12
(Mt. 26:6-13; Mr. 14:3-9)
1 Dzɨ xoop dxizy rieedx par pascu chi güe Jesús Betania rut rbez Lázaro ni gusbánny.
2 Ruy baandeb tuby xchi par Jesús. Ax bíu Mart laadeb, chiy Lázaro guzubné Jesús lo mɨlly cun de xpɨnny.
3 Horqui bedné María zecti mɨdy litrɨ perfum ni sac guyally pur ni gucchuuni púrzi cun nard ax bslob perfumqui de nii Jesús. Chiyru gusbizbɨdeni cun guichquiab. Parzi iduibte láani lizbɨ bldianaxy.
4 Chiy Judas Iscariote, tuby de xpɨny Jesús ni baany xgab gún entriagu laany, guniib:
5 —¿Xínii quɨt nitóob perfumquɨ pur chon gayuaa mɨly denari par niacnéb de prob?
6 Per Judas quɨt guniitib ziy pur ruub guelrsaa pur de prob sino que pur náb gubaan. Ne cun laznaab nuu bols mɨly ax rbaanbɨ ni rdeeddeb laab cuchuub.
7 Chiy raipy Jesús laab:
—Bsaanbɨ. Laab acachatexgab perfumquɨ nare par chi idzɨny dxi ni igaatsa.
8 Te pur de prob llillite zuguanétdeb, per nare quɨt suguanétia laat xchi.
9 Zienguilliú de bɨny Israel gucbee dec zuguaa Jesús Betania ax güedeb ruy, ne gati parzíti iniádeb Jesús sino que néza par iniádeb Lázaro ni gusbánny.
10 Parzi ax bdxadiidx de bxoz ni rnabee dec güenru quinxúdeb né Lázaro,
11 te pur causɨ laab zieny de bniety Israel agulelaaz laadeb pur ni areldilaazdeb Jesús.
(Mt. 21:1-11; Mr. 11:1-11; Lc. 19:28-40)
12 Zienguilliú de bniety güe Jerusalén par laní pascu. Ne chi bragueel deni gucbeedeb idzɨny Jesús Jerusalén,
13 chiy btiuudeb de lliiz ziny par güechalodebny, rbɨxtiadeb:
—¡Dios cayacnény dunnɨ! ¡Dichos bniety ni zéed pur Xtadnɨ Dios ni ná Rey xte Israel!
14 Jesús ax bdxialny tuby burreen gubeebny, par guc zec ni rnii lo xquiits Dios rut rnii:
15 Quɨt idxibtɨ de bɨny Sión.
Gulguiaa a Rey xtennɨ azéed,
beebbɨ tuby burreen.
16 Hórgaqui quɨt gucbeeti de xpɨny Jesús xi zelo ni cayacqui. Per chi bieepy Jesús yabaa, chiyru gucbeedeb dec pur laaniy rnii lo xquiits Dios ningui gudeedny ziy.
17 De bniety ni guzuguané Jesús chi gurɨdxny Lázaro par idiiab láani baa, deni gusbánny laab, de bnietqui beedeb diidx ni gunádeb.
18 Pur ningui bdiia zieny bniety güechalo Jesús pur ni bindiagdeb milagrɨ ni baanny.
19 Chiy de fariseu ax raipdeb saadeb:
—Gunáctɨ, xíteete zezati ni cadxannɨ. Gulguiaa caniát, irapac bɨny zanald laab.
20 De lo ira de bniety ni güe Jerusalén par btodeb Dios chi laníqui, guu tuby tiop de bniety griego.
21 Laadeb güebinuudeb Liby, ni zá guɨdx Betsaida ni ná nez Galilea, ax banlasdeb lob raipdeb laab:
—Dad, rcaaznɨ ininén Jesús.
22 Chiy Liby gudixteeb lo Andrés, chiyru iroptedeb güetixteedeb lo Jesús.
23 Jesús ax raipy laadeb:
—Abdzɨny hor par Bniety ni bxiaald Dios gac zec ni ná par gac.
24 Te pur rguixtiia lot, zecquɨ tuby llub belati quɨt cueni zélaa náni tubyzi, per belati cueni ax raczienni.
25 Elquɨ ni mazru ruu guelrsaa pur guelnabánytisy ni nuu lo guɨchliuré, zuu chi initbɨni. Per elquɨ ni mazru ruu guelrsaa xa xquel rcaaz Dios gúnbɨ masquɨ ni teedtisbɨ, per ziyza zapbɨ guelnabány par chazy cun laany.
