12
कटिनकी ङ्येम्बाकी कोर्ला
1 अच्युनुपतिवा, कोन्छ्योककी थु चाङ्मा नेमा थोपुप कटिनकी ङ्येम्बाकी कोर्ला ख्यिराङला टेङ्बो क्यानी हाक्कोशी सिनी ङ दी ताम्ङे ति सिरिन।
2 ख्यिराङ कोन्छ्योकला ङो माशेवु पेला ताम्ङे लप मुथुपुप कुतिवाला सोवा देकुपला तिवी थाकाला गलुप ति ख्यिराङला छ्या वे।
3 तुक क्यानी ख्यिरा दी ताम्ङे ति हाक्कोवा की। कोन्छ्योककी थु चाङ्मा नेमा ताम्ङे कितुप सी साङ “येशूला मोताप सुकुप यिन।” सिनी सि मुथुपी। तमा खोकी थु चाङ्मा नेमा तिराङ मिसिन यम्बा सी साङ “येशू ति चोवो यिन।” सिनी सि मुथुपी।
4 कोन्छ्योककी थु चाङ्मा नेमा थोपुप कटिनकी ङ्येम्बा ति कुतुक कुतुक गिवी, यिने ती कटिनकी ङ्येम्बा नङ्गुप खोकी थु चाङ्मा ति च्यिक राङ यिन।
5 शब्ज्यी कितुप लाकातिवा नम्बा कुतुक कुतुक गिवी, यिने चोवो येशूला शब्ज्यी कितुप ति च्यिक्पा राङ यिन।
6 कोन्छ्योककी थोक्ला कितुप लाकातिवा कुतुक कुतुक गिवी, यिने दाक्पुला ती तेरी लाका कितुपला कटिनकी ङ्येम्बा नङ्गुप ति कोन्छ्योक राङ यिन।
7 कोन्छ्योककी थु चाङ्माकी मी रे रेला लाका कितुप खोकी कटिनकी ङ्येम्बा नङ्गुप ति खोरो थोक्ला तिराङ मिन, मी तेरीला ल्यामु च्युङ्शी सिनी नङ्गुप यिन।
8 कोन्छ्योककी थु चाङ्मा नेसुर राङ ललाइ मीतिवाला रिक्पा तेरुप ताम्ङे लपुप ताङ ललाइला ति येन्देन तेरुप ताम्ङे लपुप ताङ
9 ललाइला ति कोन्छ्योककी थु चाङ्मा नेमा राङ तेपा कितुप ताङ ललाइला ति नेजु टेक ज्यितुप कटिनकी ङ्येम्बा नङ्नी वे।
10 तमा ललाइला ति हलेवु लाका छ्या देन्दुप ताङ ललाइला ति नम्दर शेतुप ताङ ललाइला ति मीतिवी लापुप सुङ ति खोकी थु चाङ्मा नेमा यिन्दुप मिन्दुप हाक्को ज्यितुप कटिनकी ङ्येम्बा नङ्नी वे। तमा ललाइला ति ग्येताम कुतुक कुतुक लपुप ताङ ललाइला ति ती ग्येताम ति छिक ग्युरुप कटिनकी ङ्येम्बा नङ वे।
11 यिने तेरी लाका कितुप ति कोन्छ्योककी थु चाङ्मा नेमा थोपुप यिन। ती कटिनकी ङ्येम्बातिवा ति खोकी नोवाला वोतुपतिवा तेरीला नङ्गिवी।
जु च्यिकला येन्लकतिवा बङी वे
12 मी जु ति च्यिक राङ वोसिनाङ ती जुला लाक्पा काङ्बा ताङ यम्बा येन्लकतिवा बङी वे। तमा येन्लकतिवा बङी वोसिनाङ जु ति च्यिक राङ वे। ती दोके ख्रीष्टला तेपा कितुपतिवा बङी वोसिनाङ ख्रीष्ट ति च्यिक राङ ज्यु वे।
13 च्यिलासिसिन दाक्पु यहूदीतिवा यिन्सिनाङ ग्रीकतिवा यिन्सिनाङ योक्पुतिवा यिन्सिनाङ योक्पुतिवा मिन्सिनाङ कोन्छ्योककी थु चाङ्मा च्यिककी ओङला राङ दाक्पी बप्तिस्मा लानी जु च्यिक राङ च्युङ्गुप यिन। तमा दाक्पु तेरीला खोकी थु चाङ्मा साङ च्यिक राङ नङ्नी वे।
14 तुक राङ क्यानी दाक्पी जुला येन्लक च्यिक राङ वोतुप मिन, यिने येन्लकतिवा बङी वे।
15 दोजो काङ्बी “ङ लाक्पा मिन, तुक क्यानी ङ ति जुकी येन्लक मिन।” सिक्यासिन काङ्बा ति जुकी येन्लक मिन रो?
