10
1 Rman yahc, ni ma riuꞌdadzyaꞌ leññ dguîlmbahñaꞌ, no ni rnabaꞌ lo Dioz, lee we nirieꞌ: gylaa meññ-Isṟael de lo guîlnadz ni ziaad.
2 Naa gadedyaꞌ diidz de leeyâme, modni riuꞌladzy yâme gzacbeeiy yâme Dioz, per nehx rtzoo yâmeu merp mod-nac ni uli.
3 Porni nehx rieññ yâme xnahc rteedy Dioz meññ beeiy ni nehx nzahby guîlquie; mazyg ryo yâme gacu mod-ne yâme, sinn ctzoo yâme mod-ba ne Dioz ctzoo meññ.
4 Porni xleiy Moiséz rdibylgaau no Crist, no gyre meññ ni rlíladzy leeme, rteedy Dioz leeyâme beeiy ni nehx nzahby guîlquie.
5 Bzaa Moiséz lo guehtzy ru queꞌ leiy lguia de ni tedy meññ beeiy ni nehx nzahby guîlquie, ne me: “Bâḻ meññ ntzoo gyre ni ne leiy la, zacnou leeme gylaa me.”
6 Per lguia de ni rdedy meññ beeiy ni nehx nzahby guîlquie porni gylíladzy me Dioz la, neu: “Di gynii leññ xguîlmbahñiꞌ: ¿Dxu ña gybaa? (nirieꞌ neu, lehdy nnab mu ñaht Crist);
7 no di gyniiy: ¿Dxu ña ru nu mînguty?” (nirieꞌ neu, lehdy nnab mu guiahs Crist de lahd mînguty).
8 ¿Dâs‑e neu la?: “Diidz ni ne Dioz nuw gahsh de lii, leeu nu ruꞌy no leeu nu xguîlmbahñiꞌ.” No leeu we diidz ni ne gylíladzy meññ Dioz, no runo noꞌu meññ.
9 Porni bâḻ gyniiy ñaz-lo meññ Jesúz‑e rtzoo mdad lii, no gylíladzyiꞌ leññ xguîlmbahñiꞌ de ni Dioz bispahñ leeme de lahd mînguty la, zlaay de lo guîlnadz ni ziaad.
10 Porni rlídadzy nó leññ dguîlmbahñ nó par tedy nó beeiy ni nehx nzahby guîlquie, no rnii nó ni rlídadzy nó par gylaa nó de lo guîlnadz.
11 Lo Guehtzy ru queꞌ xtiidz Dioz neu: “Dxu rlíladzy leeme, nehx ziuꞌ dzé nisquiee me lee.”
12 No Dioz nehx ne me bâḻ meññ-Isṟael o bâḻ nehx meññ-Isṟael lee; porni lehzyme we ni rtzoo mdad gyre meññ, no rahp me gyre gyzasy mod-racno me meññ ni rnab lo me.
13 Porni lo Guehtzy ru queꞌ xtiidz Dioz neu: “Nitisy dxu gnab lo Dioz gylaa la, zlaa de lo guîlnadz ni ziaad.”
14 Per ¿bia mód nnab yâme lo me bâḻ nehx rlíladzy yâme leeme? ¿No bia mód nlíladzy yâme leeme bâḻ dgueññ guieññ yâme de leeme? ¿No bia mód ñieññ yâme xtiidz me bâḻ nehx ñuꞌ dxu ñunou leeyâme?
15 ¿No bia mód ña yâme nigyuno yâme meññ xtiidz Dioz bâḻ nehx nu dxu nshahl leeyâme? Mod-rnii lo Guehtzy ru queꞌ xtiidz Dioz neu: “¡Modni mos ru gadzihñ meññ ni runo zrieñ meññ didz-mos ni zidno dzie tziaawy!”
16 Per nehx gyre yâme ni rieññ xtiidz me riuꞌladzy leeu; mod-bzaa Isaíaz lo guehtzy, ne me: “Señor, ¡ndruhty nehx rlíladzy ni bigyuno noꞌ leeyâme!”
17 Leewe, rlídadzy nó Dioz porni rieññ nó xtiidz me, no rieññ nó leeu por xtiidz Crist.
18 Per rnabdiidzaꞌ: ¿Dgueññ guieññ meññ-wé yahc xtiidz Crist la? ¡Ba, ba bieññ yâmeu! Porni lo Guehtzy ru queꞌ xtiidz Dioz neu:
Gydo lo guiedzylie rieññ ganii meññ xtiidz me,
no ba bydzihñ xtiidz me xtâ ru ma ziht lo guiedzylie.
19 Per gyzac ganabdiidzaꞌ: ¿Nehx bieññ meññ-Isṟael lehdy ñann yâme ni ne Dioz la? Nier gahc Moiséz rnii me ni ne Dioz:
Naa ctzon de ni ctzumvidy laꞌd no meññ-to guiedzy ni nehx rsahc;
ctzon de ni gydziadzyno laꞌd meññ-to guiedzy ni di rieññ.
20 No Isaíaz bzaa me lo guehtzy ru ne:
Meññ-nehx gayo naa, wé we bydzial naa;
no meññ-nehx rnabdiidz de naa, bwieꞌ yâme naa.
21 Per de meññ-Isṟael ne me: “Gydo dzé gabiaazaꞌ meññ-nahdy ni di ne gzoob dtiidzaꞌ.”