3
1 ल्होसा, कोन्छ्योककी दाक्पुला छासे ङ्यिङ्ज्ये क्या नङ वे। तुक क्यानी दाक्पुला खोकी पुज्युङपुम चिवु तप्की वुतुङ के तन्दा दाक्पु खोकी पुज्युङपुम यिन। ती तप्की जम्बुलिङकी मीतिवी दाक्पुला ङो मेशेवी। च्यिलासिसिन तिवी कोन्छ्योकला ङो माशे वे।
2 ङे ङ्यिङ्ज्येवुतिवा, तन्दा दाक्पु कोन्छ्योककी पुज्युङपुम यिन। दाक्पुला ज्युक्ला काङ ख्येल्गिवी सिरुप ति तन्दा सेक छ्या मे, यिने येशू फेवु पेला खो चुकै नोक सिरुप ति दाक्पी मिककी राङ थोङ्गिवी। तमा दाक्पु खो दोके राङ डिवी।
3 तमा खो टेङ्बु वोतुप दोके, दाक्पु खोला रेवा क्यानी देतुपतिवा तेरीकी टेङ्बु जोनी दे गोकिवी।
4 दिक्पा कितुप मीतिवा तेरी कोन्छ्योककी ठिमला मेङ्येन्दिवी। च्यिलासिसिन दिक्पा कितुप ति कोन्छ्योककी ठिमला मेतेन्दुप यिन।
5 दाक्पी दिक्पा ता ज्यितुपला राङ येशू ख्रीष्ट फेपुप यिन सिरुप ति ख्यिराङला साङ छ्या वे। तमा खोला काङ साङ दिक्पा मे।
6 तुक क्यानी खो ताङ मुला तम्जी ल्यामु वोतुपतिवी दिक्पा मिकिवी। दिक्पा क्या क्यावा देतुप मीतिवा सी साङ खोला माथोङ वे, ङो साङ माशे वे।
7 ङे ङ्यिङ्ज्येवु आङातिवा, ख्यिराङला सी साङ जिनोक मोजोशी। सी लाका टेङ्बु किवे, ती ति ख्रीष्ट टेङ्बु वोतुप दोके टेङ्बु यिन।
8 सी दिक्पा किवे, ती ति डेकी ति यिन। च्यिलासिसिन डेकी गोमा नेज्यु दिक्पा कियी वे। तुक क्यानी डेकी लाकातिवा ना तोङ्गुपला राङ कोन्छ्योककी सेवु येशू ख्रीष्ट फेवु यिन।
9 कोन्छ्योककी पुज्युङ पुमतिवा सी साङ दिक्पा मिकिवी। च्यिलासिसिन खोकी सुङ ति तिवी मुला गिवी। तिवा खोकी पुज्युङ पुमतिवा यिन्दुप तप्की दिक्पा क्या क्यावा मेदेवी।
10 ती नेसुर राङ कोन्छ्योककी गिपा सु यिन, डेकी गिपा सु यिन सिरुप ति हाक्कोकिवी। लाका टेङ्बु मिकिवुतिवा ताङ खोरो अच्युनुपला ङ्यिङ्ज्ये मिकिवुतिवा ति कोन्छ्योककी पुज्युङपुम मिन।
च्यिककी च्यिकला ङ्यिङ्ज्ये कि गोकिवी
11 ख्यिरा तोङ नेज्यु थोवु सुङ ति दी राङ यिन। दाक्पी च्यिककी च्यिकला ङ्यिङ्ज्ये कि गोकिवी।
12 दाक्पु कयिन दोके वुङ्गुप मेङ्गिवी। कयिन ति डेकी ओङला वोतुप मी यिन। तीकी खोरो नुप हाबिलला सेसुङ। तीकी खोरो नुपला च्यिला सेसुङ? च्यिलासिसिन तीकी लाकातिवा दुक्टा नोक, तीकी नुपकी लाका ति टेङ्बु नोक।
