5
Günahzy yâme xtahl mbaḻ
(Mt. 4:18-22; Mr. 1:16-20)
1 To dzé zu Jesúz coo to nisdoo ni le Genesaret. Bydzihñ xtahl meññ ru zu me, lé raꞌñ yâme leeme, porni riuꞌladzy yâme guieññ yâme xtiidz Dioz.
2 Bwieꞌ Jesúz chohp barcü-dahtzy coo nzeꞌ, porni ba byruu meññ-ganahzy mbaḻ leññu, no ba gaguihby xgueshmbaḻ yâme.
3 Were güyuꞌ Jesúz leññ to barcü-caḻ, ni nac xchieñ Simóṉ, no günab Jesúz leeme tziyno me barcü coo gá nzeꞌ ru zuw. Luxu, gürie gahc Jesúz leññ barcü, no guzlo gahc galuu me meññ.
4 Bylux bluu me meññ, ra me Simóṉ:
―Güiyno barcü ru guial, no lâ gráḻ xgueshmbaḻ laꞌd lo nzeꞌ par gynahzy laꞌd mbaḻ.
5 Ra Simóṉ leeme:
―Muextr, gydo guiaal gatzoo noꞌ dziiñ, per dgueññ gynahzy noꞌ ni to mbaḻ. Per bâḻ neꞌy ze la, naꞌ tzo noꞌ dzigráḻ noꞌu.
6 Ru bráḻ yâme gueshmbaḻ‑e naꞌ, güyuꞌ gahc xtahl mbaḻ leññu, lé rluuw ba igaaxu.
7 Were pquee yâme riedz zrieñ meññ-zidno yâme ni nu leññ sto barcü par tza gacno leeyâme. Were güya yâme, biguistzee yâme gyrop barcü lé rluuw ba guiaꞌbu leññ nzeꞌ.
8 Per ru bwieꞌ Simoṉ-Pedr niwé we naꞌ, bisshiby me lo Jesúz, ra me lee:
―Nehx rquihñaꞌ par cuiahziꞌ ru zuun, Señor, porni meññ-guîlquie we naa.
9 Günii me ze, porni gadzie me por gyre mbaḻ ni bwieꞌ me bygaꞌ, no nehx lehzyme gadzie, zegahcu zrieñ meññ-ziyno me lee.
10 No zegahc bydzie Jacob no Juaṉ, lee we xiiñ Zebedeu, ni rtzoo yahc dziiñ no Simóṉ. Were ra Jesúz Simóṉ:
―Di gydziehbyiꞌ. Glohg ngâstoo ctzon lii to meññ ni guidno zrieñ yahc ni gac dmeññaꞌ lee.
11 Hor-ba güloo xbarcü yâme lo yudahñ, psaꞌn yâme gyreu uga no za yâme no Jesúz.
Psiaḻ Jesúz to mpyquie-gayudz gydo lady
(Mt. 8:1-4; Mr. 1:40-45)
12 Dze-nu Jesúz to guiedzy, bydzihñ to mpyquie ni gayudz gydo lady. Ru bwieꞌ me Jesúz‑e naꞌ, bisshiby me lo, lé güdihsh ihqy me lo yu, ra me lee:
―Señor, lii ni rtzoo mdad, bâḻ racladzyiꞌ la, beeiy csiaḻiꞌ naa we.
13 Were pshob ña Jesúz chehsh me, no ra leeme:
―Naa racdadzyaꞌ csiaḻaꞌ lii. ¡Ba biaḻiꞌ we!
Lux günii Jesúz ze, biaḻ gahc ni gayudz gydo lady mpyquie-caḻ.
14 Were ra Jesúz leeme:
―Na di guyu lo ndruhty; mazyg güya lo bahl lehdy güieꞌ me ba biaḻiꞌ, no güiyno gun ni gu Moiséz meññ, lehdy gann yâme ba biaḻiꞌ de xguîlguihdziꞌ.
15 Ma gayuguia Jesúz no ma gadohp meññ par guieññ ni rnii me, no par csiaḻ me lee de xguîlguihdz.
16 No lahd lahd gá rrusytzu Jesúz, ria me ru nehx nu meññ, rigynino me Dioz.
Psiaḻ Jesúz to meññ-gayac-ure ni di raḻ gyniꞌby
(Mt. 9:1-8; Mr. 2:1-12)
17 To dzé galuu Jesúz meññ, no lahd yâme nu meññ-nac yahc fariseu no muextr ni ruuḻ yahc xleiy Moiséz ni byruu zrieñ guiedzy de lo ṟegioṉ-Galilea, no lo ṟegioṉ-Judea, no ciuda-Jerusaléṉ, gawieꞌ yâme gyre ni gatzoo Jesúz, gasiaḻ me meññ-gayac-ure, porni nu Dioz no leeme.
18 Tohzy bydzihñ zrieñ meññ, zidno yâme to mpyquie-gayac-ure ni di raḻ gyniꞌby mbehty, nash me to lo camill. Gucladzy yâme nguꞌ yâme leeme leññ yuꞌ ru zu Jesúz.
19 Per di ndzial yâme ru ndedy yâme, porni bydzeꞌ meññu. Were cueꞌ yâme ihqy yuꞌ, bigloo yâme diax lehdy gülety yâme mpyquie ni nash lo camill glaꞌy, ru zu Jesúz.
