6
दिक्पाला शिनी ख्रीष्टला मिजी क्योङ्गुप
1 तुकै यिन्सिन त ङ्यिराङ काङ सिरुप? दाक्पी लाका मेलोवा क्यासिनाङ कोन्छ्योककी दाक्पुला कटिन नङ्गिवी सिनी दाक्पु येलुङ दिक्पा क्या क्यावा देकिवी रो?
2 तुकै मिन, काङ दिक्पी जोसालेन्सिन दाक्पु शिसुङ, यिने च्यिला येलुङ दिक्पा क्या क्यावा राङ देकिवी?
3 ख्यिराङला छ्या राङ वे, दाक्पु तेरीकी बप्तिस्मा लासिमा येशू ख्रीष्ट ताङ मुला च्यिक्पा राङ च्युङ्गुप यिन। तीकी तेन्दोक ति दाक्पु बप्तिस्मा लङ्गुप पेला दाक्पी मिजी ङ्यिङ्बा ति खोकी मुला राङ शेप यिन।
4 तुक क्यानी दाक्पु बप्तिस्मा लावु तप्की खोकी मुला राङ शिनी मुक्तुम ग्यपुप यिन। तमा कोन्छ्योककी मोवाकी थोक्ला येशू ख्रीष्ट टुङ्नी ङोसु लावु दोके दाक्पु साङ खो ताङ मुला मिजी सम्बा क्योङ्गिवी।
5 दोजो दाक्पु खोकी मुला राङ शिनी खो ताङ च्यिक्पा राङ च्युङ्सिन वुतुङ के दाक्पु टुङ्नी ङोसु लावु खो ताङ मुला साङ च्यिक्पा राङ च्युङ्गिवी।
6 दाक्पी दिक्पा वोतुप मिजी ति ना डोशी, तमा येलुङ दाक्पु दिक्पी ओङला मेख्येल्शी सिनी दाक्पी मिजी ङ्यिङ्बा ति खो ताङ मुला राङ ग्यङ्शिङ लोला कल्नी शेप यिन सिरुप ति दाक्पुला छ्या वे।
7 च्यिलासिसिन मी शिसिमा दिक्पाकी तीला ओङ्ज्येन कि मुथुपी।
8 तुक क्यानी दाक्पु येशू ख्रीष्टकी मुला राङ शेप यिन्सिन खोकी मुला राङ ङोसु साङ लङ्गिवी सिनी दाक्पी तेपा किवी।
9 ख्रीष्ट टुङ्नी येलुङ ङोसु लावु यिन। त याङ खो नाम्साङ मुटुङ्गिवी, च्यिलासिसिन शेपकी खोला काङ साङ कि मुथुपी सिरुप ति दाक्पुला छ्या वे।
10 येशू ख्रीष्ट थेङ्मा च्यिक राङ दिक्पी थोक्ला टुङ्गुप यिन। त याङ खो ङोसु लानी कोन्छ्योककी थोक्ला ङोसु ज्युकिवी।
11 तुक राङ क्यानी ख्यिराङ साङ दाक दाक्पी दिक्पी थोक्ला शेप यिन, यिने त याङ येशू ख्रीष्ट ताङ मुला राङ कोन्छ्योककी थोक्ला सेन्बु लावु यिन सिनी नासाम तोङ गोकिवी।
12 ती तप्की तफेन्ला ख्यिरा शिनी डोप जु ति दिक्पी ओङला ख्येल माज्यी, ख्यिरा मिजीला ख्यिरा जुकी सेम मेलोवाकी ग्येला कि माज्यी।
13 रङगी जुकी येन्लकतिवा ति लाका मेटेङ्बु कितुपला दिक्पाला माबिन, यिने ख्यिराङ शिनी साङ सेन्बु लावु मी यिन्दुप तप्की ख्यिरा मिजी तेरी कोन्छ्योकला पुल। रङगी जुकी येन्लकतिवा ति कोन्छ्योककी थोङ्दाङला टेङ्बु वोतुप लाका कितुपला पुल।
