Yook 71
1 O Yariman, ebbed kukbimaabbon aombed dobirimain,
korondaawe ne yaa ma karak kawaib.
2 Eb yorokmo kerekmen yaambed ne nen burudande angka kowe.
Ne yaa eb kerendem kowe wengamberewe mene ne nen angka kowe.
3 Ne nen kukbimaabbon aombed aromne angkumoni ye karub kere.
Ewiib yaa mini ye kiwaan kuu ma kebeniyiibban kerok.
Eb kuu ne aromkonombon, eb kuu ne aromne angkumonimbon kowe,
ne dowad ye nen burudande angka kowa andi ye weng dakme.
4 O ne God, arewa kamenabidan yi dingki dem aom kuu ne nen burudande angka kowe,
yenbandi kuu yi iningkuk areb kerimaibdaniib yorokmombandaniib yaa kui.
5 O Yariman Ambengkan, ebbed kwananeeb ande meedme doriin,
kwane ne kewed yaambed mene kibikee eb yaamo angkumone doberembirimain.
6 Ne wooneen yaambed mene kibikee eb kuu ne yaa doreeb kowe yiminmo dobaraan,
kwane ebbed nena yu kabeyob aombed ne nen angkaderewen.
Ne kuu aron korem ewaningko kankoonimamaniin.
7 Yemoon yi indob arimbed ne kuu dud korokbi yeman areb keraan,
kumban eb kuu ne dowad kukbimbon aromkonoyiib kerewen.
8 Ne meeni aom kuu ewaningko kankooni ye inamenmo,
kwane aronki doboob kuu eb nambiri ye wengmo dakmembirimain.
9 Kiomnaniin kuu ne nen kan angka koraraab.
Aromkonoyiibban keraniin kuu domowaab.
10 Amborom kuu ne bondan kuu ne yaa manmo kere dakmimaib,
kwane ne dowad nuwaron keruko aye kowem andidan kuu nuubnaan kamiib.
11 Yimbed ne dowad kekamune dakmimaib, “God kuu ye yaa domonenoon.
Karub maambed ye nen burudande angka kowaanban kowe ye yoman kerenenmo yarenub awinenem.” andimaib.
12 O God, ambabbed dobaraab,
o ne God, awawi dowad kirod mene.
13 Ne yaa manmo keriwendan kuu karak konde monmare.
Ne yaa arewa keruwandamiibdan kuu
damangkande irinyonde aningkoyiibban kerunde.
14 Kumban ne kuu ebbed ari kwananeeb ande meedmembirimain, korondainban,
kwane ewaningko kankoonimain kuye inamen kuu kaine darewoob kere weneen.
15 Eb yorokmo kerekmen ye dowad daandembaraniin,
bobni yaa burundande bindi ye kiwaan ebbed ongmewen kuu ne kuu kumunkingkindeban kumban,
kuye dowad kuu aronki doboob daandembaraniin.
16 O Yariman Ambengkan, ebbed ewaromkonoyiib kwane ambangkanabewen kuu mene baande daandaniin,
kwane eb yorokmo kerekmen ye dowad baande daandaniin, ebmanmo kui.
17 O God, ne kuu ne kewed yaambed mene kibikee ebbed kedmengkawimaab,
kwane kuyaronbed mene kibikee binangke eb yaa anam andi yeman ongmenabewen kuu daandimain.
18 O God, kiomne wok bandaniin kuu domowaab,
kwane eb aromkonomo dobiri ye wengiib eb kuu korem burundandewen arimbed ye God ye wengiib kuu
ari ari ye nimakarub yaa daande dowan keraniin kumbed bobnaniin kuu yimin.
19 O God, eb yorokmo kerekmen kuu kwane kawene ambid aommo doroon,
o God, eb kuu kami miin darewoob ambangkanabewen kowe,
kane kuu eb areb keroon? Dowan!
20 Ebbed dabawiib durud yewediib yemoon ben ne bangkawewen kumban,
ongmewaneewe wadkeraniin,
kwane dem kongdem yiri areb dobaraan kumban,
ebbed ne ika nen kawene kowaneeb.
21 Ne kuu aningkoyiib kuned ebbed angkon naningko kuu darewoob arimbed keruweneb,
ne mimyob wandi kuu ika kankubunaneeb.
22 O ne God, eb korondiyiibban no awinembiri ye inamen awinimaab ye dowad,
haabbed wangke ewaningko kankoonaniin.
O Israeldan yi God Karadmo,
laiyambed wangke ewaningko kankoone wingkaniin.
23 Ewaningko kankoone wingkaniin kuu
komke kubaniin,
biddewen ye karub nembed kui.
24 Aronki doboob kuu eb yorokmo kamenabi kuu daandembaraniin,
amborom kuu kaneyambed ne nenbandandamiibdan kuu
karak kondene kerebkarab kerundoon kowe.