6
तेपा कितुप मीतिवी पर्ला शुवा ग्यकुप मेवी
1 ख्यिरा पर्ला मिरा च्यिक ति यम्बा नुप ताङ मुला थमु शोर्सुङ सिसिन ख्यिराङ ठिम कितुपला कोन्छ्योकला तेपा कितुपतिवी ते मागल्नी च्यिला कोन्छ्योकला ङो माशेवु मीतिवी ठिम कितुप ठिम्खाङला डिवी?
2 ज्युक्ला कोन्छ्योकला तेपा कितुप मीतिवी जम्बुलिङला ठिम तोङ्गिवी सिरुप ति ख्यिराङला छ्या मे रो? काङ दी जम्बुलिङला ठिम कितुप छ्या वोसिन तुका खाँदा टिक्पेतिवा डिक्नी तेरुप ति ख्यिराङला ओङ मे?
3 काङ देवाच्येनकी लेन क्योलुप थुतिवाला साङ ज्युक्ला दाक्पी ठिम किवी सिरुप ति ख्यिराङला छ्या मे रो? तुक क्यानी दी मिजीला वुङ्गुप जम्बुलिङकी खाँदातिवा ति दाक्पी डिक मुथुवी रो?
4 ख्यिरा पर्ला तुका खाँदातिवा वोसिन च्यिला ख्यिराङ कोन्छ्योकला ङो माशेवु मीतिवी ठिम कितुप ठिम्खाङला डिवी? तुका मीतिवाला याङ चर्चकी काङ ताङ्देन मिकिवी।
5 दी ताम्ङे ति ङ ख्यिराङला ङोछा लोङ्गुपला सिरिन। ख्यिरा पर्ला खाँदा शोर्सिन डिङ तेरुप रिक्पा वोतुप मी ति ख्यिरा पर्ला च्यिक साङ मे रो?
6 यिने ख्यिरा पर्ला मिरा च्यिक ति यम्बा नुप ताङ मुला थमु शोर्सिन ती डिकुपला ख्यिराङ कोन्छ्योकला तेपा मिकिवु मीतिवी ठिम्खाङला डिवी?
7 ख्यिराङ च्यिककी च्यिकला शुवा ग्यकुप ति ल्हासिन ख्यिराङ कोन्छ्योकला तेपा मिकिवु मीतिवा दोके यिन सिनी हाक्कोकिवी। काङ ख्यिराङला ङ्यप्च्ये क्यासिनाङ हम क्यानी दे मुथुवी? ख्यिराङला मी यम्बी क्येन्सिनाङ हम क्या देसिन मेवी रो?
8 यिने ख्यिराङ याङ तेपा कितुप अच्युनुपतिवी पर्ला राङ च्यिककी च्यिकला क्येन्दुप ताङ मेलोवा किनोक।
9 दुक्टा कितुप मीतिवा कोन्छ्योककी ग्येल्खापला लेप मुथुपी सिरुप ति ख्यिराङला छ्या मे? ल्यामु क्यानी हाक्कोवा की। छ्येवु छ्येमु कितुपतिवा, कुला छ्यो तोङ्गुपतिवा, शम्डेन कितुपतिवा, ख्योक्पेजा ख्योक्पेजी पर्ला राङ शम्डेन कितुपतिवा,
10 कुन कितुपतिवा, देर्पा कितुपतिवा, छ्याङ्गेलेतिवा, मीला मारे तोङ्गुपतिवा, च्याक्पा कितुपतिवा ति कोन्छ्योककी ग्येल्खापला लेप मुथुपी।
11 गोमाला याङ ख्यिराङ साङ ललाइ तुकै राङ नोक। यिने त याङ चोवो येशू ख्रीष्ट ताङ दाक्पी कोन्छ्योककी थु चाङ्मा नेमा ख्यिरा दिक्पातिवा तानी ख्यिराङ टेङ्बु ताङ चाङ्मा च्युङ वे।
रङगी मिजी ने कोन्छ्योकला ताङ्देन कितुप कोर्ला
12 ख्यिरा पर्ला मी ललाइकी “ङ ति काङ क्यासिनाङ गिवी।” सिनी सिवी, यिने ती तेरी ताम्ङे ति ख्येप्साङ वोतुप ति मिन। ङ ति काङ क्यासिनाङ गिवी, यिने चुका ताम्ङेकी ओङला साङ ङ ति योक्पु मेदे।
13 तमा यम्बातिवी “समा ति सुपकी थोक्ला यिन, सुप ति समी थोक्ला यिन।” सिनी सिवी, यिने कोन्छ्योककी दिवा ङ्यिकरला ङ्यिम्ज्यिक फेन मोथोवु जेवी। दाक्पी जु ति शम्डेन कितुपकी थोक्ला मिन, चोवो येशूला शब्ज्यी बुलुपला यिन। तमा चोवो येशूकी दाक्पी जुला गोवु तेरी च्यालकतिवा नङ्गिवी।
14 कोन्छ्योककी खोरे ओङ नेमा राङ चोवो येशूला टुङ्नी ङोसु लाङ्सुङ। तुक क्यानी दाक्पुला साङ खोकी ओङ नेमा शेप ने सेन्बु लोङ्गिवी।
15 ख्यिरा जु ति चोवो येशू ख्रीष्टकी येन्लक यिन सिरुप ति ख्यिराङला छ्या मे? काङ ङ ति खोकी जु ति छ्येमुतिवी मुला शम्डेन कितुप जोप्जा? मिन, तुकै नाम्साङ कितुप मेङ्गिवी।
16 छ्येमुतिवी मुला शम्डेन कितुप मी जु ति छ्येमु ताङ च्यिक्पा राङ डिवी सिरुप ति ख्यिराङला छ्या मे? च्यिलासिसिन कोन्छ्योककी सुङला साङ दुक सिनी टि वे, “तिवा ङ्यी ति जु च्यिक राङ डिवी।”
17 यिने चुका मी ति चोवो येशू ताङ मुला च्यिक्पा राङ च्युङ्गिवे, ती मी ति खोकी थु चाङ्मा ताङ मुला च्यिक्पा राङ च्युङ्गिवी।
18 तुक क्यानी ङ ख्यिराङला सिरिन, शम्डेन कितुप नेसुर कुतुक दे। मीतिवी क्यावु यम्बा दिक्पातिवा तेरी खोरो जुकी फिला मेलोवा जेवी, यिने शम्डेन कितुप मी तीकी खोरो जुला राङ मेलोवा जेवी।
19 ख्यिरा जु ति कोन्छ्योककी थु चाङ्मा ज्युवु दासा यिन सिरुप ति ख्यिराङला छ्या मे? ती थु चाङ्मा ति कोन्छ्योककी ख्यिराङला नङ्गुप यिन। तमा ख्योरो मिजी ति ख्योरो ति मिन।
20 ख्यिराङ ति खोकी गोङ तेनी ङ्योवु यिन। तुक क्यानी ख्यिरा रङगी मिजी ने कोन्छ्योकला मोवा की।