Minkunga 92
Didi diambu di mboti mu zitisa Yave
Nkunga wu lumbu ki saba.
1 Didi diambu dimboti mu zitisa Yave
ayi bula miziki mu diambu di dizina diaku, a Nzambi yizangama,
2 mu yamikisa luzolo luaku mu nsuka
ayi kikhuikizi kiaku va builu,
3 mu miziki dikumi di minsinga, di siku beti tedila Lila
ayi mu nningu wu ngitala.
4 Bila ngeyo wumbonisa khini mu mavanga maku, a Yave.
Ndiela yimbila mu khini
mu diambu di mavanga ma mioko miaku.
5 A phila tola mavanga maku madi, a Yave,
a phila thipula mabanza maku madi !
6 Wukambulu diela kasi zaba ko
vungisi kalendi sudika ko,
7 muingi ka diambu ko batu bambimbi banyunduka banga biti,
ayi batu boso bamvanganga mambimbi bammonanga mamboti ;
bela bungu mu zithangu zioso.
8 Vayi ngeyo Yave widi wuyayusu mu zithangu zioso.
9 Bukiedika bambeni ziaku, a Yave,
bukiedika bambeni ziaku ziela biva
bisadi bioso bieti vanga mambimbi
biela sasukusu.
10 Vayi ngeyo wela yayisa phokꞌama
banga phoka phakasa.
Mafuta mamosi ma kitoko mandukudulu.
11 Buna meso mama mamona mbedosolo yi
batu bobo beti kundenda ;
makutu mama mawa biyoko bi batu bambimbi bantina,
bobo beti kundenda.
12 Batu basonga bela mona mamboti banga diba,
bela yunduka banga sedeli wu Libani ;
13 bakunu mu nzo Yave,
bela mona mamboti mu ziphangu zi Nzambi eto ;
14 bela buta mimbutu banza mu bununu buawu bu ngolo ;
badi kaka banlangu ayi meza ma nlangu madi yawu.
15 Mu yamikisanga Yave widi wululama
Niandi ditadi diama ayi mambimbi masi ko mu niandi.