7
जेन्दीकी कोर्ला
1 ख्यिरा ङला मीतिवी जेन्दी माक्यावु राङ ल्यामु यिन सिनी यिकी टिनी तङ्गुप कोर्ला ताम्ङे कितुप।
2 ङ ख्यिराङला काङ सिरिन सिसिन, शम्डेन कितुप नासाम बङी शरुप तप्की ख्योक्पेजातिवी दाक दाक्पी थोक्ला पेर्मी लङ्शी, पुम्पेजातिवाला साङ दाक दाक्पी थोक्ला ख्योवा वोशी।
3 ख्योवाकी खोरो पेर्मीकी थोक्ला कि गोवु लाका ति तेरी की, पेर्मीकी साङ खोरो ख्योवी थोक्ला कि गोवु लाका ति तेरी की।
4 पेर्मीकी खोरो जुला खोरो राङ ओङ्ज्येन मिकिवी, यिने तीकी ख्योवी ओङ्ज्येन किवी। तुक राङ क्यानी ख्योवी साङ खोरो जुला खोरो राङ ओङ्ज्येन मिकिवी, यिने तीकी पेर्मीकी ओङ्ज्येन किवी।
5 ख्योवा ताङ पेर्मी च्यिककी च्यिकला मुला राङ ङ्यिलोकुप कोर्ला मेवी सिनी मासिर। ख्यिराङ मुला राङ ताम्ङे क्यानी चेयी पर सेक मोपोर तिराङ कितुपला कुतुक देसिनाङ यम्बा पेला ति मुला राङ दे। मिसियाङ ख्यिराङ सेम डेकला दे माथुप्नी शैतानकी खोक्पा ल्हापला ख्येल्गिवी।
6 दी ताम्ङे ति ङे ख्यिराङला क बिन्दुप दोके ति मिन, यिने तुक क्यासिन गिवी सिक्यावु यिन।
7 तेरी मीतिवा ङ दोके जेन्दी माक्यानी देसिन गिवी सिरुप ति ङ नो कितिन। यिने तेरीला कोन्छ्योक नेमा दाक दाक्पी थोक्ला कटिनकी ङ्येम्बा कुतुक कुतुक थोप्नी वे। च्यिकला ति कटिनकी ङ्येम्बा कुतुक, यम्बाला ति कटिनकी ङ्येम्बा कुतुक थोप्नी वे।
8 त जेन्दी माक्यावुतिवा ताङ युक्सिमतिवी कोर्ला ङ काङ सिरिन सिसिन, तिवा साङ ङ दोके जेन्दी माक्यावा क्यानी देसिन ल्यामु यिन।
9 यिने तिवा सेम डेकला ज्योक मुथुपी सिसिन जेन्दी किशी। च्यिलासिसिन सेम डेकला ज्योक मुथुवु सिनाङ बोरु जेन्दी क्यावु राङ ल्यामु यिन।
10 त जेन्दी क्यावुतिवाला ङ चोवो येशू नेमा वावु क तेरिन, पेर्मीतिवा ख्योवा ताङ मुला नाम्साङ माटल्शी।
11 दोजो टल्सिनाङ तीकी जेन्दी ति मिकिशी। बोरु येलुङ खोरो ख्योवी मुला राङ थिन्नी देशी। ख्योवी साङ खोरो पेर्मीला मेडेल्शी।
12 तमा यम्बातिवाला ति ङ चोवो येशू नेमा वावु क ति मिन, यिने ङ टोङ्गु तेरिन। दोजो येशूला तेपा कितुप मी मिरा च्यिककी ति तेपा मिकिवु पेर्मी वे, यिने ती ति खोरो मुला राङ देतुप नो किसिन तीला टल्नी मोज्योक्शी।
13 तुक राङ क्यानी दोजो येशूला तेपा कितुप पुम्पेजा मिरा च्यिककी ति येशूला तेपा माक्यावु ख्योवा वे, यिने ती ख्योवा ति खोरो मुला देतुप नो किसिन तीला टल्नी मोज्योक्शी।
14 च्यिलासिसिन तेपा मिकिवु ख्योवा ति तेपा कितुप पेर्मीकी जोसालेन्सिन कोन्छ्योककी थोङ्दाङला टेङ्बु च्युङ्गिवी। तेपा मिकिवु पेर्मी साङ तेपा कितुप ख्योवी जोसालेन्सिन कोन्छ्योककी थोङ्दाङला टेङ्बु च्युङ्गिवी। मिसियाङ तिवी क्येवु पेजातिवा साङ टेङ्बु मुच्युङ्गिवी, यिने त याङ तिवा टेङ्बु राङ च्युङ वे।