26 Belati nuu ni rcaaz gún sirvɨ luaa, ná par zanaldbɨ nare ax rut suguaa, ruy suguaazacbɨ. Ne ni gún sirvɨ luaa, subyaa Xtada Dios laab.
27 ’Angapacré quesentiand nalas rziienia. Per quɨt xo iniitia: “Xtada, bldábiu nare lo guelziiré”, te pur parpac ziy zelda.
28 Ningui rniia: Xtada, bliuubiudeb guelrnabee xtenbiu.
Chi gunii Jesús ziy ax bíeny rsee Dios llayabaa, guniiny:
—Abliuuadebni, per sbíi iliuuadebni stuby.
29 Chiy de bniety ni zuguaa ruy guniideb dec guziuuy gunii. Per stuudxdeb ax gunii:
—Tuby ánglɨy guniné laany.
30 Chiyru raipy Jesús laadeb:
—Gati par naretia bíeny rsee ni guniiqui sino que par laat.
31 Te pur abdzɨny hor ni yíany xa ná xgab bɨnguɨchliu ne abdzɨny horza ni aquɨtru inabeeti bɨndxab lo guɨchliuré zec ni canabeeb an.
32 Ne chi abcuaadeb naa lo cruzy, chiyru iralozy bɨnguɨchliu azeldilaaz nare.
33 Ziy xquel gudixteeny xa xquel gatyny.
34 Chiy cuaby de bniety lony:
—Dunnɨ nánnɨ dec lo ley rnii, Crist quɨt chúuti dxi gatyny. Anre, ¿xínii rniibiu dec Bniety ni bxiaald Dios ná par icuaadebny lo cruzy? ¿Túza bnietqui rzeetbiu chi rniibiu Bniety ni bxiaald Dios?
35 Chiyru raipy Jesús laadeb:
—A stuudxzi zuguané bieenré laat. Ningui gulchanuuny lalzi zuguanény laat, te par quɨt xi sacantɨ. Te pur ni zé nez rut nacay niclɨ quɨt gánbɨ calí nezqui zéb.
36 Anre lalzi zuguané bieenré laat, gulchaldilaazny te par chalee gactɨ de xpɨnny.
Chi gulull gunii Jesús ziy, chiyru zégacny rut quɨt tu idxial laany.
37 Masquɨ zieny milagrɨ ni baany Jesús nez lodeb, per quɨt nialdilaaztidebny
38 pur ni ná par gac zec ni bcuaa profet Isaías, te pur laab bcuaab:
Dad, quɨt tu reldilaazti ni rniin pur laabiu.
Quɨt tu racbeeti dec pur guelrnabee xtenbiu zienzi ni aguc.
39 Pur ningui quɨt nialdilaaztidebny. Ne ziyza bcuaa Isaías:
40 Laadeb nádeb zec tuby ni quɨt rianlo
o ni quɨt racbeeza pur ni abcay xquelriendeb
par quɨt yaicquideb cun nare par gúna perdóndeb.
41 Isaías guniib ziy te pur desdɨ chiy gunáb guelrnabee xte Jesús ax guniib ziy pur laany.
42 Per zieny de bniety Israel güeldilaaz Jesús, axt néru tuby tiop de ni rnabee güeldilaaz laany. Per quɨt niziruutideb ziy lo bniety pur ni rdxibdeb dec aquɨtru isaanti de fariseu yiiudeb yudoo.
43 Te pur mazru bdxalaazdeb izubyaa bniety laadeb que yanzaacdeb nez lo Dios.
44 Jesús guniiny diip:
—Elquɨ ni reldilaaz naa, gati nareztia reldilaazbɨ sino que néza ni bxiaald nare.
45 Ne ni caguiaa nare, caguiaazacbɨ ni bxiaald naa.
46 Nare naa bieeny par bniety guɨchliu. Zelda lo guɨchliuré te par tutix ni chaldilaaz nare, quɨtru chanuutib nez mal.
47 Belati nuu ni rindiag xtiidxa ne quɨt runbɨ cuendni, gati naretia ná ni gúna castigubɨ, te pur quɨt zeldtia par gúna castigu bniety sino que par gúna perdón.
48 Elquɨ ni quɨt rcaaz nare ne quɨt runbɨ cuend xtiidxa, anuu ni gún castigu laab. Lagac de diidx ni aguniia, laadeni gúndeni castigu laab chi idzɨny dxi.
49 Te pur gati pur xgabzitia caniia ni caniia sino que Xtada Dios ni bxiaald nare, laany aguniiny ni iniia ne ni iseeda bniety.
50 Ne nare nánna dec pur xtiidx Xtada, zap bniety guelnabány par chazy cun laany. Pur ningui caniia zectisy ni gunabeeny nare iniia.