Yook 59
Yook ambo bi ye karub yeman. “Monmaraib” andi ye yook ye kiwaan yaambed wingki yeman. Miktam ye yook Dewidbed wongkoon. Saulbed Dewid aye kowime ande karub ben nongkoboona wene ye ambib yaa kerenombiriwen kumbed wongkoon.
1 O God, ne bondan yaambed ne nen burudande angka kowe.
Ne yaa manmo keriwendan kuu ebbed dorondaruwe.
2 Arewa kamidan yaambed ne nen burudande angka kowe.
Kwane kuman yenbandidan yaa kuu ebbed dorondaruwe.
3 O Yariman, kedi, yi kuu ne nande bikne dibo meedmiib kuu wedme!
Naawonmo yenbandidan kuu ne dowad nuubnaan kamiib kii,
ne yi yaa ma wabkad kerindo o ma ambarakmindo kuned.
4 Ne kuu ma ambarakmindo kumban yi kuu ne nande nekwiwen.
Kowe, awawi dowad yaro dembe. Dabab ne yaa kee menebeen kuu wedme.
5 O ana nangmidan yemoon ye Yariman God, Israeldan yi God kui,
ebkareb yaro dembeneb ambibkin korem yaa dabab konde.
Kwane ambodangidan arewa yaa mimyob keendaab.Selah
6 Yi kuu oobne yaambed ika mene anon yi norin ningkiad kowemoon areb kerenib,
siti aom yenbandande onmenmo dewenebimaib.
7 Yi mongkodkono aombed wiin kami areb weng arewa menebe dakmimaib kuu wedme.
Yi ong kuu kerewang areb, arud weng dakmimaib kui.
Kwane yimbed yedmimaib, “God kuu nub weng wengambirimokban.” andimaib.
8 Kumban, o Yariman, ebbed yi yaa ambon kamendimaab,
kwane ambibkin koremdan kuyaa ambon baandimaab.
9 O God, ewaromkono kumbed eb yaa angkumone doriin,
eb kuu ne dore aromnimbon.
10 Ne God kuu ye womoniyiibban ye mimyob dowaken yaambed neyiib yaa mene durunewaneen.
Kwane yembed ne bondan burudande doraneene wedmaniin.
11 Kumban, o Yariman nub dorondandi ye karub, yi kuu bobmo yenbandaab.
Yeene nongkobaneeb kuu ne nimakarub kuu eb bondan yaa ukum kondewen kuu nonondandaniib.
Ewaromkonombed ben kubudere ongmendebko kirinwan yarime.
12 Yi mongkodkono aombed menebimaan kuu ambarakmi yeman,
yi weng dakmi kui, kuu kwamunemo kowe,
yi kerengkan kami kuyaambed yi arewa kami kuu korokbende.
Yi kuu budun kamiyiib dudanabiyiib dakmimaib kowe,
13 arud wande yenbandebko dowan kerime.
Kwane yenbandebko korem dowan kerime.
Kwananeeb kumbed okad yimin yimin yaa kuu yikaadkere
Godbed Yekob ye awoya ari yaa kuu oonimaan andaniib.Selah
14 Yi kuu oobne yaambed ika mene anon yi norin ningkiad kowemoon areb kerenib,
siti aom yenbandande onmenmo dewenebimaib.
15 Yi kuu animan anande kirinwe dewenebimaib,
kwane mikmonindo kerimaan kuu anon keeng areb kabang angkimaib.
16 Kumban ne kuu ewaromkono ye dowad yook wingkaniin,
kwane amkimo kuu eb womoniyiibban ye mimyob dowaken ye dowad kube wingkaniin,
amborom kuu eb kuu ne dore aromnimbon,
kwane dabab ne yaa menebimaan kuu ebbed kukbimaabbon aombed dobirimain.
17 O ne aromkono kawi ye karub, ewaningko kankoonaniin.
O God, eb kuu ne dore aromnimbon, eb kuu ne yaa womoniyiibban ye mimyob dowaken keewimaab ye God.