5
तेपा नेसुर कोन्छ्योककी मुला तम्जी च्युङ्गुप
1 तुक क्यानी त याङ दाक्पु चोवो येशू ख्रीष्टला तेपा क्यानी कोन्छ्योककी थोङ्दाङला टेङ्बु ङ्येतुप तप्की येशू ख्रीष्ट नेसुर कोन्छ्योककी मुला तम्जी ल्यामु च्युङ वे।
2 दाक्पी येशू ख्रीष्टला तेपा क्यावु तप्की खोकी दाक्पुला कटिन नङ्नी वे। ती कटिनला राङ दाक्पु तसाम देनी वे। तमा ज्युक्थमाला कोन्छ्योककी दाक्पुला नङ्गुप मोवाकी थोक्ला रेवा क्यानी गा किवी।
3 तोजो तिराङ मिन, दाक्पु छेटाङला ख्येलुप पेला साङ गा क्यानी दे थुप्किवी। च्यिलासिसिन छेटाङ ख्येल्सिमा ती छेटाङकी राङ दाक्पुला हम क्या दे थुपुप जेवी।
4 दाक्पु हम क्या देसिमा दाक्पी किताङ नालु ल्यामु जेवी। तमा किताङ नालु ल्यामु च्युङ्सिमा दाक्पुला रेवा ङ्येकिवी।
5 तमा ती रेवा ङ्येसिमा दाक्पुला यिछ्येता मलङ्गिवी। च्यिलासिसिन कोन्छ्योककी दाक्पुला नङ्गुप थु चाङ्मा नेमा खोकी ङ्यिङ्ज्ये ति दाक्पी सेमला छासे क्यानी नाङ्सुङ।
6 तुक क्यानी दाक्पु दिक्पी ओङला शोर्नी काङ साङ कि मुथुपुप पेला राङ येशू ख्रीष्ट दाक्पी दिक्पी थोक्ला टेके तुजेला टुङ्सुङ।
7 ल्यामु वोतुप मी थोक्ला शेप ति मी चे चेयी वोज्यिवी, तमा टेङ्बु वोतुप मी थोक्ला शेप ति ललाइ ललाइ तिराङ वे।
8 यिने कोन्छ्योककी दाक्पु दिक्छेन वोसिनाङ दाक्पी दिक्पी थोक्ला येशू ख्रीष्ट टुङ च्यिनी खोकी दाक्पुला ङ्यिङ्ज्ये छ्या तेन्सुङ।
9 तुक क्यानी त याङ खोकी ठक नेसुर दाक्पु कोन्छ्योककी थोङ्दाङला टेङ्बु ङ्येतुप तप्की वुतुङ के ख्रीष्ट नेसुर दाक्पु कोन्छ्योककी पर्च्या नेमा र्होकिवी सिरुप ति मङ तेन्तेन वे।
10 च्यिलासिसिन दाक्पु कोन्छ्योक ताङ मुला डला गल वोसिनाङ खोकी सेवु येशू ख्रीष्ट टुङ्नी दाक्पु कोन्छ्योक ताङ मुला डिक्नी तम्जी ल्यामु च्युङ वे। तुक क्यासिन त याङ येशू ख्रीष्ट ङोसु वोतुप तप्की वुतुङ के दाक्पु दिक्पा ने थरुप ति मङ तेन्तेन वे।
11 तोजो तिराङ मिन, दाक्पी चोवो येशू ख्रीष्ट नेसुर दाक्पु कोन्छ्योक ताङ मुला तम्जी ल्यामु च्युङ्गुप तप्की खोकी दाक्पी थोक्ला क्या नङ्गुप लाकाकी जोसालेन्सिन त याङ दाक्पु छासे गा लानी वे।
आदम ताङ ख्रीष्ट
12 तुक क्यानी मी च्यिककी दिक्पा क्यावु तप्की दी जम्बुलिङला दिक्पा वानी ती दिक्पाकी जोसालेन्सिन मी ति शेपला ख्येल्सुङ। ती दोके तेरी मीतिवी दिक्पा क्यावु तप्की शेप ति तेरी मीतिवा खला ख्येल्सुङ।