15 यिने येशूला तेपा मिकिवु तीकी येशूला तेपा कितुप ख्योवा याङ्ना पेर्मीला टल्नी ज्योकिवी सिसिन तिवा टल्सिनाङ गिवी। तुक क्यासिन ख्योवी ओङला साङ पेर्मी दे मोगोवी, पेर्मी ओङला साङ ख्योवा दे मोगोवी। कोन्छ्योककी दाक्पुला लोदिमु क्यानी देतुपला कताङ नङ्गुप यिन।
16 पेर्मीतिवा, ख्यिराङला छ्या वे, येशूला तेपा कितुप पेर्मीकी खोरो तेपा माक्यावु ख्योवाला थर ज्यि थुप्किवी, तमा येशूला तेपा कितुप ख्योवी साङ तेपा माक्यावु खोरो पेर्मीला थर ज्यि थुप्किवी।
कोन्छ्योककी कतङ्गुप दोके मिजी क्योङ्गुप
17 चोवो येशूकी मीतिवा रे रेला चुकै लाका नङ वे, कङगी थोक्ला कताङ नङ वे, ती दोके राङ मिजी क्योङ्शी। दी ति तेरी चर्चतिवाला ङे लापुप येन्देन यिन।
18 मी ललाइला कोन्छ्योककी कताङ नङ्गुप पेला गोमाला के यहूदीतिवी च्येतुप लुक्सु क्या वे सिसिन तीकी च्येतुप लुक्सु क्यावु ति तुकै राङ देशी। मी ललाइ च्येतुप लुक्सु माक्यासिनाङ खोकी कताङ नाङ्सुङ सिसिन तीकी च्येतुप लुक्सु कितुप नो मिकिशी।
19 च्येतुप लुक्सु क्यावु ताङ माक्यावु ति खक्छ्येवु मिन, यिने कोन्छ्योककी कला ङ्येन्दुप ति खक्छ्येवु यिन।
20 कोन्छ्योककी मीला चुकै वोतुप पेला कताङ नङ वे, तुकै राङ देशी।
21 दोजो कोन्छ्योककी ख्युरुङला कताङ नङ्गुप पेला ख्युरुङ योक्पुला वोसिन ख्युरुङ पप माकी, यिने ती नेसुर थर थुप्सिन थरुप छोल।
22 च्यिलासिसिन कोन्छ्योककी कताङ नङ्गुप पेला सु योक्पु नोके, ती ति त याङ थर्नी कोन्छ्योककी गिपा च्युङ्गुप यिन। तुक राङ क्यानी सु मी यम्बी ओङला मेवे, तिवाला कोन्छ्योककी कताङ नङ्गुप पेला ख्रीष्टकी थोक्ला शब्ज्यी कितुप योक्पु यिन।
23 कोन्छ्योककी ख्यिराङला येशू ख्रीष्टकी ठककी गोङ तेनी ङ्योवु तप्की ख्यिराङ मीतिवी योक्पुला मादे।
24 तुक क्यानी अच्युनुपतिवा, कोन्छ्योककी सुला चुकै वोतुप पेला कताङ नङ वे, तुकै राङ क्यानी ती मी ति कोन्छ्योककी मुला तम्जी ल्यामु जोनी देशी।
जेन्दी माक्यावु मीतिवा ताङ युक्सिमतिवी कोर्ला
25 त जेन्दी माक्यावु मीतिवी कोर्ला याङ चोवो येशू नेमा काङ साङ क मे। यिने कोन्छ्योककी च्यम्बाकी ङला खोङ्तेर्मु जो नङ्गुप तप्की ङ ख्यिराङला टोङ्गु तेरिन।
26 तसाम पेकी दुका छेटाङ दुङल बङी वोतुप नासाम तङ्सिन चुकै नोके तुकै राङ देतुप ल्यामु यिन सिरुप ति ङला नासाम वे।
27 काङ ख्यिरा जेन्दी क्या वे? जेन्दी क्या वोसिन पेर्मी ताङ मुला टलुप नो माकी। काङ ख्युरुङ जेन्दी माक्यानी देन वे? तुकै यिन्सिन जेन्दी कितुप माछोल।
28 यिने ख्योरो जेन्दी क्यासिनाङ ती ति दिक्पा मिन, तमा पुम्पेजा नाज्युङकी जेन्दी क्यासिनाङ ती ति दिक्पा क्यावु मिन। यिन्सिनाङ जेन्दी क्यावु मीतिवी दी मिजीला दुक्पा बङी खुर गोकिवी। तुक क्यानी ख्यिराङला दुक्पा मेङ्येशी सिरुप ति ङे नोवा वे।
