11
1 Guu tuby bniety racxú ni bdialá Lázaro. Laab cun de bzaanbɨ María cun Mart ná ladxdeb Betania.
2 (Ne María, bzaan Lázaro, laabɨy bguaazbɨ de nii Jesús cun perfum ax gusbizbɨdeni cun guichquiab.)
3 Pur ningui bxiaald María cun Mart rson lo Jesús, raipdebny:
—Dad, a xmigubiu Lázaro racxú.
4 Chi bindiag Jesús ziy ax guniiny:
—Guelracxúre quɨt zéedtini parzi quinxúni sino que par chalee iniá bniety guelrnabee xte Dios ne par iniázadeb guelrnabee ni nap Lliin Dios.
5 Masquɨ quesentiand rcaaz Jesús Mart cun María ne Lázaro,
6 per chi gudixteedeb lony dec racxú Lázaro, laany gucldaarulny stiop dxi rut zuguaany.
7 Chiyru raipny de xpɨnny:
—Gultoo nez Judea stuby.
8 Chiy raipy de xpɨnny laany:
—Maistrɨ, niclɨ gady gac xchi ni rcaaz de bniety Israel ni rbez nezqui niguinxú laabiu cun guia. Ne anre, ¿xínii rcaazbiu chiabiu nezqui stuby?
9 Ax raipy Jesús laadeb:
—Laat nántɨ dec tsɨbtiop hor rac tuby dxi. Ne belati rdxi icandzá bniety quɨtti riezgu ldapbɨ pur ni rguiaab nuu ni rzieeny lo guɨchliuré.
10 Per belati guxin icandzá bniety nuu riezgu ldapbɨ pur ni runlieedxbɨ bieenqui.
11 Ziyza raipy Jesús laadeb:
—A xmigunɨ Lázaro anayaaisy. Per anre chacuaaniab.
12 Chiy raipy de xpɨnny laany:
—Dad, belati araaisbɨ niy zelo dec ziacquɨb.
13 Per ni gunii Jesús zelo dec aguty Lázaro, ne de xpɨnny ax rlilodeb dec laany rniiny raaissib.
14 Chiyru gudixteldí Jesús lodeb raipny laadeb:
—Aguty Lázaro.
15 Per güenquɨ quɨt guzuguaatia ruy te pur par laat güenru ziy par chaldilaaztɨ nare. Anre gultoo choguiaanbɨ.
16 Chiy Mally ni raipdeb “Cuach”, raipbɨ iraru de xpɨny Jesús:
—Gultoo chonénny, te rut gatyny gatyzacnɨ.
17 Chi bdzɨny Jesús Betania rut ná ladx Lázaro, agac guc tap dxi ni bgaatsbɨ.
18 Ne Betaniaqui gaxzi ríian guɨdxqui par Jerusalén, zeczi chon kilómetro.
19 Ax zieny de bniety Israel güetixlodeb Mart cun María par quɨt ibinlaazdeb pur ni guty bzaandeb.
20 Chi gucbee Mart dec azeddzɨngax Jesús ax bdiiab par güechalobny. Per María biianacbɨ lizdeb.
21 Chiy raipy Mart Jesús:
—Dad, belrulati zuguaabiu rurén, quɨt niaitti bzaana.
22 Per nare nánna dec Dios snɨɨdxny laabiu irate ni inaabbiu lony.
23 Ax raipy Jesús laab:
—Teru ibíi ibány bzaanu.
24 Chiy raipy Mart laany:
—Guldícbiu, nare nánna dec sbíi ibánybɨ chi ibány irate de bɨnguty, dxi ni gún Dios guelgurtisy xtenny.
25 Chiyru raipy Jesús laab:
—Nare naa ni rsbány de bɨnguty, ne ni rguaad guelnabány bniety. Elquɨ ni chaldilaaz nare, masquɨ gatybɨ, per zapbɨ guelnabány nez lo Dios.
26 Ne irate de ni zeczi nabány belati reldilaazdeb naa, zapzadeb guelnabány nez lo Dios. ¿Ta reldilaazu ni caniia liú?
27 Mart ax cuaibbɨ:
—Reldilaazla, Dad. Nare reldilaaza dec laabiuy Crist, Lliin Dios, ni ná par gueed lo guɨchliuré.
28 Chi gulull gunii Mart ziy, ax güetɨdxbɨ beldbɨ María, raipbɨ laab dxiga:
—A Maistrɨ abdzɨny ne cabɨdxny liú.
29 Cuantpac bindiag María ziy, gueeldguilliú güesúb par zechalob Jesús.
30 Ne Jesús zeczi gady yiiutiny láani guɨdxqui. Zeczi zuguaany rut güechalo Mart laany.
31 Chiy de bniety Israel ni zuguané María par quɨt cuenzi ibinlaazbɨ, chi gunádeb gueeldguilliú zé María ax güenalddeb laab. Rlilodeb dec ruu xpaa Lázaro zeguunbɨ.
