21
Yesu wutambulu mu nkembo ku Yelusalemi
(Malako 11.1-11 ; Luka 19.28-38 ; Yowani 12.12-19)
1 Mu thangu bafikama ku Yelusalemi, batula ku Betefange, buala buidi ku mongo minti mi olive, Yesu wutuma minlonguki miodi ayi
2 wuba kamba :
—Yendanu ku buala bobo buidi ku ntualꞌeno. Buna ma lumona phunda yi nketo yikangama ayi muanꞌandi wu mbakala va ndambu ; luzinianguna ayi lundatina ziawu.
3 Enati mutu wuluyuvudi, buna luvutula : “Pfumu wuzivuidi mfunu”. Buna wela kuzifidisa mu nsualu.
4 Mambu momo mavangama mu diambu di dedikisa mambu matuba mbikudi :
5 Lukamba kuidi ndumba yi Sioni
Tala Ntinuꞌaku wizidi kuidi ngeyo
widi wulembama ; widi va yilu phunda yi nketo
vuendi va mbata muana phunda, muana wu phunda yi nketo.
6 Minlonguki miyenda, mivanga boso Yesu kaba kambila.
7 Minata phunda yinketo ayi muana phunda, miyala minledi miawu va mbata ziphunda beni bosi Yesu wuvuanda vana.
8 Nkangu wu batu bawombo bayala minledi miawu mu nzila. Bankaka bazenga matafi ma minti ayi bayala mawu mu nzila.
9 Nkangu wu batu bobo baba ku ntuala ayi bobo baba ku mbusa, baba yamikinanga :
Ozana kuidi Muana wu Davidi !
Bika kasakumunu mutu wowo wunkuizila mu dizina di Pfumu
Ozana mu bibuangu bizangama !
10 Bu kakota mu Yelusalemi, divula dioso dinikuka. Bayuvula :
—Nani mutu wowo e ?
11 Nkangu wu batu wuvutula :
—Yesu, mbikudi wu Nazaleti mu zunga ki Ngalili !
Yesu mu nzo Nzambi
(Malako 11.15-19 ; Luka 19.45-48 ; Yowani 2.13-16)
12 Yesu wukota mu luphangu lu Nzo Nzambi, wukuka batu boso baba sumba bima. Wusengubula zimeza zi bobo baba sienzanga zimbongo ayi bikundu bi bobo baba nsumbisa mabembi.
13 Ayi wuba kamba :
—Disonama ti Nzo ama yela tedolo Nzo yi lusambulu vayi beno lukitudi yawu suamunu ki mivi.
14 Baphofo ayi bantiudikanga bayiza kuidi niandi muna luphangu lu Nzo Nzambi ayi wubabelusa.
15 Bapfumu zi banganga Nzambi ayi minlongi mi Mina mifuema ngolo bu bamona bikumu biobi bivanga Yesu ayi bu bamona bana baba yamikina mu khati luphangu lu nzo Nzambi ti : “Ozana, kuidi muana Davidi !”
16 Diawu banyuvudila :
—Wulembo wi kuaku mambu momo bana bobo balembo tubi e ? Yesu wuba vutudila :
—Nyinga ! Vayi lutengi ko :
Ngeyo wutambula Nzitusu aku mu miunu mi bana balezi
ayi nate mu miunu mi bana batsombi ?
17 Bosi wubabika, wutotuka mu divula, wuyenda ku Betani kuawu kaleka.
Yesu wusinga nti wu figi
(Malako 11.12-14,20-25)
18 Mu nsuka-nsuka bu kaba mvutuka ku divula, wumona nzala.
19 Bu kamona nti wumosi wu figi va ndambu nzila, wufikama vaba nti beni vayi meza na meza kaka kamona. Buna wukamba nti beni :
—Wulendi buela butanga kadi dikundi dimosi ko ! Muna thangu beni nti wu figi wutumbu yuma.
20 Minlonguki bu mimona bobo, misimina ayi miyuvula :
—A buevi nti wowo wuvikidi yumina ?
21 Yesu wuba vutudila :
—Bukiedika ndikulukamba enati minu kidi yeno ayi enati lulendi memata ko, bika sia ti lubeki kaka buvangila mambu maphengi mu nti wu figi wawu vayi lubeki bukambila kuidi mongo wowo : “Katuka vava, wukiloza mu mbu !” ayi mela vangama.
22 Mambu mamo malunlomba mu lusambulu, luela matambula enati luwilukidi.
Balenza kipfumu ki Yesu
(Malako 11.27-33 ; Luka 20.1-8)
23 Yesu wukota mu Nzo Nzambi. Mu thangu kaba nlonga, bapfumu banganga Nzambi ayi bakulutu ba batu bayiza fikama va kaba ayi banyuvula :
—Mu lulendo mbi wulembo vangila mambu momo ? Ayi nani wuvana lulendo beni ?
