Yook 57
Yook ambo bi ye karub yeman. “Monmaraib” andi ye yook ye kiwaan yaambed wingki yeman. Miktam ye yook Dewidbed wongkoon. Saul yaa kombiri wenene aangko dem aom biknoon kumbed wongkoon.
1 Mimyob keewe. O God, mimyob keewe.
Komoyiibkob, ebbed kukbimaabbon aombed dobirimain.
On ayam yu dongkon dem areb ebbed kukbimaabbon aombed dobaraniine
wene neene monmari yaron dowan keranuun.
2 Korem Burudandoon Arimbed Ye God yaa baandimain,
ne dowad dowakeniib kere ambangkaane idiib kerimaan ye God yaa kui.
3 Yembed Ewen arimbed inanduwe ne nen burudande angka kowimaan,
ne nande kerewenmo yarimaibdan yaa ongkandimaan.Selah
Godbed ye womoniyiibban ye mimyob dowaken keewimaan kwane ye weng ne dowad yedme kowoon kuu korondimokban awinimaan.
4 Ne kuu laiyon yi kidaom keraana kanawanewandiwen kii.
Kwane ne kuu karub yeene komkad animaib ye dingkan yi numun angkaan.
Kukuu ne bondan kui, yi ningkambo kuu maradiib anayiib yi arud areb,
kwane yi ong kuu kerewang ye arud areb.
5 O God, Ewen burudande ewaningko ariyiib kerok,
eb nambiri kuu okad korem yaa yurok.
6 Ne bondan kuu ne yon dowad oon bi ye men kande kiwaan yaa kurune kebenimaib,
kwane ne kuu miin kubiyiibban aromkonoyiibban keraan.
Yimbed ne kiwaan yiri kuu dem nidkiwen kumban,
yika yikareb yi dem nidkiwen yiri kirobiwen.Selah
7 Ne niindem aom kuu kiringmiyiibban kangdommo,
o God, ne niindem aom kuu kiringmiyiibban kangdommo kui.
Ne kuu yook wingkeni kuwengiib ongmaniin.
8 O ne kingkin, yaro dembe!
Haap yoom laiya yoom yaro dembime!
Yiiwiib wangke wingkani aron kakmendaniine awawini nambere wananuun.
9 O Yariman, ne kuu ambibkin korem aombed ewaningko kankoonaniin,
kwane ne kuu ambibkin maa maadan aombed eb dowad yook wingkaniin.
10 Amborom kuu eb womoniyiibban ye mimyob dowaken kuu miin darewoob kai,
kukuu kawene Eweniib badmene durunoon,
kwane eb anam anam kuu ambid ariyiib kawene badmene durunoon kii.
11 O God, Ewen burudande ewaningko ariyiib kerok,
eb nambiri kuu okad korem yaa yurok.