Minkunga 45
Nkunga wu dikuela di ntinu
Nkunga bana ba babakala ba Kole kuidi pfumu minyimbidi. Nkunga wu luzolo bayimbidila mu “LISI”.
1 Ntimꞌama wulembo fundumuka mu mambu ma kitoko.
Ndiela samuna mambu mama mu diambu di ntinu.
Ludimi luama luidi lapi yi nsoniki wukiedika.
2 Ngeyo viokidi batu mu kitoko ;
bididi biaku bidukudulu mafuta ma nlemvo ;
diawu Nzambi kasakumunina mu zithangu zioso.
3 Kanga sabala kiaku mu luketo luaku,
ngeyo kinuani ki ngolo,
vuata ngeyo veka kiezila ayi nzitusu.
4 Mu nzitusu aku, telama va ntuala
mu ndungunu mu diambu di kakidila kiedika,
kukikulula ayi busonga.
Bika koko kuaku ku lubakala kumonisa mavanga ma tsisi.
5 Bika zitsoto ziaku zidi meno,
zitobula mintima mi bambeni zi ntinu ;
bika makanda mabua ku tsi tambi biaku.
6 Kundu kiaku ki kitinu, a Nzambi
kiela zingila mu zithangu zioso
Nkawꞌaku wu busonga wela ba nkawa wu Kitinu kiaku.
7 Ngeyo wunzolanga busonga ayi wunlendanga mambimbi.
Diawu Nzambi, Nzambi aku, wutula va mbata batu bandiatanga yaku
bu kavinda mafuta ma khini.
8 Zilobi ziaku zioso zidi tsudi malasi ma mile,
ayi alowesi ayi kase ; mu nzo yoyi yitungulu mu meno ma nzawu
miziki mi zitsinga mikumonisa khini.
9 Bana ba baketo ba ntinu badi va khati baketo baku ba luvalu.
Va koko kuaku ku lubakala, vadi Ntinu wu nketo mu nolo yi Ofili.
10 Wa, o muana ndumba, tala ayi tamba dikutu :
zimbakana batu baku ayi nzo dise diaku.
11 Ntinu wulembo moni khini mu kitoko kiaku
kinzika bila niandi Pfumu aku ;
12 Muana ndumba wu Tile, wela nata dikaba ;
batu balutidi kimvuama bela tomba mona mamboti maku.
13 Nkembo woso widi kuidi muana ntinu wu nketo
mu khati vinga kiandi
lobi andi yitungulu mu nolo.
14 Mu minlele midi malenda ma kitoko ; bela kunnata kuidi ntinu.
Zindumba ziozi zizebi ko zinitu zi babakala
ziozi zindiatanga yandi zilembo kunlandakana.
Ayi bela natu kuidi ngeyo.
15 Bela natu mu khini ayi mu mayangani.
Bela kota mu nzo ntinu.
16 Bana baku ba babakala bela bonga buangu ki madise maku ;
ngeyo wela ku babieka bilandi bi ntinu
mu tsi yi mvimba.
17 Minu ndiela sia ti batebukilanga moyo
mu zitsungi zioso.
Diawu makanda mela kuzitisa mu zithangu zioso
ayi mu mvu ka mvu.