24 Yesu wuba vutudila :
—Thidi kuluyuvula mamvana kiuvu kimosi. Enati lupheni mvutu, buna bosi minu mamvama ndieka kulukamba mu lulendo mbi ndilembo vangila mambu mama.
25 Nani wuvana Yowani minsua mu botika, Nzambi voti batu ?
Batona findana bawu na bawu ziphaka ayi batuba :
—Beto kuiza kambi ti “Nzambi” buna maka tukamba ti “bila mbi lumanga kunwilukila ?”
26 Bosi beto kamba ti “Batu” boma tummona mu diambu di nkangu wu batu bila baboso bazebi ti Yowani widi mbikudi.
27 Buna bavutudila Yesu :
—Tusi zaba ko !
Niandi mamvandi wuba kamba :
—Minu mamvama ndilendi kulukamba ko kani mu lulendo mbi ndilembo vangilanga mambu momo.
Nongo yi bana buadi ba babakala
28 Buevi lumbanza mu diambu diadi ? Mutu wumosi wuba ayi bana bandi buadi bababakala. Wuyiza kuidi wutheti ayi wunkamba : “A muanꞌama yenda sadi buabu ku ndima yi vinu !”
29 Muana beni wumvutudila : “Mbengi kuama” Bosi kunzimunina, wubalula mayindu ayi wuyenda.
30 Dise diyenda kuidi muana wummuadi ayi mo mawu mambu kankamba. Niandi wuvutula “Nyinga Tata, ndinkuenda.” Vayi kasi kuenda ko.
31 Nani wuvanga luzolo lu Dise mu bana babuadi ? Bamvutudila :
—Muana wutheti.
Buna Yesu wuba kamba :
—Bukiedika ndikulukamba mimfutisi mi ziphaku ayi bandumba leta bela kulutuaminina mu kota mu Kipfumu ki Nzambi.
32 Bila Yowani wuyiza mu kulumonisa nzila yi busonga vayi lumanga kunwilukila. Muaki mimfutisi mi ziphaku ayi bandumba leta banwilukila. Ka diambu ko lumona momo vayi lusia balula mavanga ko muingi ku nzimunina lunwilukila.
Nongo yi minkuni mimbimbi mi ndima yi vinu
(Malako 12.1-12 ; Luka 20.9-19)
33 —Wanu nongo yinkaka : Mutu wumosi wuba ndimꞌandi yi vinu, wutungila yawu luphangu, wukaba dibulu dimosi mu kamuninanga mimbutu ma vinu. Wutunga nzo yi banga mu diambu di sunganga ndimꞌandi. Wuyekula ndima beni mu mioko mi bisadi bi ndima muingi bayifutilanga ; bosi wuyenda mu nzietolo.
34 Thangu yi mvelongo mimbutu bu yifuana, wutuma bisadi biandi kuidi bisadi biobi kadefisa ndima beni muingi belandi ndambuꞌandi mimbutu.
35 Vayi minkuni mi ndima yi vinu beni mibuila bisadi biandi : mibeta wumosi, mivonda wunkaka bosi milozila wuntatu matadi.
36 Pfumu yi ndima vinu beni wutuma bisadi binkaka ; lelo bawombo katuma viokila bobo katuama tuma va theti vayi mambu mo mawu bavangulu kuidi bobo kasia bikila ndima.
37 Bosi wuba fidisila muanꞌandi bu katuba ti : bela kinzika muanꞌama.
38 Vayi minkuni buna mimona muana beni wulembo yizi, mikambasana ti : “Taleno mutu wowo wela vinginina kiuka, yizanu tumvonda muingi kiuka kikituka kieto.”
39 Mimbuila, minkoka ku nganda yi ndima ayi mimvonda.
40 Buevi lumbanza, thangu pfumu yi ndima yi vinu bu kela vutuka, buevi kela vangila minkuni miomio ?
41 Bamvutudila :
—Wela vonda, mu kambu kiadi batu bobo bambimbi. Bosi wela defisa ndima yi vinu beni kuidi minkuni minkaka miomi miela kumvananga mimbutu mu kadika thangu yeti velo mimbutu !
42 Bosi Yesu wuba kamba :
—Kadi khumbu lutengi ko mu masonoko :
Ditadi diodi diloza mintungi
dikituka ditadi di mfunu, di fuma ki nzo.
Pfumu niandi wuvanga buawu.
Ayi didi diambu di tsiminanga mu meso meto !
43 Diawu ndikulukambila ti bela kuluziona Kipfumu ki Nzambi ayi bela vana kiawu kuidi batu bobo bela kibutila mimbutu.
44 Vayi woso mutu wela bua va ditadi beni
wela keluka mu bitini,
vayi woso wela builu ditadi beni
wela mana kosumuka.
45 Buna bamana wa zinongo ziozi, bapfumu banganga Nzambi ayi Bafalisi babakula ti Yesu bawu kalembo yolukila.
46 Batomba nzila yi kunkangila vayi nkangu wu batu baba mona boma bila batu bammona ti niandi widi mbikudi.