4
Gucladzy bêndzab ntzoo Jesúz ni ne me
(Mt. 4:1-11; Mr. 1:12-13)
1 Byruu Jesúz coo guiagü-Jordáṉ, nu Spirt-Sant leeme; no güiyno Spirt gahc leeme lo yu-bihdzy.
2 Güyuꞌ me uga leññ cuarent dzé, no ne bêndzab nwieꞌ bâḻ beeiy nquihly me Jesúz ntzoo mod-ra me lee. Nehx güdahgü Jesúz mbehty leññ dze-wé. Güdedy dze-wé yahc, bylahn me.
3 Were ra bêndzab leeme:
―Bâḻ ulihbu Xiiñ Dioz lii, ptzoo mdad gac guie-rieꞌ paṉ.
4 Ra Jesúz leeme:
―Lo Guehtzy ru queꞌ xtiidz Dioz neu: “Dac‑e nunzy no paṉ rbahñ meññ, zehg rbahñ meññ no gyre xtiidz Dioz.”
5 Luxu, güiyno bêndzab leeme ihqy to dañ-suu par blu-güxuunn leeme nter guiedzylie ru rtzoo meññ mdad.
6 No ra bêndzab leeme:
―Naa gdedyaꞌ lgar ctzooy mdad nter guiedzylie ni galun lii, no gdedyaꞌ gyre ni rsahc ni nu lou, ycaꞌy. Dixchieñaꞌ we gyreu, naa zdedyaꞌnu nitisy dxu racdadzyaꞌ.
7 No bâḻ guisshibyiꞌ dloꞌn no gzacbeeiyiꞌ naa, xchieñiꞌ we gyreu.
8 Were ra Jesúz leeme:
―Byruu de neꞌ, bêndzab, porni lo Guehtzy ru queꞌ xtiidz Dioz neu: “Bzacbeeiy Dioz ni rtzoo mdad lii, no ptzoo nunzy ni ne me.”
9 Luxu, güiyno bêndzab leeme ihqy idoró Jerusaléṉ ru ma nsuu, no ra leeme:
―Bâḻ ulihbu Xiiñ Dioz lii, güyubeꞌ lo yu.
10 Porni lo Guehtzy ru queꞌ xtiidz Dioz neu:
Cshahl Dioz x‑ángel me ni gyla yahc lii.
11 Glesy yâme lii lo ña yâme,
lehdy di ctzuné guie nieꞌy.
12 Ra Jesúz leeme:
―Lo Guehtzy ru queꞌ xtiidz Dioz neu: “Di gnabiꞌ behch lo Dioz ni rtzoo mdad lii nunzy par güieꞌy bâḻ ctzoo me ni neꞌy.”
13 Hor-bwieꞌ bêndzab ba di ñaḻ nquihly me Jesúz ntzoo mod-ne me, byrusytzu me de lee doozy dzé.
Guzlo Jesúz xtziiñ me Galilea
(Mt. 4:12-17; Mr. 1:14-15)
14 Luxu, gubyguiat Jesúz lo ṟegioṉ-Galilea, guzlo me gatzoo me xroꞌ cos porni nu xiSpirt Dioz leeme, no gayu meññ diidz de leeme byzaꞌzy.
15 No za me idoo cad to guiedzy, galuu me meññ xtiidz Dioz no gyre yâme rguguia leeme.
Nu Jesúz guiedzy-Nasaret
(Mt. 13:53-58; Mr. 6:1-6)
16 Bydzihñ Jesúz Nasaret, guiedzy ru byniꞌzy me; no güya me idoo dze-risladzy meññ‑Isṟael, mod-rtzoo gahc me. Ru guzli me lehdy guuḻ me lo Guehtzy ru queꞌ xtiidz Dioz,
17 bdee yâme leeme xguehtzy profet-Isaíaz. Pshal me lou, no bydzial me ru ganii ne:
18 Nu xiSpirt Dioz naa,
porni Dioz güle me naa lehdy csieññaꞌ meññ-pobr xtidz-mos me.
Pshahl me naa lehdy gacnon meññ ni gyrehzy gazacno xtâ leññ xguîlmbahñ,
no gapyaꞌ meññ ni zidguiahc beeiy ni nu lidzyguiib bia mód beeiy gylaa yâme de lo ni nadz;
no cshalaꞌ lo meññ-ngaḻ yahc;
no guislaan meññ ni gazaczi yahc.
19 No csieññaꞌ meññ ba bydzihñ tiémp ni güle Dioz lehdy gacno me meññ ni gyo leeme.
20 Bylux biiḻy me lo Guehtzy ru queꞌ xtiidz Dioz, ptohby meu sto, no bdee meu mpyquie ni rtzoo dziiñ leññ idoo. Luxu, gürie me. Gyre meññ-dxie leññ idoo gawiedzie yahc leeme.
21 Luxu, günii me, ne me:
―Dzêrieꞌ gahc‑e guhc ni ganii lo Guehtzy ru queꞌ xtiidz Dioz, ni bieññ laꞌd neꞌ.
22 Gyre yâme gaguguia leeme, no gatzunadz yâme xtiidz me porni mos mod-günii me. No ra saꞌ yâme:
―¿Dâs‑e leeme xiiñ José la?
23 Ra Jesúz leeyâme:
―Naa nannaꞌ ga laꞌd naa to didz-zaaby ni ne mod-rieꞌ: “Psiaḻ lii gahc, doctor.” Zegahc ga laꞌd naa: “Ptzoo ni ptzooy guiedzy-Capernaum neꞌ leññ xguiedzyiꞌ, güieꞌ nó.”