32 Chi bdzɨny María rut zuguaa Jesús, ax guzullibbɨ lony guniigab:
—Dad, belrulati zuguaabiu rurén, quɨt niaitti bzaana.
33 Chi guná Jesús ruun María cunru de bniety Israel ni zednéb, zecpaczaxnarul guzacny, quesentiand nalas bziienny
34 ax gunabdiidxny laadeb:
—Calí bcuaatstɨb.
Laadeb guniideb:
—Edaguiaabiu, caniábiu Dad.
35 Jesús biinny.
36 Chiy gunii de bɨny Israel:
—Gulguiaa caniát quesentiand bcaazny laab.
37 Per nuudeb guniideb:
—Bnietquɨy bsiac bslo tuby ciagu. Anre, ¿ladxa quɨt xi nialee niunbɨ par quɨt niaitti Lázaro?
38 Jesús quesentiand nalas bziienny chi gubiiny ruu baaqui. Ne tuby cuevɨy blliú de baa ax bdxii tuby guia ruuni.
39 Chiy raipy Jesús laadeb:
—Guldzɨcá guiac.
Per Mart, bzaan togulqui, guniib:
—Dad, ¿ta gati arldiadxabbɨ pur ni aguc tap dxi ni gutybɨ?
40 Jesús cuaibny:
—¿Ta gati guniia liú dec belati reldilaazu, snioo guelrnabee xte Dios?
41 Chiyru bdzɨcádeb guiaqui. Ax bguiaa Jesús nez llayabaa guniigany:
—Xtada, xtiosten laabiu pur ni abaanbiu cuend xtiidxa.
42 Nare nanchuua dec hórtisy runbiu cuend naa. Per rniia ziy pur de bniety ni zuguaa rurén par chaldilaazdeb dec laabiu bxiaaldbiu nare.
43 Chi gulull guniiny ziy, ax gurɨxtiany:
—¡Lázaro, bdiia láanquɨ!
44 Chiy bdiia Lázaro láani baaqui zectisy ni liiby de naab cun de niib cun de vend ni bduuibbɨ ne dxíi tuby panit lob. Chiyru raipy Jesús laadeb:
—Gulxaicquibɨ, ne gulsaan guiab.
(Mt. 26:1-5; Mr. 14:1-2; Lc. 22:1-2)
45 Parzi zienzi de bniety Israel ni baany company María, güeldilaazdeb Jesús pur ni gunádeb milagrɨ ni baanny.
46 Per nuudeb ax güetixteedeb lo de fariseu xi baany Jesús.
47 Chiy de fariseuqui cun de bxoz ni rnabee bdxasaadeb par dún xa gúndeb ax guniideb:
—¿Xa xquel idxannɨ an? Bnietquɨ zienzi de milagrɨ cayunbɨ.
48 Ne belati chalaa isaannɨ, ira bniety zeldilaaz laab. Chiy de gurtisy xte Roma zeeddeb par initlodeb xquiudoon ne naciony xtennɨ.
49 Per tuby saadeb ni lá Caifás bxozroo ni rnabee lo izqui laab guniib:
—¿Ta quɨt gántɨ
50 ne ta quɨt racbeet dec par dunnɨ güenru su gaty tubyzi bniety pur ira bniety Israel, xlat ni nitlo naciony xtennɨ?
51 Per Caifásqui quɨt guniitib ziy pur xgabzib. Pur ni náb bxozroo lo izqui, ningui bguaad Dios laab de diidxqui ax guniib dec Jesús gaty pur irate de bniety Israel.
52 Ne gati purzíti de bniety Israel sino que par gacdeb tubyzi cun irateru de xpɨny Dios ni nuu iduibte lo guɨchliu.
53 Ningui desde dxiqui baany de gurtisy Israel xgab quinxúdeb Jesús.
54 Parzi púrzi xgaats xquel cuandzá Jesús nez Jerusalén. Chiyru bdiiany nezqui ax güeny tuby guɨdx ni lá Efraín ni ná gax nez rut ná púrzi yiubiz. Ruy guzuguanény de xpɨnny.
55 Chi zeddzɨngax laní pascu xte de bniety Israel, zienguilliú de bniety guɨdx güe Jerusalén par gúndeb zec ni rnabee ley te gacniadeb nez lo Dios anste ni idzɨny pascu.
56 Ax candzadeb rguíilydeb Jesús, ne rnabdidxsaadeb laniudoroo xte Jerusalén:
—¿Xi rniit? ¿Ladxa zeedbɨ laní o la quɨt gueedbɨ?
57 De fariseu cun de bxoz ni rnabee gunabeedeb dec tutix ni nán calí zuguaa Jesús, ná par quixteedeb par chalee chanaazdebny.