4
सेम टेङ्बु ताङ मेटेङ्बु ल्हाप
1 ङे ङ्यिङ्ज्येवुतिवा, थु चाङ्मा नेमा वावु ताम्ङे क्यासिन ख्यिराङ तिवा तेरीला तेपा माकी, यिने ती ति कोन्छ्योक नेमा वावु थु चाङ्मा यिनोक मिनोक सिनी हाक्कोवा की। च्यिलासिसिन लुङ्तेम्बा मेटेङ्बुतिवा बङी दी जम्बुलिङला थेन वोतो।
2 चुका तीकी येशू ख्रीष्ट दी जम्बुलिङला मी जुजमला फेवु यिन सिनी सि वे, तीला कोन्छ्योक नेमा वावु थु चाङ्मा वे।
3 यिने चुका तीकी येशू ख्रीष्ट दी जम्बुलिङला मी जुजमला फेवु यिन सिनी मिसिर वे, ती ति कोन्छ्योक नेमा वावु मिन, येशूकी तेन्दोकला लङ्गुप थु मेटेङ्बु यिन। तीकी कोर्ला तोङ्ला के जम्बुलिङला गिवी सिनी ख्यिरा हाक्को वे। ती ति जम्बुलिङला वान सिन वे।
4 ङे आङातिवा, ख्यिराङ याङ कोन्छ्योककी पुज्युङपुमतिवा यिन। तुक क्यानी ख्यिराङ लुङ्तेम्बा मेटेङ्बुतिवी खला ग्येल वे। च्यिलासिसिन जम्बुलिङला वोतुपतिवी सिनाङ ख्यिरा सेमला वोतुप कोन्छ्योककी थु चाङ्मा ति चोछ्ये वे।
5 यिने लुङ्तेम्बा मेटेङ्बुतिवा जम्बुलिङ नेमा क्येवु यिन। तुक क्यानी तिवा जम्बुलिङकी ताम्ङे राङ किवी, जम्बुलिङकी मीतिवी साङ तिवी ताम्ङे राङ ङ्येन्गिवी।
6 दाक्पु ति कोन्छ्योककी पुज्युङपुमतिवा यिन। सी कोन्छ्योकला ङो शेवे, तिवी दाक्पी ताम्ङे साङ ङ्येन्गिवी। सु कोन्छ्योककी ति मिन वे, तीकी दाक्पी ताम्ङे साङ मेङ्येन्वी। ती नेसुर राङ दाक्पी थु टेङ्बु ताङ थु मेटेङ्बु ङो शेकिवी।
कोन्छ्योक ति ङ्यिङ्ज्येवु वे
7 ङे ङ्यिङ्ज्येवुतिवा, दाक्पु च्यिककी च्यिकला ङ्यिङ्ज्ये कि गोकिवी। च्यिलासिसिन ङ्यिङ्ज्ये ति कोन्छ्योक नेमा गिवी। सी ङ्यिङ्ज्ये किवे, ती ति कोन्छ्योककी पुज्युङपुम यिन, तीकी कोन्छ्योकला ङो शेकिवी।
8 च्यिककी च्यिकला ङ्यिङ्ज्ये मिकिवु मी तीकी कोन्छ्योकला साङ ङो मेशेवी। च्यिलासिसिन कोन्छ्योक ति ङ्यिङ्ज्ये वोतुप कोन्छ्योक यिन।
9 कोन्छ्योककी दाक्पुला चुक क्यानी ङ्यिङ्ज्ये क्यासुङ सिसिन खोकी सेवुला तेपा क्यानी दाक्पु सेन्बु लुशी सिनी खोकी च्यिक राङ वोतुप सेवु ति दी जम्बुलिङला ताङ्सुङ।
10 ङ्यिङ्ज्ये सिरुप ति काङ यिन सिसिन, कोन्छ्योकला दाक्पी ङ्यिङ्ज्ये क्यावु मिन, यिने खोकी दाक्पुला ङ्यिङ्ज्ये क्या नाङ्नी दाक्पी दिक्पी ठिलेन च्योलुपला खोकी सेवु येशू ख्रीष्ट ताङ्नी जिन्बा च्युङ च्यिसुङ।
