20
Nongo yi bisadi bi ndima yi vinu
1 Kipfumu ki Diyilu kidedikini banga :
—Pfumu yi ndima yitotuka mu nsuka-nsuka mu sonika bisadi bilenda sala mu ndimꞌandi yi vinu.
2 Wuwizana yawu mu denali kimosi mu lumbu kimosi ayi wuba fidisa ku ndimꞌandi yi vinu.
3 Wutotuka diaka mu thangu yi vua yi nsuka ; wumona batu bankaka, bakambulu mu kisalu, buna batelimini va zandu.
4 Wuba kamba :
“Beno mamveno, yendanu lusala mu ndimꞌama yi vinu ayi mandi lufuta mfutu wufuana. Bawu mamvawu bayenda.”
5 Wutotuka diaka va midi bosi mu thangu yintatu yi masika. Bo buawu kavanga.
6 Mu thangu yintanu, mu masika, wutotuka ayi wumona diaka bankaka buna batelimini vana ayi wuba yuvula :
“Bila mbi lutelimini vava lumbu kimvimba mu kambu sala kadi kima ?”
7 Bavutula :
“Bila kadi mutu kasi tusonika ko mu kisalu !” Wubakamba :
“Beno mamveno, yendanu sadi ku ndimꞌama.”
8 Va masika pfumu yi ndima wukamba kapita kiandi :
“Tela bisadi ayi wuba futa vayi tonina kuidi bobo baba batsuka mu sonama bosi wumanisina kuidi bobo baba batheti.”
9 Batu bobo basonama thangu yi ntanu yi masika batambula denali kimosi-kimosi mu kadika mutu.
10 Bosi batu bobo baba batheti mu sonama bu bayiza, babanzila ti bawu banluta vayi denali kimosi-kimosi kadika mutu kafutu,
11 Buna batambula kiawu, bafuemina pfumu yi ndima
12 ayi bankamba :
“Batu bobo sonikiningi kunzimunina, thangu yimosi kaka basadidi. Vayi wuba futidi phila yimosi ayi beto tusedi kisalu kingolo ayi ku tsi muini wungolo mu lumbu kimvimba.”
13 Pfumu yi ndima wuvutula kuidi kisadi kimosi mu bawu :
“A nkundi ama, ndisi kuvangila mbimbi ko ! Tuisi wizananga yaku mu denali kimosi ko e ?
14 Bonga mfutu aku ayi yenda kuaku. Minu thidi vana kuidi mutu wowo wutsuka phila yimosi banga ngeyo.
15 A buevi ndisi ko minsua mu vanga dioso thidi mu zimbongo ziama e ? Voti kikhenene weka mona bu ndidi mutu wumboti.”
16 Buawu bobo buela bela batu batsuka batu batheti ayi batu batheti batu batsuka.
Yesu wuyolukila diaka lufua luandi ayi mfulukulu andi
(Malako 10.32-34 ; Luka 18.31-34)
17 Yesu bu kaba nkuenda ku Yelusalemi ; wubonga mu nzila kumi minlonguki miandi miodi va lutengo, wuba kamba :
18 —Lutala, tulembo yendi ku Yelusalemi, vayi kuna Muana Mutu kela yekodolo mu mioko mi bapfumu banganga Nzambi ayi kuidi Minlongi mi Mina. Bela kunzengila nkanu wu lufua
19 ayi bela kunyekula mu mioko mi bapakanu muingi bansekinina, bambeta bikoti ayi bambanda va dikulusi. Bosi mu lumbu kintatu niandi wela fuluka.
Ngudi yi bana ba Zebede yilombila bana bandi buangu ki nzitusu
(Malako 10.35-45 ; Luka 22.25-27)
20 Buna ngudi yi bana ba Zebede wuyiza kuidi Yesu va kimosi ayi bana bandi ; wumfukimina ayi wunlomba diambu dimosi.
21 Yesu wuyuvula :
—A mbi tidi e ?
Niandi wuvutula :
—Bika bana bama baba babuadi bababakala bavuanda wumosi ku lubakala luaku ayi wumosi ku lumoso luaku mu Kipfumu kiaku.
22 Yesu wuba kamba :
—Beno lusi zaba ko momo lunlomba. Buna beno lulenda nua mbungu yoyi ndiela nua ?
Bamvutudila :
—Nyinga, tulenda kueto bu vanga !
23 Yesu wuba kamba :
—Bukiedika luela nua mbungu ama vayi mu diambu di vuanda va lubakala luama voti ku lumoso luama, diodi disi ko mu minsua miama bila bibuangu beni bidi mu diambu di batu bobo Dise diama kakubikila biawu.
24 Thangu kumi di minlonguki minkaka miwa bobo, mifuemina bakhomba zina buadi.
25 Yesu wuba tumisa bawu boso, wuba kamba :
—Luzebi ti bapfumu ba Bapakanu zieti kuba yadila mu kingolo ayi batu bawu banneni beti kuba monisanga lulendo luawu.
26 Vayi buawu ko bulenda bela kuidi beno. Vayi woso mutu tidi ba wunneni mu beno bika kaba kisadi kieno.
27 Woso tidi ba wutheti buna bika kaba mvika weno.
28 Bila Muana Mutu kasia kuiza ko muingi bansadila vayi wuyiza mu diambu di sadila batu ayi mu diambu di vana luzingu luandi mu diambu di kula batu bawombo.
Yesu wubelusa baphofo buadi
(Malako 10.46-52 ; Luka 18.35-43)
29 Bu babika Yeliko, nkangu wu batu bawombo balandakana Yesu.
30 Baphofo buadi bavuanda mu yenda nzila, bu ziwa ti Yesu wulembo vioki buna zieka nyamikina :
—Pfumu ! Muana Davidi, wutumoni kiadi e !
31 Nkangu wu batu wuba temina muingi zibika biyoko vayi ziluta buela yamikina ngolo :
—Pfumu ! Muana Davidi, wutumona kiadi e !
32 Yesu wutelama ; wuba tela ayi wuba yuvula :
—A mbi lutidi ndiluvangila e ?
33 Zimvutudila :
—Pfumu ! Tutidi meso meto mazibuka !
34 Yesu wuba mona kiadi, wusimba meso mawu. Muna ntangu beni yina kaka zitona mona ayi zinlandakana.