13 तुक क्यानी ङे ङ्यिङ्ज्येवु अच्युनुपतिवा, जम्बुलिङकी मीतिवी ख्यिराङला ङ्यिङ्मर क्यासिन ख्यिराङ हलेवा माकी।
14 दाक्पुला याङ शेप छ्येर्पा मिन, मिजी सम्बा थोप्नी वे सिरुप ति छ्या राङ वे। च्यिलासिसिन दाक्पी याङ अच्युनुपतिवाला ङ्यिङ्ज्ये क्या वे। सी खोरो अच्युनुपला ङ्यिङ्ज्ये मिकिवे, ती ति शेप ति शितोक लुकिवी।
15 रङगी अच्युनुपतिवाला ङ्यिङ्ज्ये मिकिवु मीतिवा तेरी शेन्बा दोके यिन। तीला नाम्साङ मिसिवु मिजी मोथोपिवी सिरुप ति ख्यिराङला साङ छ्या वे।
16 ङ्यिङ्ज्ये काङ यिन सिरुप ति चुक क्यानी हाक्कोकिवी सिसिन, येशू ख्रीष्टकी दाक्पी थोक्ला मिजी नङ्गुप ल्हासिमा हाक्कोकिवी। तुक क्यानी दाक्पी साङ रङगी अच्युनुपतिवी थोक्ला मिजी तेर गोकिवी।
17 मी ललाइकी खोरो लोला टोङ्बा वोसिनाङ खोरो अच्युनुपतिवाला कतुकार ख्येलुप थोङ्सिनाङ तीकी सेम क्योङ्बु जेवी सिसिन तीकी मुला कोन्छ्योककी ङ्यिङ्ज्ये गिवी रो?
18 ङे ङ्यिङ्ज्येवु आङातिवा, ख्यिराङ ख तिराङकी ङ्यिङ्ज्ये कितिन सिरुप मिन, यिने लाका टेङ्बु क्यानी ङ्यिङ्ज्ये छ्या तेन।
19 तुक क्यासिन दाक्पु ति टेङ्बुकी गिपा यिन सिनी हाक्कोकिवी, तमा कोन्छ्योककी थोङ्दाङला साङ दाक्पु तेन्तेन च्युङ्गिवी।
20 यिने दाक्पी सेमगी राङ दाक्पुला क्येन बिन्सिनाङ, कोन्छ्योक ति दाक्पी सेम सिनाङ च्यम्बा वोतुप ताङ चोछ्ये वे। तमा तेरी ताम्ङे ति खोला छ्या वे।
21 तुक क्यानी ङे ङ्यिङ्ज्येवुतिवा, दाक्पी सेमगी दाक्पुला क्येन माबिन्सिन, दाक्पु कोन्छ्योककी चिप्ला ङाडेङ क्यानी डो थुप्किवी।
22 तमा दाक्पी काङ लङ्सिनाङ खोकी दाक्पुला नङ्गिवी। च्यिलासिसिन ती ति दाक्पु खोकी कला ङ्येन्नी खोला गा लङ्गुप लाका क्यावु तप्की यिन।
23 खोकी दाक्पुला नङ्गुप क ति दी यिन। दाक्पी येशू ख्रीष्टला तेपा कि गोकिवी, तमा येशू ख्रीष्टकी दाक्पुला सुङ्गुप दोके च्यिककी च्यिकला ङ्यिङ्ज्ये कि गोकिवी।
24 येशू ख्रीष्टकी कला ङ्येन्दुपतिवा तेरी खोकी मुला तम्जी ल्यामु गिवी, तमा खो साङ तिवी मुला तम्जी ल्यामु गिवी। खो दाक्पी मुला तम्जी ल्यामु वे सिरुप ति खोकी दाक्पुला नङ्गुप थु चाङ्मा नेसुर हाक्कोकिवी।