24 No ra me leeyâme zegahc:
―Gapyaꞌ laꞌd ni uli, to profet nehx rxilyno meññ lee leññ gahc xguiedzy.
25 No ni uli we nirieꞌ: güyuꞌ xtahl ngünaviud nacioṉ-Isṟael ba xtze, dze-mbahñ profet-Elíaz. No leññ tzonn iz-garuḻ ni di ñahc guio, güyuꞌ guîlrlahn uga.
26 Per di nshahl Dioz Elíaz nigüieꞌ ru nu yâme, mazyg pshahl Dioz leeme ru nu to ngünaviud guiedzy ni le Sarepta ni nu lo ṟegioṉ-Sidóṉ.
27 No zegahc dze-gübahñ profet-Eliseu, güyuꞌ xtahl meññ-Isṟael gayac-ure, gayudz lady yâme, per ni to yâme nehx biaḻ; nunzy biaḻ to mpyquie ni le Namáṉ, meññ-Siry leeme.
28 Hor-bieññ gyre meññ-dxie leññ idoo ni ganii me, bydziaꞌdzy yâme.
29 No güloo yâme leeme leññ guiedzy, güiyno yâme leeme ihqy dahñ ru dxie guiedzy-caḻ lehdy nlee yâme leeme leññ zaꞌn.
30 Per leeme güdedy me lahd yâme, no za me.
To mpyquie ni nu mbenahcsy lee
(Mr. 1:21-28)
31 Luxu za Jesúz sto guiedzy-le Capernaum ni nu lo ṟegioṉ-Galilea. Uga guzlo galuu me meññ cad dze-risladzy meññ-Isṟael.
32 No rtzunadz yâme mod-rluu me, porni rnii me zaꞌgndzi, mod-rnii to meññ ni rtzoo mdad.
33 Leññ gahc ido-wé dxie to mpyquie ni nu mbenahcsy lee, tohzy pquee me riedz, ne me:
34 ―¡Di guiaadiꞌ neꞌ ru nu noꞌ! ¿Bia ryohbyiꞌ no noꞌ, Jesúz ni nac meññ-Nasaret? ¿Ziaadiꞌ lehdy gniꞌdyiꞌ noꞌ la? Naa rzacloꞌn lii. Lii we ni nac Mpyquie-tziaawy ni Pshahl Dioz Lee.
35 Were ptzoo Jesúz mdad mbenacsy-caḻ, ra me lee:
―¡Güyudzie, no byruu gahc de mpyquie-rieꞌ!
Luxu, güdiñguie mbenahcsy mpyquie-caḻ lo yu ñaz-lo gyre yâme, no byruu gahcu leeme, no ba mbehty di ntzoou leeme.
36 Gyre yâme ptzunadz, no guzlo ra saꞌ yâme:
―¿Biahx diidz‑e rnii mpyquie-rieꞌ? ¡Xnahc‑e rnihzy me no rtzoo me mdad mbenahcsy, no rruu gahcu meññ!
37 No byzaꞌzy lo ṟegióṉ ru meññ ni rtzoo Jesúz.
Psiaḻ Jesúz suegyr Simoṉ-Pedr
(Mt. 8:14-15; Mr. 1:29-31)
38 Byruu Jesúz idoo, za me xiryuꞌ Simóṉ. Bydzihñ me, nash suegyr-ngünaa Simóṉ, xle-gue lee. Were ra yâme Jesúz:
―Racdadzy noꞌ nsiaḻiꞌ leeme.
39 Luxu gübigy Jesúz ru nash me, no ptzoo Jesúz mdad xle, ra me:
―¡Byruu de ngüna-rieꞌ!
No biaḻ gahc xixle me, no biahs gahc me, bdee me ni güee Jesúz no xmeññ.
Psiaḻ Jesúz xtahl meññ-gayac-ure
(Mt. 8:16-17; Mr. 1:32-34)
40 Naabz güyaaz ncübidz, güiyno yâme gyre meññ ni gayac-ure de gyre gyzasy guîlguihdz ru zu Jesúz; no pshob ña me chehsh meññ-gayac-ure yahc, no biaḻ gahc yâme.
41 No zegahc xtahl meññ güloo me mbenahcsy lee, no hor-garuu mbenahcsy, rquee yahcu riedz, ne yahcu:
―¡Lii we Xiiñ Dioz!
Were güdeḻy me mbenahcsy, no ba di ndeer me ñahz nnii yahc, porni nann yahcu leeme we nac Crist.
Gayuno Jesúz meññ xtiidz Dioz leññ idoo
(Mr. 1:35-39)
42 Byre guiaal‑e naꞌ, byruu Jesúz diby lad de leññ guiedzy, güya me ru ndruhty nehx nu. Per meññ guzlo yahc gayo leeme byzaꞌzy; hor-bydzial yâme leeme, ptzunñaad yâme leeme ñaꞌn me.
43 Per ra me meññ-wé yahc:
―Rapaꞌ de ni tzan zrieñ guiedzy, dzigyunon meññ xtidz-mos Dioz de ni rtzoo me mdad, porni lehdy ctzon modé ni pshahl me naa.
44 No were güya me gydo lo ṟegioṉ-Galilea, gayuno me meññ xtiidz Dioz leññ xiydoo yâme.