11
Dioz nehx güloo ihqy me xguiedzy me Isṟael
1 Were rnabdiidzaꞌ: ¿Güloo ihqy Dioz xguiedzy me Isṟael la? ¡Yac, dac‑e ze leeu! Naa zegahc‑e nacaꞌ meññ-Isṟael de lo xfamily Braṉ no de lo xigrup Benjamíṉ.
2 Dac‑e güloo ihqy Dioz xguiedzy me ni güle me lee glo ba ma xtze diaa. ¿O nehx nann laꞌd bia ne lo Guehtzy ru queꞌ xtiidz Dioz lguia ni ne Elíaz, ru gülesyno me meññ-Isṟael lo Dioz la? Ne Elíaz:
3 “Señor, biꞌdy yâme xprofet yahquiꞌ, no ptzily yâme ltar yahc ru rzacbeeiy noꞌ lii, no nunzy naa biaꞌn, no zegahc ne yâme igaꞌdy yâme naa.”
4 No ¿bia gu Dioz leeme? Ne Dioz: “Dac‑e lihzy biaꞌn. Rap ziaꞌraꞌ zgahdzy mily dmeññaꞌ ni rzacbeeiy naa no nehx risshiby lo figur ni le Ba-al.”
5 No mod-wé gahc‑e biaꞌn zrieñ yâme ni naꞌ ni güle Dioz lee por xlaꞌy me.
6 No bâḻ guhcu por xlaꞌy me la, were ba dac‑e por behch ni beeiy ntzoo yâme; no bâḻ leeu ñahcu ze la, were xlaꞌy me nehx nsahcu.
7 Were naꞌ, meññ-Isṟael nehx bydzial yâme ni byo yâme; per meññ-güle Dioz lee bydzialu, eguiid zrieñ yâme gucnahdy xguîlmbahñ;
8 Nirieꞌ we ni rnii lo Guehtzy ru queꞌ xtiidz Dioz: “Dioz ptzoo leeyâme beeiy ni nishcahsy, no beeiy ni ndaagü lo yâme no gydiag yâme lehdy di güieