8
कुला तेकुप समी कोर्ला
1 त कुला पुलुप साप समी कोर्ला ङ ख्यिराङला सिरिन। दाक्पु तेरीला रिक्पा वे सिरुप ति छ्या वे। यिन्सिनाङ ती रिक्पाकी दाक्पुला ङ राङ यिन सिरुप जेवी। यिने ङ्यिङ्ज्येकी मी यम्बाला दाल्जा कितुप जेवी।
2 दोजो मी ललाइकी खुरुङ ति तेरी शेवु यिन सिनी नोकिवी सिसिन तीकी शे गोवु ति माशेवु गिवी।
3 यिने ललाइकी कोन्छ्योकला ङ्यिङ्ज्ये किवी सिसिन कोन्छ्योककी साङ तीला ङो शेकिवी।
4 तुक क्यानी कुला पुलुप समा साप कोर्ला ताम्ङे कितुप यिन्सिन दाक्पुला छ्या वे, दी जम्बुलिङकी कु ताङ ल्हलुतिवा काङ साङ मिन, कोन्छ्योक ति च्यिक राङ वोतुप कोन्छ्योक यिन।
5 नामला याङ्ना जम्बुलिङला मिङ तिराङ वोतुप ल्हलुतिवा वे। तुका ल्हलुतिवा बङी वोसिनाङ
6 दाक्पी थोक्ला ति पपा कोन्छ्योक च्यिक राङ वे। खोकी सुङ नेसुर राङ जम्बुलिङला वोतुप च्यालकतिवा तेरी ज्येसुङ। दाक्पु साङ कोन्छ्योककी थोक्ला मिजी क्योङ्यिन वे। तमा येशू ख्रीष्ट तिराङ दाक्पी तेपा क्यावु चोवो यिन। खो नेसुर राङ कोन्छ्योककी जम्बुलिङला वोतुप तेरी च्यालकतिवा ज्ये नाङ्सुङ। तमा दाक्पुला मिजी नङ्गुप साङ येशू ख्रीष्ट राङ यिन।
7 यिन्सिनाङ तेरी तेपा कितुप मीतिवाला साङ दी ताम्ङेकी कोर्ला ल्यामु क्यानी छ्या मेवी। माङ्शोक मीतिवा गोमाला कुला छ्यो तोङ्गुप बानी गलुप तप्की तरोङ साङ समा साप पेला कुला तेकुप समा राङ सयी वे सिरुप नासाम तोङ्यिन वे। तुक क्यानी तिवी ल्यामु मेलोवा हाक्माकोवु तप्की ती समा सोनी मेचेङ्गा गल वे सिरुप नासाम तोङ्गिवी।
8 यिने साप समी दाक्पु कोन्छ्योककी चिप्ला टेङ्बु च्युङ मुथुपी। साप समी दाक्पु कोन्छ्योककी थोङ्दाङला मेलोवा साङ मोडोवी, ल्यामु साङ मोडोवी।
9 तुक क्यानी ख्यिराङ च्याङ्से देता, ख्यिराङ तेपा रम्बु वोतुपतिवी काङ सोसिनाङ गिवी, यिने ख्यिरा जोसालेन्सिन तेपा रम्बु मेतुपतिवा दिक्पाला ख्येल्गिवी।
10 च्यिलासिसिन ख्यिराङ तेपा रम्बु वोतुपतिवा ल्हङाङ नाङ्ला देनी कुला तेकुप समा सोवु थोङ्सिन तेपा रम्बु मेतुपतिवी साङ ङाडेङ क्यानी साप नो मिकिवी रो?
11 ख्योरो हाक्कोवु ताम्ङेकी जोसालेन्सिन तेपा रम्बु मेतुप अच्युनुपतिवा दिक्पाला ख्येल्गिवी। दी ताम्ङे ल्यामु नासाम तोङ! तिवी थोक्ला राङ येशू ख्रीष्ट टुङ्गुप यिन।
12 ख्यिरा तुक क्यासिन तेपा रम्बु मेतुप अच्युनुपतिवाला दिक्पा कि ज्यिकिवी। तमा तिवी सेमला साङ मेलोक्पा लङ ज्यिकिवी। ती ति ख्रीष्टकी तेन्दोकला दिक्पा क्यावु यिन।
13 तुक क्यानी दोजो साप समी जोसालेन्सिन तेपा कितुप अच्युनुपतिवा दिक्पाला ख्येल्गिवी सिसिन, ङ नाम्साङ श मसा। तुक क्यासिन ङे तेपा कितुप अच्युनुपतिवा दिक्पाला ख्येलुप नेसुर र्होकिवी।