10
1 A bakhomba, lukanu lu ntimꞌama ayi lomba ku ndieta lomba kuidi Nzambi mu diambu di bana ba Iseli luidi mu diambu bavuka.
2 Bila ndieti kuba telimina kimbangi ti babeki bufula bu ngolo mu diambu di Nzambi, vayi bika boso buididi nzayilu.
3 Bila basi zaba busonga bu Nzambi ko vayi beti tombanga bu kitudulu basonga mu busonga buawu veka ; bamanga kuawu tumukina busonga bu Nzambi.
4 Bila Klisto niandi tsukusunu yi Mina muingi woso mutu weti wilukila kakituka wusonga.
5 Bila Moyize wusudikisa busonga buntotukilanga mu minu ti : woso mutu wela sadila mambu mama, wela zingila mu mawu.
6 Vayi tala buntubanga busonga bobo buntotukilanga mu minu : Kadi kukiyuvula mu ntimꞌaku ti : nani wela kuenda ku Diyilu e ? Bu dinsundula ti : Klisto kasia kuluka ko e ?
7 Voti : Nani wela kuluka ku diyenga e ? Bu dinsundula ti : tombula Klisto mu bafua.
8 Vayi mbi dintuba e ? Mambu ma Nzambi mafikimini ; madi mu munuꞌaku ayi mu ntimꞌaku.
Mambu mama madi mambu ma minu ayi mawu tueti longa.
9 Bila enati wunkikinina mu munuꞌaku ti Yesu niandi Pfumu, ayi wunwilukila mu ntimꞌaku ti Nzambi wumfulukisa mu bafua, buna wela vuka.
10 Bila woso mutu wunwilukila mu ntima, wela kitulu wusonga ayi mutu wunkikinina mu munu andi wela tambula phulusu.
11 Bila masonoko meti tuba ti : Woso mutu wunkunwilukila kalendi fua tsoni ko.
12 Bila kadi luviakunu vasi ko va khatitsika Nyuda ayi muisi Ngelese bila baboso Pfumu yimosi badi. Pfumu beni widi nkua kimvuama kuidi babo bobo beti kunsambila.
13 Bila woso mutu wela sambila dizina di Pfumu wela vuka.
Iseli kasia ba minu ko
14 Vayi buevi balenda sambidila mutu wowo wubasia wilukila ko e ? Buevi balenda wilukila mutu wowo basia wila zitsangu ko e ? Buevi balenda wila mu kambu mutu wunlonga e ?
15 Ayi buevi balenda longila enati basia tumu ko e ? Banga bu masonimina :
A nga phila kitoko madi malu ma batu bobo bansamunanga Nsamu Wumboti.
16 Vayi baboso basia tumukina Nsamu Wumboti ko. Bila Ezayi wutuba ti : A Pfumu, nani wuwilukila malongi meto e ?
17 Diawu minu kieti kuizila mu mambu momo tueti wa ayi momo tueti wa meti kuizila mu mambu ma Klisto.
18 Vayi minu thubidi : basia wa ko e ? Nyinga, bawa kuawu bila dusonama ti :
Zimbembo ziawu ziwakana va ntoto wumvimba
mambu mawu mayenda nate mu zitsongi zi nza yimvimba.
19 Vayi minu thubidi : Iseli kasia zaba ko e ? Va theti Moyize wutuba :
Ndiela ku lukitula bankua kiphala
mu nzila yi dikanda dikambulu dikanda ;
ayi ndiela kulufuemisa mu nzila yi dikanda
dikambulu diela.
20 Ezayi wuba bukhafi bu katuba ti :
Minu ndibakulu kuidi batu bobo bakambu ku thomba,
ndikimonisa kuidi bobo bakambu ku mbela mayindu.
21 Vayi mu diambu di Iseli, niandi wutuba ti :
Mu lumbu kimvimba, ndinonuna mioko miama
kuidi batu bakambu tumama ayi kuidi bankua matingu.