19
Bada i vieḡana-melei au ola Sinai
2 Mai Israel Rephidim i netawanei da i nae au mutulua wavana Sinai. Ma kampa ola au karena i rauḡaravu.
3 Ma Moses i ḡae au ola da God ita nebelei. Ma Bada ola au tepana ma Moses i ḡorei i pa, “Wei mai Israel Jacob noinoina ma riwei.
4 —Taumi matamiei o inanai aiwai mai Egypt awarii a kauei ma me manubada natunatuna au papena e avavarai nanare a avaraimi ma a neiana-melemi awariu.
5 Mepa da ona voteleteleu ma au parivainuaḡana bagibagina ona vojijina-kauei, lamna dam anatapui au dobu awariei taumi ana vinemi nuanuau pouna. Avena da dobu anatapuna Tau ḡariuei.
6 Wate taumi aubaiu ona vipirisi, ma ami dam ona vovivirei tau ainelau aubaiu, wei babani mai Israel ma riwei.”
7 Ma Moses i ḡaira me ma dogadogara i kwatuei ma aiwai anatapuna Bada i ririwei i pariverei.
8 Ma rava anatapui i paribelana gogona i pa, “Tauai aiwai anatapuna Bada i ririwei ana kauei.” Ma Moses ai paribelana i ḡaiana-melei Bada awarina.
9 Bada, Moses i riwei, “Tau apau potopotona au orana ana nei, da rava ina nonoriu Awarim ana bababani da ina vitumaḡana-nonoem.” Anina ma aiwai rava i ririwei Moses Bada i riwei.
10 Ma Bada Moses i riwei, “Ma ḡaira ma rava ma voagui amadodo ma au maratom da orai ina oḡai da tau ina viborumeu. Ma ai gara ina oḡai.
11 Ma ina vokaukaua au pom vitonuina aubaina. Nai maranaina Tau ana ḡairai au Ola Sinai, rava anatapui au matai.
12 Parata ma tere-kwaviviroi au ola. Ma riwa bagibaginei ma riwei ma pa, ‘Ona inana-kaua da eḡa au ola ona ḡae bo ola ona tapedadani. Aiai da ola i tapedadani ina iraḡe.’
13 Mepa da rava bo ḡamoḡamo wei paratana i voraḡoni, taumi eḡa nai ravana bo ḡamoḡamona ona vodadani wate ḡaimei bo aierei ona viraḡeni. Wate maranai taure ponana i rarata lamna rava ina ḡae au ola.”
14 Ma Moses olei i ḡaira memei ma ana rava i riwei da orai i vokaukauei da God ina viborumei ma ai gara i oḡai.
15 Ma i riwei, “Ona vokaukaua mara vitonuina aubaina, marina da nai marana eḡa ona viawawana.”
16 Ubaubanai au pom vitonuina, waiparara, namanamara ma apau potopotona ola i purui, ma taure i tou. Maratagogi rava anatapui kampa i mamae i rovo kaukaua ma i sisi.
17 Ma Moses rava i ravena-opunei da God ita nebelei. Taui ola au karena i mairi.
18 Bada ai araratanei i ḡairai ola Sinai au tepana. Ma bau potopotona olana i puru-pai. Bau kampa i ḡeḡae me modu potopotona e ararai nanare, ma olana anatapuna i vigugui.
19 Ma taure ponana i rarata. Ma Moses i babani ma God i paribelei ponana nonorana me waiparara.
20 Bada i ḡairai ola Sinai au tepana ma Moses i kwatuei da ita ḡei ola au tepana. Ma Moses i ḡae.