Minkunga 44
Yave wutuloza
Nkunga bana ba babakala ba Kole kuidi pfumu minyimbidi.
1 Beto tuwilu mu matu meto, a Nzambi
madise meto batukamba mambu momo wuvanga mu bilumbu biawu ;
mu bilumbu bivioka
2 Mu koko kuaku, ngeyo wukuka makanda ;
ayi ngeyo wuvingisa madise meto ;
ngeyo wukosikisa batu ayi ngeyo wufunisa mase meto.
3 Kadi sia ti mu diambu di sabala kiawu
bazionina tsi ;
Voti kadi sia ti koko kuawu kuawu kuba natina ndungunu ;
koko kuaku ku lubakala,
koko kuaku ayi kiezila ki zizi kiaku
bila ngeyo wuba zola.
4 Ngeyo ntinu ama ayi Nzambi ama ;
ngeyo wuzenga ndungunu mu diambu di Yakobi.
5 Mu diambu diaku, tuela vutula bambeni zieto ku mbusa.
Mu diambu di dizina diaku, tuela diatikisa
bobo beti kutulenda.
6 Nditulanga ko diana diama mu mbasꞌama
ayi sabala kiama kilendi ku ndatina ndungunu ko.
7 Vayi ngeyo weti kutuvana ndungunu mu bambeni zieto ;
ngeyo wumfuisanga tsoni bobo bakutulendanga.
8 Mu Nzambi beto tueti kukiniemisanga
mu lumbu kimvimba
ayi tuela zitisa dizina diaku
mu zithangu zioso.
9 Vayi buabu ngeyo wutuloza ayi wutukuludi ;
ngeyo wutotukanga diaka ko
ayi nkangu eto wu masodi.
10 Ngeyo wutuvutula ku mbusa
va ntuala bambeni zieto ;
ayi bobo beti kutulenda bazionini bima bieto.
11 Ngeyo wutuyekula batudia banga mamemi.
Wutusasikisa va khatitsika makanda.
12 Ngeyo wusumbisa batu baku mu thalu yi phamba,
wukadi kuba bakila ndandu bu wuba sumbisa.
13 Ngeyo wutukitula kima ki tsoni
kuidi bafikimini yeto,
kisekununu ayi kitsevolo
kuidi bawu batuzungididi.
14 Ngeyo wutukitula zinongo va khatitsika makanda ;
batu balembo kutunikunina mintu miawu.
15 Mvuezolo ama widi ku ntualꞌama mu lumbu kimvimba ;
ayi tsoni yilembo monika va zizi kiama ;
16 mu diambu di bifingu bi bobo balembo
ndenzi ayi balembo mvuezi,
mu diambu di mbeni, mutu wumvutulanga landi.
17 Mamoso momo matubuila
vayi beto tusia kuzimbakana ;
Voti tusia ba luvunu mu Nguizani aku ko.
18 Mintima mieto misia baluka ko ;
Malu meto masia vengama ko mu nsolo aku,
19 vayi wutukosikisa ayi wutukitula suamunu ki memvo ;
ayi wutufuka ku tsi dibulu di tombi.
20 Enati beto tuzimbakana dizina di Nzambi eto,
voti tunonuna mioko mieto kuidi nzambi yi nzenza,
21 buna Nzambi kalendi bakula ko e ?
Bila niandi zebi mansueki ma ntima.
22 Vayi mu diambu diaku tueti dengana lufua
mu lumbu kimvimba,
ayi balembo tumoni banga mamemi
mafueti kuenda ku vondo.
23 Kotuka, a Yave !
Bila mbi wulembo lekila e ?
Kotuka kuaku kadi tumbu ku tuyekula mvimba !
24 Bila mbi wulembo suekila zizi kiaku e ?
Ayi bila mbi wulembo zimbikinina
ziphasi zieto ayi yamusu kueto e ?
25 Tunatu ku mbungi-mbungi
zinitu zieto zinama mu ntoto.
26 Telama, wutusadisa
wutukula mu diambu di luzolo luaku lu ngolo.