BOSO BUIDIDI ISELI MU NSAMU WU PHULUSU
9
Mabanza ma Polo mu diambu di basi Iseli
1 Mambu ndituba mu Klisto madi makiedika ayi ndikadi vuna. Mayindu mama ma ntima meti kuthelimina kimbangi mu Pheve Yinlongo :
2 ti kiadi kingolo kidi yama ayi phasi yika yilendi suka ko yidi yama mu ntima.
3 Bila minu veka nditomba singu kuidi Nzambi ayi vambana ayi Klisto mu diambu di bakhomba ziama, bibutu biama bi dikanda.
4 Bawu badi basi Iseli, bobo bakitulu bana bandi ayi bavuidi nkembo, zinguizani, dikaba di tambula Mina ; tsambudulu yi kiedika ayi zitsila ;
5 bawu bavuidi bakulu. Mu kimutu, Klisto wutotukila mu bawu : Niandi wunyadila bima bioso. Nzambi niandi wunsakumunanga mu zithangu zioso. Amen.
Iseli dikiedika boso buididi tsobodolo yi Nzambi
6 Bika sia ti mambu ma Nzambi mabedoso bila baboso batotukila mu Iseli basiko basi Iseli.
7 Bobuawu, babo badi mu nkuna Abalahami basi ko bana bandi. Bila Nzambi wukamba Abalahami : Mu Isaki kaka muela totukila nkunꞌaku.
8 Bu dinsundula ti : bika sia ti bana bobo babutukila mu kinsuni bawu bana ba Nzambi, vayi bobo babutukila mu tsila bawu bantangulungu bana ba nkuna.
9 Bila mambu mama madi mambu ma tsila : Mu tsungi yayi ndiela kuiza ayi Sala wela buta muana wu bakala.
10 Bika sia ti mambu momo kaka vayi buawu bobo mu Lebeka, mutu wowo wubutulu bitsimba kuidi dise dimosi, nkulu eto Isaki.
11 Bila tuamina bitsimba bibutuka ayi buna bavengi ko kadi diambu dimosi di mboti voti di mbimbi mu diambu di dedikisa tsobodolo yi Nzambi ; bika sia ti mu diambu di mavanga vayi mu diambu di mutu wowo wutela ;
12 niandi bakamba ti : nleki wela yadila nkulutu.
13 Banga bu disonimina : minu ndizola Yakobi ayi ndilenda Esawu.
Nzambi widi wusonga wumvanganga mambu moso katidi
14 Buna mbi tutuba e ? Nzambi kasi wusonga ko e ? Nana buawu ko.
15 Bila niandi wukamba Moyize :
Minu ndiela monina kiadi woso mutu thidi mona kiadi.
Ayi ndiela vangila mamboti kuidi woso thidi vangila mamboti.
16 Momo masi ko mu diambu di luzolo lu mutu voti mu diambu di zingolo zi mutu vayi madi mu diambu di Nzambi wummonanga batu kiadi.
17 Bila mu masonoko Nzambi wukamba Falawo ti :
Mu bila kioki minu nditotula muingi ndimonisa lulendo luama mu ngeyo ; muingi dizina diama diyamukusu va ntoto wumvimba.
18 Diawu niandi weti mona kiadi woso mutu katidi mona kiadi ayi weta kitula mfua matu woso mutu wu kazodidi.
19 Buna ngeyo wela kukhamba : bila mbi kakidi tubidilanga e ? Bila nani wulenda kakidila luzolo luandi e ?
20 Mutu, ngeyo widi nani mu findana ziphaka ayi Nzambi e ? Kima kivangu kilenda tuba kuidi mutu wuvanga kiawu ti : “Bila mbiwuphangila buabu e ?”
21 Mbumbi kasi ko minsua mu vanga mu tuma tumosi nzungu yi nzitusu ayi yinkaka yikambulu nzitusu e ?
22 Buna mbi wulenda tuba enati Nzambi, bu kazola monisa nganzi andi ayi monisa lulendo luandi, wuvibidila mu thangu yinda zinzungu zituma zi nganzi zikubuku mu bivusu e ?
23 Bosi mbi diaka wulenda tuba enati Nzamni wuvanga buawu mu diambu di monisa kimvuama ki nkemboꞌandi mu zinzungu zituma zi kiadi zikakubika tona thama mu diambu di nkembo e ?
24 Bila beto katela, bika sia ti muidi Bayuda kaka vayi ayi mu Bapakanu.
25 Banga bu katubila mu nkanda Oze :
Bobo basia ba batu bama ko,
ndiela ku batedila “batu bama”
Nketo wowo wusia ba kiluzolo kiama ko,
ndiela kuntedila kiluzolo.
26 Va buangu kioki baba kambila ti : “beno luisi batu bama ko” vana bela ku batedila : “bana ba Nzambi yi moyo.”
27 Ezayi wutuba mu diambu di Iseli ti :
Enati thalu yi bana ba Iseli yilenda dedakana banga nzielo yi mbu,
ndambu yela siala yawu kaka yela vuka.
28 Bila mu nsualu ayi mu bufuana Pfumu kela
zengila mambu va ntoto.
29 Banga Ezayi bu katuama tuba :
Enati Pfumu yi minkangu mi masodi kasia kutubikila
ndambu wu nkuna wu batu ko,
nganu tudedakana banga basi Sodoma ;
nganu tuba banga basi Ngomola.
Mutu wunkitukilanga wusonga mu minu vayi bika mu Mina
30 A diambu mbi tutuba e ? Bapakanu, bankambu kuawu landakananga busonga babakudi busonga ; busonga bobo buntotukilanga mu minu.
31 Vayi Iseli bu kalandakana Mina mu diambu di ba wusonga kasia tula ku Mina beni ko.
32 Bila mbi e ? Bila Iseli kasia kumilandikinina ko mu minu vayi mu mavanga. Babumina thutu mu ditadi,
33 banga bu masonimina :
Tala, minu thudidi ditadi mu Sioni
ditadi di mbumina batu thutu
ayi ditadi dinneni di mbuisa batu ;
vayi woso wunkunwilukila kalendi fua tsoni ko.