16 येलुङ दोजो नम्ज्योककी “ङ मिक मिन, तुक क्यानी ङ ति जुकी येन्लक मिन।” सिक्यासिन नम्ज्योक ति जुकी येन्लक मिन रो?
17 दोजो तेरी जु ति मिक यिन्दुप यिन्सियाङ तीकी कनी नेसुर थो थुप्किवी रो? दोजो तेरी जु ती नम्ज्योक यिन्दुप यिन्सिन तीकी चुक क्यानी टेमा नोप्जा?
18 यिने कोन्छ्योककी खोरे नोवाकी राङ जुकी तेरी येन्लकतिवा दाक दाक्पी दासाला थिनी जोन नङ वे।
19 दोजो येन्लक च्यिक तिराङ तेरी जु यिन्दुप यिन्सिन, जु ति वुङ मुथुपी।
20 तुक क्यानी जुला येन्लकतिवा बङी वोसिनाङ जु ति च्यिक राङ यिन।
21 मिक तीकी लाक्पाला “ख्युरुङ ङला मोगोवी।” सिनी सि मुथुपी। तमा गो तीकी काङ्बाला “ख्युरुङ ङला मोगोवी।” सिनी सि मुथुपी।
22 बोरु जुला वोतुप यम्बा येन्लक सिनाङ रम्बु मेतुप येन्लक ति दाक्पी जुला मङ मेताला मेती मेवी।
23 तमा जुला वोतुप चुका येन्लक ति खक्छ्ये मेवे, तीला राङ दाक्पी मङ ङ्याम किवी। तमा पाङ्ला छ्या देन्दुप मेवु येन्लकतिवाला दाक्पी ल्यामु क्यानी ल्हटे किवी।
24 यिन्सिनाङ मिककी थोङ्दाङला ल्यामु वोतुप येन्लकतिवाला दाक्पी वोजिमु कि मोगोवी। तुक क्यानी कोन्छ्योककी दाक्पी जुकी रम्बु मेतुप येन्लकतिवाला मङ ङ्याम कितुप जोनी डिक्नी ज्याङ वे।
25 तुक क्यानी जु ति ख्ये मेपेवी, तमा जुकी येन्लकतिवा तेरी डिक्नी च्यिककी च्यिकला ल्यामो क्यानी ल्हटे किवी।
26 दोजो जुकी येन्लक च्यिकला दुक्पा ख्येल्सिन यम्बा तेरी येन्लकतिवी साङ दुक्पा खुर गोकिवी। तमा येन्लक च्यिकला ताङ्देन च्युङ्सिन यम्बा येन्लकतिवा तेरीला गा लङ्गिवी।
27 ख्यिराङ तेरी ख्रीष्टकी जु यिन, तमा खोकी जुकी येन्लकतिवा रे रे यिन।
28 कोन्छ्योककी चर्चला गोमा कितुप मीतिवा पेन नङ वे। तिवा ति गोमाला लोमा छ्येतिवा यिन, तमा ङ्यिवा ति नम्दर शेतुपतिवा यिन, तमा सुम्बा ति गेकेनतिवा यिन, तमा ती ज्युक्ला हलेवु लाका छ्या देन्दुपतिवा ताङ नेर्पु टेक ज्यितुपतिवा ताङ दाल्जा किटे कितुपतिवा ताङ चर्चला ओङ्ज्येन कितुपतिवा ताङ ग्येताम कुतुक लपुपतिवा यिन।
29 यिन्सिनाङ तिवा तेरी लोमा छ्येतिवा यिन रो? काङ तिवा तेरी कोन्छ्योककी लुङ्तेम्बातिवा यिन रो? काङ तिवा तेरी गेकेनतिवा ताङ हलेवु लाका छ्या देन्दुपतिवा यिन रो?
30 याङ्ना काङ तिवा तेरीकी मुला नेर्पु टेक ज्यितुप ओङ वे रो? काङ तिवा तेरीकी ग्येताम कुतुक कुतुक लप्किवी रो? काङ तिवा तेरीकी ग्येताम कुतुक कुतुककी छिक ग्युरुप थुप्किवी रो?
31 यिने ख्यिराङ ति कोन्छ्योककी थु चाङ्मा नेमा थोपुप छासे कटिनकी ङ्येम्बा ङ्येतुपला रेवा किसा।
तमा ङ ख्यिराङला ती सिनाङ मङ खक्छ्येवु लाम ल्यामु छ्या देनिनो।