11 ङे ङ्यिङ्ज्येवुतिवा, कोन्छ्योककी दाक्पुला छासे ङ्यिङ्ज्ये क्या नङ्गुप तप्की दाक्पी साङ च्यिककी च्यिकला ङ्यिङ्ज्ये कि गोकिवी।
12 कोन्छ्योकला सी साङ नाम्साङ माथोङ वे। यिन्सिनाङ दाक्पी च्यिककी च्यिकला ङ्यिङ्ज्ये क्यासुङ सिसिन, खो दाक्पी मुला ज्युकिवी, तमा खोकी ङ्यिङ्ज्ये ति दाक्पी मिजीला छेकिवी।
13 खोकी दाक्पुला थु चाङ्मा नङ वे। तुक क्यानी खो दाक्पी मुला ज्यु वे, तमा दाक्पु खोकी मुला वे सिरुप ति दाक्पी हाक्कोकिवी।
14 ङ्यिरा थोङ्गुप पङ्बु ति काङ यिन सिसिन, कोन्छ्योककी खोरे सेवु साङ जम्बुलिङकी मीतिवा दिक्पा ने थर ज्यितुपला नाङ्सुङ।
15 चुका मी तीकी येशू ति कोन्छ्योककी सेवु यिन सिनी मी मिङ्गाला सिवे, तीकी मुला कोन्छ्योक ज्युकिवी, तमा ती मी ति कोन्छ्योककी मुला वे सिरुप ति हाक्कोकिवी।
16 कोन्छ्योककी दाक्पुला ङ्यिङ्ज्ये क्या नङ्गुप ति हाक्कोवु तप्की दाक्पी खोकी क्या नङ्गुप ङ्यिङ्ज्येला तेपा क्यावु यिन। खो ति ङ्यिङ्ज्ये कितुप कोन्छ्योक यिन। चुका मी तीकी मी यम्बाला ङ्यिङ्ज्ये किवे, ती मी ति कोन्छ्योककी मुला वे सिरुप हाक्कोकिवी। तमा कोन्छ्योक साङ तीकी मुला ज्युकिवी।
17 ती नेसुर दाक्पी मिजीला खोकी ङ्यिङ्ज्ये तेरी छेसुङ, तुक क्यानी खो येलुङ फेप्नी ठिम कितुप तुजेला दाक्पु काङ साङ ज्यिवा कि मोगोवी। च्यिलासिसिन येशू ख्रीष्ट दोके क्यानी दाक्पी साङ मिजी क्योङ्गिवी।
18 ङ्यिङ्ज्येला ज्यिवा मे। दाक्पुला ङ्यिङ्ज्ये तेरी वोसिन ज्यिवा साङ तोर्किवी। च्यिलासिसिन ती ज्यिवा ति पर्च्या नेसुर गिवी। सी ज्यिवा किवे, तीला ङ्यिङ्ज्ये तेरी मेछेवी।
19 दाक्पु च्यिककी च्यिकला ङ्यिङ्ज्ये किवी, च्यिलासिसिन कोन्छ्योककी गोमाला के दाक्पुला ङ्यिङ्ज्ये क्या नाङ्सुङ।
20 दोजो मी ललाइकी ङ कोन्छ्योकला ङ्यिङ्ज्ये कितिन सिवी, यिने यम्बा अच्युनुपतिवाला ङ्यिङ्मर किवी सिसिन ती ति जिनोक जोप यिन। च्यिलासिसिन तीकी खोरो मिककी थोङ्गुप अच्युनुपतिवाला साङ ङ्यिङ्ज्ये मिकिवी सिसिन मोथोङ्गुप कोन्छ्योकला ङ्यिङ्ज्ये कि मुथुवी।
21 तुक क्यानी सी कोन्छ्योकला ङ्यिङ्ज्ये किवे, तीकी यम्बा अच्युनुपतिवाला साङ ङ्यिङ्ज्ये कि गोकिवी सिनी खोकी दाक्पुला क नङ वे।