13 कोन्छ्योककी मोशाला ठिम नङ्गुप सिनाङ गोमाला दी जम्बुलिङला दिक्पा नोक, यिने दिक्पाकी कोर्ला ठिम मेतुप तप्की दिक्पाकी छ्येर्पा साङ मिन्दुक।
14 आदमकी ङो नेज्यु मोशाकी ङो सेक आदमकी क्यावु दिक्पा दोके माक्यावु मीतिवी खला साङ शेपकी ग्येला क्यासुङ। ती आदम ति तिङ्ला फेपुप ख्रीष्टकी नमुना यिन।
15 यिने आदमकी दिक्पा ताङ कोन्छ्योककी कटिन नेमा वावु ङ्येम्बा ति कुतुक कुतुक यिन। च्यिलासिसिन आदमकी दिक्पा क्यावु तप्की मी बङी शिसुङ, यिने कोन्छ्योककी कटिन ताङ, येशू ख्रीष्ट मी च्यिककी कटिन नेसुर वावु ङ्येम्बा ति मी बङीकी थोक्ला ग्यक्चे क्यानी च्युङ्सुङ।
16 कोन्छ्योककी नङ्गुप कटिनकी ङ्येम्बा ति आदमकी क्यावु दिक्पाकी क्येन दोके मिन। च्यिलासिसिन आदम मी च्यिककी क्यावु दिक्पाकी जोसालेन्सिन तेरी मीतिवा कोन्छ्योककी पर्च्याला ख्येल्सुङ, यिने तेरी मीतिवी दिक्पा बङी क्यासिनाङ कोन्छ्योककी कटिनकी ङ्येम्बा नङ्नी मीतिवा तेरीला कोन्छ्योककी थोङ्दाङला टेङ्बु ङ्येतुप जेवी।
17 आदमकी क्यावु दिक्पाकी जोसालेन्सिन तेरी मीतिवा दिक्पाला शोर्नी शेपकी ग्येला किवी, यिन्सिनाङ कोन्छ्योककी ग्यक्चे वोतुप कटिन ताङ टेङ्बुकी ङ्येम्बा थोपुप मीतिवा ति येशू ख्रीष्ट मी च्यिक नेमा तिवी मिजीला ग्येला किवी सिरुप ति मङ तेन्तेन वे।
18 तुक क्यानी मी मिरा च्यिककी क्यावु दिक्पाकी जोसालेन्सिन तेरी मीतिवाला कोन्छ्योककी पर्च्या फोक्सुङ। तुक राङ क्यानी मी मिरा च्यिककी लाका टेङ्बु क्यावु तप्की तेरी मीतिवाला मिजी नङ्गुप कोन्छ्योककी थोङ्दाङला टेङ्बु वोतुप ङ्येसुङ।
19 च्यिलासिसिन आदम मी च्यिककी कोन्छ्योककी कला माङ्येन्दुप तप्की मी बङी दिक्छेन च्युङ्गुप दोके त याङ येशू ख्रीष्ट मी च्यिककी कोन्छ्योककी कला ङ्येन्दुप तप्की मी बङीला दिक्पा ने थर्नी टेङ्बु च्युङ्सुङ।
20 मोशाकी ठिम ति जम्बुलिङला वावु दुक्चे क्येनतिवा बङी फेलुपला यिन। यिन्सिनाङ दिक्पा बङी फेलुप तप्की कोन्छ्योककी कटिन साङ मङ फेल्सुङ।
21 तुक क्यानी दिक्पाकी जोसालेन्सिन मीतिवा तेरीकी खला शेपकी ग्येला कितुप दोके कोन्छ्योककी कटिन साङ टेङ्बु वोतुप नेसुर ग्येला किवी। तमा दाक्पी चोवो येशू ख्रीष्ट नेमा दाक्पुला नाम्साङ मिशिवु मिजी नङ्गिवी।