5
Ka Pedruha bedaxxuke ixeni belha
(Mt. 4:18-22; Mr. 1:16-20)
1 Ttu lidú do Jesús‑ni ro'o indatoo ge Genesaret. Yalhá ixe ka benne tupa niha, axtaba rukí ya'ake bie de raka leke iyienkanie ka tisa ge Tata Do Yebáha.
2 Nianna bilani Jesús‑ni chupa ka barcu dákana ro'o indaha. Lanú nu tee lhe'ekani, kumu ka benne rudaxxuke belhaha si ugwadilake rigíke ka yexxa gekeha.
3 Jesús‑ni nna ugwapie lhe'e ttu ka barcuha nna unnabe len Simón nu anka xxana barcuha kini usigana nuha a latti lhe'e indaha. Nianna tti udoe lhe'e nuha. Niha‑liba doe nna uduloe rule'enie ka benne tupa ro'o indaha.
4 Tti chi beyaka unneeha, nianna ree Simón‑ni:
―Uche barcu‑ni ata re idila inda‑na nna gwaludelha ka yexxa gele‑na kini udaxxule belha.
5 Simón‑ni nna bekabina, rane:
―Betuelaba uyu'utu sina xa tata, nurula biyaxxuintu. Ttaka ganna aná ra kwinalu nna udelhachua ka yexxa‑ni.
6 Atti beyalhikana ka yexxaha nna desá tíba belha lhe'e ka nuha. Chi tteba isúkana.
7 Nianna bettá nákani uxikana adíru ka nu se'e lhe'e attu barcuha kini ugía ka nuha nna bete nákani lenkana. Laxkala ixpaba ka barcuha besá tíbakana belha. Chiba ruinkana xxudikana lhe'e indaha kumu de dedá xxattakana idi'i.
8 Tti bilani Simón nu tegaba láni Pedro, tti chi bilenna nu chi ukaha, nianna tti bedú xibini arlo Jesús‑ni nna rane:
―¡Ubi'etta kwe'a xa tata! Kumu neti ttu nu runi tulhaba ankaa.
9 Aníha rana kumu lana lhe adíru ka nu se'e lennaha yalhá bebanakinna de bedaxxu xxattakana belha.
10 Aníha‑gaba gwate Jacobo‑ni lhe Juan‑ni lhe. Ka nuha ankakana ka xi'in Zebedeo‑ni. Lakana ribengabakana turo'o len Simón Pedro‑ni. Ttaka Jesús‑ni nna rabie Simón Pedro‑ni:
―Bittu gasinlu. Debá nnanna nna labíru udaxxulu belha; ka bennela chi dhulolu gaxilu kini udaxxuke neda ge Tata Do Yebáha.
11 Nianna tti bebeakana ka barcuha ro'o indaha nna bese'e bixxikana ka nuha nna dia ttebakana danalhakana Jesús‑ni.
Jesús‑ni beyonie ttu benne raka latie yiesu nu tee láni lepra
(Mt. 8:1-4; Mr. 1:40-45)
12 Ttu sá do Jesús‑ni lhe'e ttu ka yiesi se'e niha. Niha bisin ttu benne biyú sia xxatta latie yiesu nu tee láni lepra. Tti bilen benneha Jesús‑ni nna bere tteba loe lo yu nna unnabe len Jesús‑ni, ree bie:
―Tata xisi to, ganna lu aka lelu, gwadaabalu eyoinlu neti.
13 Nianna tti belhí ná Jesús‑ni utane lati benneha nna ree:
―Gwaka galá lasia. ¡Nnanna, chinka beyaka!
Loora rinne Jesús‑ni nna betúa tteba yiesuha lati benneha.
14 Nianna tti ra Jesús‑nie:
―Anuttu nu galu. Beyyala gwatso du arlo bixxudiha nna bete úna nu daa lolu utelu ge Tata Do Yebáha de chi beyarilu. Beni attiba raba lo bia bennabi bodha'an Moisés‑ni. Aníha kini uyú lo ka benne deki chiba betúa isagwe‑na latilu.
15 Ttaka meskiba besuna Jesús‑ni nna adíla ugwadhi tisa ge nu runieha. Laxkala ixe ka benne ritupake kini rudo nagake gebie lhe ki reyonie ke ge bixaba isagwe ridakake.
16 Jesús‑ni nna reru'une ata anuttu benne risatsa kini rilhapie tisa len Tata Do Yebáha.
Jesús‑ni beyonie ttu benne daa yatti latie
(Mt. 9:1-8; Mr. 2:1-12)
17 Ttu sá do Jesús‑ni rule'enie ka benne ka tisa ge Tata Do Yebáha. Niha‑gaba betetse'e ttu chupa ka fariseo‑ni lhe betetse'egaba ttu chupa ka nu rule'ekinna ka benne nu ra lo bia bennabi bodha'an Tata Do Yebáha len Moisés‑ni, ka nu daba lhe'e iyába ka yiesi to se'e daka Galilea‑ni lhe daka Judea‑ni lhe ka nu daba lhe'esi Jerusalén‑ni lhe. Jesús‑ni nna, kumu de du Tata Xisiha lenbie, de nuha nna tsitsiba ra lebie reyonie ka benne rani.
18 Nianna bisin ttu chupa ka nubiyú chekana ttu benne daa yatti latie xuakinne lo ttu breta. Ruinkana uga'akana benneha lhe'e yo'o ata du Jesús‑ni kini sattixxakana benneha arloe.
19 Ttaka de abí galá anka gaxa ga'a lenkana benneha kumu de tupa xxatta ka benne ro'o yo'oha, aníoka nna ugwapi lenkana benneha iki yo'oha. Utuakana ttu chupa ka texa ki udo belea nna ulhidakana benne xua lo bretaha lagwi ge ka benne saa niha. Aníha benkana kini bisine arlo Jesús‑ni.
