Minkunga 125
Ndembama yi kiedika
Nkunga wunyimbudulu mu nzila yikuendila ku nzo Yave.
1 Bobo bantulanga diana diawu mu Yave badi banga mongo wu Sioni,
wowo wulendi nikuka ko vayi wunzingilanga mu zithangu zioso.
2 Banga miongo bu mizungididi Yelusalemi,
buawu bobo Yave kazungididi batu bandi
tona buabu nate mu zithangu zioso.
3 Nkawa wu kipfumu wu batu bambimbi wulendi vuandanga ko
va mbata ntoto wukubukulu batu basonga ;
bila nganu batu basonga bela sadila mioko miawu mu vanga mambimbi.
4 Vanga mamboti, a Yave, kuidi batu bamboti,
kuidi bobo badi balulama mu mintima.
5 Vayi bobo beti vengama mu diatila mu zinzila zivenga,
Yave wela kuba lalikisa va kimosi ayi bobo bamvanganga mambimbi.
Ndembama yibanga vadi Iseli.