11
1 ङे ख्रीष्टकी लुमु सेतुप दोके ख्यिराङ साङ ङे लुमु से।
पुम्पेजातिवी गो उपुप कोर्ला
2 ख्यिरा ङला नरी टेन्दुप ताङ ङे लापुप येन्देनला ङ्येन्दुप तप्की ङ ख्यिरा थोक्ला छासे गा लान वे।
3 यिने दी ताम्ङे ति ख्यिरा हाक्कोशी सिरुप ति ङला नोवा वे। तेरी मीतिवा सिनाङ छ्ये ति येशू ख्रीष्ट यिन। तमा पेर्मी सिनाङ छ्ये ति तीकी ख्योवा यिन। तमा ख्रीष्ट सिनाङ छ्ये ति कोन्छ्योक यिन।
4 ख्योक्पेजाकी मोपोर कितुप पेला ताङ नम्दर शेतुप पेला खोरो गो उपुप ति ख्रीष्टला मारे तोङ्गुप यिन।
5 यिने पुम्पेजाकी गो माउप्नी मोपोर कितुप ताङ नम्दर शेतुप ति ख्योवी थोक्ला मारे तोङ्गुप यिन। च्यिलासिसिन ती ति तीकी खोरो गोकी र्ह टेवु दोके यिन।
6 दोजो ललाइ पुम्पेजातिवी खोरो गो माउपा क्यानी मोपोर किसिन तीकी खोरो र्ह टेक्शी। यिने र्ह टेकुपकी पुम्पेजाकी थोक्ला ङोछा लङ्गुप ताम्ङे यिन्सियाङ तीकी मोपोर कितुप पेला खोरो गो उप्शी।
7 ख्योक्पेजी मोपोर कितुप पेला खोरो गो उपुप मेङ्गिवी, च्यिलासिसिन ख्योक्पेजा ति कोन्छ्योककी जुजमला राङ जोवु ताङ खोकी मोवा छ्या देन्दुप यिन। यिने पुम्पेजा ति ख्योक्पेजी मोवा यिन।
8 च्यिलासिसिन कोन्छ्योककी मीला जो नङ्गुप पेला पुम्पेजा नेमा ख्योक्पेजा जोवु मिन, ख्योक्पेजा नेमा पुम्पेजा जोवु यिन।
9 तमा पुम्पेजी थोक्ला ख्योक्पेजा जोवु मिन, यिने ख्योक्पेजी थोक्ला पुम्पेजा जोवु यिन।
10 तुक क्यानी देवाच्येनकी लेन क्योलुप थुतिवी थोङ्दाङला रङगी ख्योवी ओङला देन वे सिरुप छ्या देन्दुपला पुम्पेजातिवी खोरो गो उप गोकिवी।
11 यिन्सिनाङ चोवोकी थोङ्दाङला ति ख्योक्पेजाला पुम्पेजा मेसिन मेवी, पुम्पेजाला साङ ख्योक्पेजा मेसिन मेवी।
12 च्यिलासिसिन कोन्छ्योककी ख्योक्पेजा नेसुर पुम्पेजा जोवु दोके पुम्पेजी खोक नेमा ख्योक्पेजा क्येवी। तिवा तेरी कोन्छ्योककी जो नङ्गुप यिन।
13 तुक क्यानी ख्यिराङ नासाम तोङ। पुम्पेजी गो माउपा क्यानी मोपोर कितुप ति पोमु गिवी रो?
14 वुतुङ के कोन्छ्योककी ज्येवु दी जम्बुलिङकी च्यालकतिवाला ल्हासिन हाक्कोकिवी। ख्योक्पेजी र्ह रिङ्बु सासिन ती ति ङोछा यिन सिरुप ति दाक्पुला छ्या वे।
15 यिने पुम्पेजी र्ह रिङ्बु वोतुप ति तिवी थोक्ला मोवा वोतुप यिन। च्यिलासिसिन पुम्पेजी र्ह रिङ्बु ति तिवी गो उपुपला कोन्छ्योककी जो नङ्गुप यिन।
16 दोजो ललाइकी दी ताम्ङेला केवुल कितुप नो किवी सिसिन दुका ताम्ङेतिवा ङ्यिराङ ङ्याम मिकिवी, च्यिलासिसिन दुका ताम्ङेतिवा ङ्यिराङ ताङ कोन्छ्योककी चर्च तेरीकी लुक्सुला मे।
चोवोकी डेन साप कोर्ला
(मत्ती २६:२६-२९; मर्कूस १४:२२-२५; लूका २२:१४-२०)
17 त ङे ख्यिराङला सिरुप ताम्ङेकी कोर्ला ति ख्यिरा ल्यामु क्यावु यिन सिनी सिरुप ति ङला गा मलाङ्गिवी। च्यिलासिसिन ख्यिराङ कोन्छ्योकला सोवा देकुपला चर्चला जोम्बुप ति ल्यामु मिन, मेलोक्पा गाल्सुङ।