14 तुक क्यासिन दिक्पाकी ख्यिरा मिजीला ग्येला मिकिवी, च्यिलासिसिन ख्यिराङ ठिमकी ओङला मिन, कोन्छ्योककी नङ्गुप कटिनकी ओङला वे।
कोन्छ्योककी थोङ्दाङला टेङ्बु च्युङ्गुप
15 तुकै यिन्सिन काङ कि गोकिवी? त दाक्पु ठिमकी ओङला मेनी कटिनकी ओङला वे। तुक क्यानी येलुङ दिक्पा राङ कितुप्जा? तुकै ति मिन।
16 ख्यिराङ सी खला ङ्येन्नी तीकी योक्पु किवे, ख्यिराङ तीकी योक्पु यिन सिनी छ्या मे? ती दोके ख्यिराङ दिक्पाकी ओङला देतुप यिन्सिन ख्यिराङ दिक्पाकी योक्पु च्युङ्नी शिवी, याङ्ना कोन्छ्योककी कला ङ्येन्सुङ सिसिन खोकी थोङ्दाङला ख्यिराङ टेङ्बु च्युङ्गिवी।
17 यिने कोन्छ्योकला थुचिछे बुल गोकिवी, च्यिलासिसिन तोङ्ला ख्यिराङ थेङ्मा यी दिक्पाकी योक्पु च्युङ्नी वे, यिने त याङ ङ्यिरा ख्यिराङला कोन्छ्योककी कोर्ला नङ्गुप येन्देन ति टेङ्बु नोक सिनी ख्यिरा सेमगी दिङ नेज्युनी ङ्येन्दुप तप्की
18 ख्यिराङ दिक्पा ने थर्नी कोन्छ्योककी थोङ्दाङला लाका टेङ्बु कितुप योक्पु च्युङ्नी वे।
19 दी ताम्ङे ति ख्यिराङला हाक्कोवु कले वे। ती तप्की ङ ख्यिरा हाक्कोवु ग्येतामला सिरिन। च्यिलासिसिन तोङ्ला ख्यिराङ थेङ्मा यी ख्यिरा रङगी जुकी येन्लकतिवा मेटेङ्बु कितुप ताङ छासे दुक्चे क्येनकी लाका कितुपला योक्पु दोके च्युङ्सुङ, यिने त याङ ती ख्यिरा जुकी येन्लकतिवा कोन्छ्योककी थोङ्दाङला टेङ्बु कितुप योक्पु दोके खोला चेक ते।
20 तोङ्ला ख्यिराङ दिक्पी ओङला ख्येल्नी वोतुप पेला कोन्छ्योककी थोङ्दाङला टेङ्बु कितुप नो माक्या।
21 ती पेला ख्यिरा क्यावु लाकातिवा नेसुर काङ ङ्येसुङ? तन्दा नासाम तोङ्गुप पेला छासे ङोछा लङ्गुप लाका मेलोवा तिराङ क्यासुङ। ती तेरी लाकातिवी छ्येर्पा ति शेप यिन।
22 यिने त याङ ख्यिराङ दिक्पा ने थर्नी कोन्छ्योककी थोक्ला शब्ज्यी कितुप च्युङ्गुप तप्की ख्यिराङ कोन्छ्योककी थोङ्दाङला टेङ्बु ङ्येनी ख्यिराङला नाम्साङ मिशिवु मिजी थोप्नी वे।
23 च्यिलासिसिन दिक्पा क्यावु छ्येर्पा ति शेप यिन, यिने कोन्छ्योककी नङ्गुप कटिनकी ङ्येम्बा ति दाक्पी चोवो येशू ख्रीष्टला तेपा क्यासिमा थोपुप नाम्साङ मिशिवु मिजी यिन।