20 Ru bwieꞌ Jesúz ulihbu rlíladzy yâme, were ra me mpyquie-gayac-ure:
―Mígü, xguîlquiey ba psiaaḻdadzyaꞌ gyreu we.
21 Guzlo gahc ganii leññ ihqy muextr ni ruuḻ yahc xleiy Moiséz no zrieñ meññ-nac yahc fariseu, ne yâme: “¿Dxuz‑e nac mpyquie-rieꞌ? Rnii me didz-nahcsy contr Dioz, porni nunzy Dioz‑e beeiy rsiaaḻladzy xguîlquie meññ.”
22 Per Jesúz naꞌ, nann me bia ganii leññ ihqy yâme. Were ra me:
―¿Bia nacu rnii leññ ihqy laꞌd ze?
23 ¿Bia leeu ma nehx ngann, ñapyaꞌ: “Gyre xguîlquiey ba psiaaḻdadzyaꞌ”, o ñapyaꞌ: “Biahsiꞌ no güzeꞌ”?
24 Naa, Mpyquie-Pshahl Dioz Lee, glun laꞌd naa beeiy rsiaaḻdadzyaꞌ xguîlquie meññ.
Were, ra me mpyquie-di raḻ gyniꞌby:
―Gapyaꞌ lii: Biahsiꞌ, gülesy xcamilliꞌ, no gübiꞌ xiryuꞌy.
25 No hor-caḻ gahc, biahs mpyquie-gayac-ure ñaz-lo gyre yâme, gülesy xcamill me, no zia gahc xiryuꞌ me, gaguguia me Dioz.
26 Gyre yâme rtzunadz no güluguia yâme Dioz zegahc. No bydzie yâme, ne yâme:
―¡Dzêrieꞌ yaa we bwieꞌ nó xroꞌ cos yahc!
Günino Jesúz Leví
(Mt. 9:9-13; Mr. 2:13-17)
27 Luxu, byruu Jesúz, za me sto lad. Hor-gadedy me to lgar‑e naꞌ, bwieꞌ me to meññ-rguquix mpuezd, le Leví, dxie ru rtzoo dziiñ. Were ra Jesúz leeme:
―Güde, náḻiꞌ naa.
28 No biahs gahc Leví, psaꞌn gyre xtziiñ me, no za me no Jesúz.
29 Leví naꞌ, ptzoo me to lni-ro porni bydzihñ Jesúz xiryuꞌ me, no uga dxieno yâme xtahl meññ-rguquix mpuezd no zrieñ meññ mazy, dxie yahc ruꞌ miax ru gayahgü yâme.
30 Guzlo meññ-nac yahc fariseu no gahc muextr ni ruuḻ yahc xleiy Moiséz, galesyno yâme chehsh xmeññ Jesúz, ra yâme lee:
―¿Bia nacu rahgü laꞌd no meññ-rguquix mpuezd no zrieñ meññ-rtzoo gyrehzy guîlquie?
31 Were ra Jesúz leeyâme:
―Meññ ni nzaꞌg nehx rquihñ tza lo doctor, mazyg meññ-gayac-ure, wé we rquihñ doctor.
32 Naa nehx biaḻaꞌ zidyobyaꞌ meññ-tziaawy, mazyg meññ-guîlquie we zidyobyaꞌ leeyahc lehdy csaan yâme ni nahcsy ni nac yâme.
Günabdiidz yâme Jesúz lguia ayun
(Mt. 9:14-17; Mr. 2:18-22)
33 Luxu ra yâme Jesúz:
―¿Bia nacu xmeññ Juaṉ ni rchôbnihs rtzoo yâme ayun no nehx rbiahz ni rnab yâme lo Dioz, no modé gahc rtzoo xmeññ meññ-nac yahc fariseu, per xmeññiꞌ aaḻ nitisy hór roo yâme no rahgü yâme?
34 Ra Jesúz leeyâme:
―¿Nehxni beeiy ntzoo laꞌd mdad meññ-nu lo guîltziahl di ñoo ñahgü no nu ziaꞌr ñoby-gayidzña lahd yâme?
35 Per ziaad dzé ru naa ni zidguiahc beeiy to ñoby-guidzña, ba dgueññaꞌ lahd yâme, were ctzoo yâme ayun no nehx zoo zahgü yâme.
36 Gyzac günii Jesúz ndaagü lo diidz, ne me:
―Ndruhty nehx nchug lar-coby par nquieedy meu to lo lar-gush. Porni bâḻ leeu ñahcu ze la, nnidylou nicoby; no luxu, lar-coby zegahc nehx rieññu mos lo lar-gush.
37 No ndruhty nehx rguꞌ vin ni leer güyaa leññ to bush-guiedy ni ba nigush; porni bâḻ leeu ñahcu ze la, nchiahzu bush-guiedy ni ba nigush, no nnitylou vin no zegahcu bush.
38 Leewe vin ni leer güyaa rahpu de ni tzuw leññ bush-guiedy ni ncoby, no were gyropu nehx zahc mbehty.
39 No ndruhty ni roo vin-gush nehx ñuꞌladzy ñoo vin ni leer güyaa, porni leeyâme ma rguguia yâme vin-gush, ne yâme: “Leeu we ma mos.”