18 ख्यिराङ चर्चला जोम्बुप पेला गोमाला के ख्यिरा पर्ला ख्ये पेनोक सिरुप ति ङे थोसुङ। ती ताम्ङे ति टेके साङ यिन।
19 ख्यिरा पर्ला कोन्छ्योककी थोङ्दाङला मी टेङ्बु मेटेङ्बु सु यिन सिरुप ति हाक्कोवुला तुका ताम्ङेतिवा वुङ राङ गोकिवी।
20 ख्यिराङ मुला राङ जोम्बुप पेला चोवोकी डेन सोवु ति वुतुङ के चोवोकी डेन सोवु मिन,
21 च्यिलासिसिन मीतिवा यम्बाला मागुवा क्यानी दाक दाक्पी समा सेवी। तुक राङ क्यानी ललाइ मीतिवा ति ल्होतुङ्बा राङ लुकिवी। तमा ललाइ ति छ्याङकी जिनी गिवी।
22 साप ताङ थुङ्गुपला ख्यिरा ति दाक दाक्पी खाङ्बा मे रो? याङ्ना ख्यिराङ कोन्छ्योककी चर्चला मारे तोङ्गुप ताङ काङ साङ मेतुपतिवाला ङोछा लोङ्गिवी? दीकी कोर्ला काङ सिरुप्जा? काङ ङ ख्यिरा थोक्ला चिताङ कितुप? वुतुङ के ङ दुका ताम्ङेला चिताङ मिकी।
23 दी ङे बिन्दुप येन्देन ति चोवो येशू नेमा राङ ङला थोपुप यिन। खो डकी लकला जिम्बुप नुपला खोकी शुब्ज्याङ लकला लासुङ।
24 तमा कोन्छ्योकला थुचिछे पुल्सिमा ती शुब्ज्याङ ति च्याक्नी दुक सुङ्सुङ, “दी ति ख्यिरा थोक्ला बिन्दुप ङे जु यिन। ख्यिराङ ङला टेन्दुपला दी ति किसा।”
25 तुक राङ क्यानी खोकी कोरा लकला लानी दुक सिनी सुङ्सुङ, “दी ति ङे ठक नेसुर कोन्छ्योककी थाक्छ्येन नङ्गुप ठिम सम्बा यिन। नम पेला ख्यिरा दी कोरा नेमा थुङ्गिवे, ती पेला ङला टेन्दा किसा।”
26 तुक क्यानी चो पेला ख्यिरा दी शुब्ज्याङ साप ताङ दी कोरा नेमा थुङ्गिवे, खो माफेवा सेक ख्यिरा चोवो टुङ्गुप कोर्ला ख्याप्टाक किसा।
27 यिने सी ल्यामो हाक्माकोवा क्यानी दी शुब्ज्याङ साप ताङ चोवोकी कोरा नेमा थुङ्गिवे, तीकी चोवोकी जु ताङ ठकला मेचेङ्गा जोवु तप्की तीकी दिक्पा क्यावु यिन।
28 तुक क्यानी तेरी मीतिवी गोमाला खुरुङ कोन्छ्योक ताङ मुला तम्जी ल्यामु वोतुप मेतुप नासाम तोङ्शी, तमा तिराङ चोवोला टेन्दुप शुब्ज्याङ साप ताङ कोरा नेमा थुङ्शी।
29 च्यिलासिसिन दोजो सी शुब्ज्याङ ताङ कोरा ति खोकी जु ताङ ठक यिन सिनी ल्यामु हाक्माकोवा क्यानी साप ताङ थुङ्गिवे, तीला पर्च्या फोकिवी।
30 तुकै यिन्दुप तप्की ख्यिरा पर्ला ललाइ ति जुला रम्बु मेतुप ताङ काङ साङ कि मुथुपुप ताङ ललाइ ति नेर्पु गल वे। तमा मिरा चो ति शिसुङ।
31 यिने दोजो चोवोकी डेन साप सिनाङ गोमाला खोरो मिजी चुकै वे सिरुप ति हाक्कोसिमा दाक्पु खोकी पर्च्याला मेख्येल्वी।
32 दाक्पु ति जम्बुलिङकी मीतिवी मुला राङ ना मोडोशी सिनी कोन्छ्योककी दाक्पुला ठिम क्या नङ्गिवी, तमा छेटाङ साङ तेर्किवी।
33 तुक क्यानी अच्युनुपतिवा, ख्यिराङ मुला राङ जोम्नी चोवोकी डेन साप पेला च्यिककी च्यिकला गुसा।
34 दोजो ललाइ ल्होतुङ्बा वोसिन तीकी खोरो खाङ्बाला राङ सशी। मिसियाङ मुला राङ जोम्नी चोवोकी डेन साप पेला ख्यिराङला साङ पर्च्या फोकिवी। यम्बा ताम्ङेतिवा ति ङ वासिमा सिरुप्नो।