29 अच्युनुपतिवा, ङे सिक्यावु ताम्ङे ति दी राङ यिन। तिङ्मी तुजे वा वे। तफेन्ला पेर्मी वोतुपतिवा पेर्मी मेतुप दोके क्यानी कोन्छ्योककी थोक्ला शब्ज्यी पुल्नी दे।
30 तमा पप क्यानी ङोपतिवा माङुवा क्यानी देशी। गा कितुपतिवा गा मिकिवुतिवा दोके क्यानी देशी, ङ्योप्चे ग्यकुपतिवा खोरो लोला काङ साङ मेतुप दोके जोनी देशी।
31 दी जम्बुलिङला देतुप पेला गोवु च्यालकतिवा थोकुप ति गिवी, यिने ती च्यालकला तिराङ नासाम मातोङ। च्यिलासिसिन दी जम्बुलिङकी च्यालकतिवा याङ तोर्नी डिवी।
32 ख्यिराङ तेरी पप मिकिशी सिरुप ति ङे नोवा वे। जेन्दी माक्यावु मी तीकी चुक क्यानी कोन्छ्योकला गा लोङ्गुप सिनी कोन्छ्योककी थोक्ला तिराङ नासाम तोङ्गिवी,
33 यिने जेन्दी क्यावु मी तीकी खोरो पेर्मीला चुक क्यानी गा लोङ्गुप सिनी जम्बुलिङकी ताम्ङेला पप क्यानी
34 तीकी सेम ति यिसिक मिसिक डिवी। तुक राङ क्यानी जेन्दी माक्यावु पुम्पेजा नाज्युङकी साङ खोरो मिजी ताङ सेम ति चुक क्यानी टेङ्बु जोनी देतुप सिनी कोन्छ्योककी थोक्ला तिराङ नासाम तोङ्गिवी, यिने जेन्दी क्यावु पुम्पेजा तीकी खोरो ख्योवाला चुक क्यानी गा लोङ्गुप सिनी जम्बुलिङकी ताम्ङेला तिराङ पप किवी।
35 ङे दी ताम्ङेतिवा सिक्यावु ति ख्यिराङला ग्येकुपला मिन, यिने ख्यिराङ मिजी टेङ्बु क्योङ्गुप ताङ चोवोकी थोक्ला सेम च्यिक राङ च्युङ्नी शब्ज्यी कि थुप्शी सिनी सिक्यावु यिन।
36 दोजो मी ललाइकी खोरो जेन्दी कितुपला लङ्गुप पुम्पेजा ताङ मुला जेन्दी मिकितुप नासाम वासिनाङ खोरो लङ्गुप पुम्पेजाला जेन्दी मिकिवी सिरुप ति ल्यामु मिन, तमा ती पुम्पेजा ति जेन्दी कितुप पेला च्युङ्गुप ताङ खुरुङला जेन्दी कितुप नो वोसिन जेन्दी क्यासिन गिवी। तुक क्यावु ति दिक्पा मिन। तमा तिवा जेन्दी कि राङ गोकिवी।
37 यिने चुका मी तीकी खोरो सेमला जेन्दी मिकिवु नासाम नोके, तीला सी साङ कार माक्या वे, तमा खुरुङ ति डेकला दे थुप्किवी सिनी खोरो लङ्गुप पुम्पेजाला जेन्दी मिकी सिनी तेन्तेन क्यासिन तीकी ल्यामु राङ क्यावु यिन।
38 तुक क्यानी चुका मी तीकी लङ्गुप पुम्पेजाला जेन्दी किवे, तीकी ल्यामु राङ क्यावु यिन। चुका मी तीकी जेन्दी मिकिवे, तीकी मङ ल्यामु क्यावु यिन।
39 ख्योवा माशिवा सेक पेर्मी ति ख्योवी ओङला राङ देकिवी, यिने ख्योवा शिसिमा तीकी खोरो सेमला गलुप ख्योक्पेजा ताङ मुला जेन्दी कि थुप्किवी। यिन्सिनाङ ती ख्योक्पेजा ति कोन्छ्योकला तेपा क्यावु वुङ गोकिवी।
40 ङे नासामला ती पुम्पेजा तीकी जेन्दी माक्यावा क्यानी देसिन तीला मङ किर्मु गिवी। कोन्छ्योककी थु चाङ्मा ङे मुला ज्यु वोतुप तप्की ङे दी ताम्ङे सि थुप्किवी।