20 Tti bilani Jesús‑ni gwa riaba leke deki gwadaabe eyonie benneha, nianna ree benne raniha:
―Nnanna chiba bixú elha xen lasi ge ka tulha gelu‑na xa nubiyú.
21 Ka nu rule'ekinna ka benne nu ra lo bia bennabi bodha'an Moisés‑ni lhe ka fariseo‑ni lhe belaba lhi'u lekani, rakakinna: “¿Nú anka nubiyú du‑ni nna rilhida gaana Tata Do Yebáha? Sunruba benneha gwa raka gebie ridíe elha xen lasi ge ka tulha ruin ka benne.”
22 Ttaka Jesús‑ni nna ute dábanie nu rulaba lekaniha, nianna unnaba tise, ree kana:
―Lebi'i, ¿beaka rulaba lele aná?
23 Gwalinnáchu, ¿bí nuha nu sattiru innári'i? ¿Si innári'i: “Chiba bixú elha xen lasi ge ka tulha gelu‑na” ak? o ¿innári'i: “Beyadha nna bedá”?
24 Ttaka nnanna chi ula'ania le kini uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne.
Nianna tti ree benne daa yatti latieha:
―Lu, rulisaa lu. Beyadha nna bodaxxu breta xualu loin‑na nna beyya lisilu.
25 Looraha nna beyadha tteba benne biyúha arlo iyába ka benne se'e niha nna bodaxxue breta nu uxue loniha. Nianna tti deyye lisieha, rulhe ree:
―¡Xxeniba ra le Tata Do Yebáha!
26 Iyába ka nu se'e niha bebanabakinna nna itú rasibakinna, rákana:
―Xxeniba ra le Tata Do Yebáha. Nasá chi bilenri'i uka ka elha tsagwi.
Jesús‑ni raxie Leví‑ni kini sanalhane
(Mt. 9:9-13; Mr. 2:13-17)
27 Iki de nuha nna beria Jesús‑ni lhe'e yo'oha, nianna bilánie ttu gwekixa dona ata rukixakana belhiu nu daa lo ka benne rigixake ge Roma‑ni. Nu anka gwekixaha tee láni Leví. Nianna tti ra Jesús‑ni na:
―¡Utá, betenalha neti!
28 Nianna udú lii Leví‑ni nna bedhá bixxi ikini sina ruinnaha nna gwanalha ttebana Jesús‑ni.
29 Delola nna ben Leví‑ni ttu laní ge Jesús‑ni lhe'e lisiniha nna ixeru ka gwekixa lhe adíru ka benne lhe use'ekana lenke go yetta.
30 Ttaka ka fariseo‑ni lhe anágaba ka nu rule'ekinna ka benne nu ra lo bia bennabi bodha'an Moisés‑ni, udulokana rulisakana ka benne rudhetini Jesús‑ni, rákana ke:
―¿Beakala lebi'i nna ri'a robale len ka gwekixa‑na lhe len ka nu ruin satsa‑na lhe?
31 Ttaka Jesús‑ni nna bekabie gekani, ree:
―Ka nu abittu rani‑na, ka nuná labí riyasakinna nu eyoinna kana, sinuki ka nu rani‑na nuná riyasakinna nu eyoinna kana.
32 Neti laa dagaa raxia ka nu runi nu dika ixú, sinuki dalaa raxia ka nu ruin satsa, kini odúna kana nna odaxxukana neda ge Tata Do Yebáha.
Jesús‑ni rigixxi'abie nuka utte ubina lhe'e ka benne
(Mt. 9:14-17; Mr. 2:18-22)
33 Nianna rákana Jesús‑ni:
―¿Beakala ka benne rudhetini Juan benne rugadi indaha lhe ka benne rudhetini ka fariseo‑ni, rutte xxatta ubina lhe'eke, labí roke yetta lhe rilhapike tisa len Tata Do Yebáha lhe? ¿Beakala ka nu rudhetinlu‑ni nna ri'a roba ka nuní?
34 Jesús‑ni nna bekabie gekani, ree:
―¿Laaba ganna labí aka gele uinle ki utte ubina lhe'e ka benne biyaxike ki tse'eke dha'aha ganna ttixka sa duba nu kwiti rutsá nániha lenke?
35 Ttaka ganna chi bisia sá itua nu kwitiha, anutturuna dho lenke, la'anialiba nna chi utte ubina lhe'e ka benne se'e dha'aha.
36 Utixxi'agabanie kana ttu tisa. Aníha benie kini utte dákana bí diani nu raka lebie kixxi'anie kanaha. Nianna tti ree:
―Lanú ttu benne do richúe salha'a ro'o xo kubi geeha nna otábie na ro'o xo yaxxuha, kumu ganna aníha unie, la'ania nna utse'e loobe xo kubiha. Anágaba nna lari kubiha laa gwetogin nuha edúna ro'o lari yaxxuha.
37 Nigaba lanú ttu benne do rige'e vinu kubi lhe'e ka yieti yaxxu, kumu ganna aníha unie, la'ania nna vinu kubiha, ganna chi galana nna itsúba nuha yietiha. La'ania nna ilaliba vinuha lhe tse'e loogaba yietiha lhe.
38 Laxkala teeki ka'ake vinu kubiha lhe'e ka yieti kubi.
39 Nigaba lanú ttu benne do ri'e vinu yala, delo nna ede'ogaba lebie i'iye vinu kubi, kumu ree: “Vinu yala‑na nuná ri'aru ixí.”