyhemo ya kumgalamchila Nguluwi
1 Mikungajize, mikungajize hamwe,
hemwe wanhu wa isi mlihela soni,
2 kung'hali mhela uwichigwe haunafika,
zuwa lila lilinguwembelusa kota mhumba,
kung'hali ng'halazi ing'hang'hale ya Mkulu Nguluwi hainawafichila,
kung'hali zuwa lya kuzudila kwa Mkulu Nguluwi halinafika kwa hemwe.
3 Mumpale Mkulu Nguluwi hemwe mweng'ha mlingunyenyetela wa isi,
hemwe muwele mwanguditaga lila yalilajize.
Mpale hachi, mpale kunyenyetela,
hanji mowichigwa kutali na zuwa lya ng'halazi ya Mkulu Nguluwi.
Mkulu Nguluwi kowadumya wanhu wa isi ya Filistiya
4 Muji wa Gasa wolechigwa uchiwa,
Ashikeloni wowa mahame.
Mhela wa nemisi wanhu wa Ashidodi wowinjigwa na wang'honyo,
na wanhu wa Ekiloni wokusigwa.
5 Mochona hemwe mlingikala hafungo ha bahali,
hemwe Wakeleti,
Mkulu Nguluwi nakalonga kuwala hemwe,
Kanaani, isi ya Wafilisti,
“Ndowadumya, haduhu yoneche yawele kowa mkomu.”
6 Isi za hafungo ha bahali, zoditigwa kuwa honhu ha kudimila,
howa honhu ha wadimi,
na mibani ja ming'holo.
7 Yowa ya wanhu wa lukolo lwa Yuda wasigale,
wowa na honhu ha kudimila migongolo.
Mhela wa matinazo wowasa hanyi,
kuli ng'handa za Ashikeloni.
Kwa vila Mkulu Nguluwi, Nguluwi wa hewo, kowalolela
na kuwahilulila ng'hano ya hewo.
Mkulu Nguluwi kowadumya wanhu wa Moabu na wa Amoni
8 Mkulu Nguluwi kangulonga,
“Nandigahulika maligo ga Moabu
na kubeza kwa Waamoni,
wawele nawawaliga wanhu wa heni,
na kuikabusa isi ya wanhu wa heni.
9 Ndikomya, kota vyondilingikala,
heni Mkulu Nguluwi Mbele na Mong'ho,
Nguluwi wa Isilaeli,
Moabu yowa kota Sodoma
na Waamoni wowa kota Gomola,
honhu ha migugu na misimo ja mwino,
isi ya uchiwa mazuwa gose.
Wanhu wa heni wasigale wovihola vinhu vya hewo,
isi ya hewo yowa isi ya wanhu wa heni wasigale.”
10 Acho ndo wohilusilwa kwa chiwalo cha kidaya kwa hewo,
kwa kuwaliga na kuwabeza,
wanhu wa Mkulu Nguluwi Yawele na Mong'ho.
11 Mkulu Nguluwi kowakabusa,
hoyojidumya milungu jeng'ha ja isi.
Wanhu wa isi zeng'ha womfugamila,
chila yumwe kuli isi ya heye.
Mkulu Nguluwi kowadumya wanhu wa Kushi
12 Namwe wanhu wa Kushi kahi
mobagama kwa ipanga lya heye.
Mkulu Nguluwi kowadumya wanhu wa Ashulu
13 Kogolola moko wa heye kasikazini,
na kuidumya isi ya Ashulu.
Koudita muji wa Ninawi uwe uchiwa,
na kota kugunuche.
14 Vilundo vya migongolo ja kufujigwa vyowasa amo,
na chila igongolo lya kisolo.
Mikungule na mituwe jochikala mchanya mwa mizengo jake,
mituwe jolila kuli mitubuli jake,
na kuli fulemu za lwizi,
kwa vila ng'handa zake za mielezi zowa zilechigwe mwanzi.
15 Awu ndo muji uwele nawali ulingidaya na kikala kwa kikala goya,
muji uwele nawilonjela, “Ndo heni hela, haduhu yunji!”
Ndaze vyouwele ulihela chinhu,
na kuwa haluga ha migongolo ja kisolo!
Chila hoyokola habehi kouzomela na kuubeza.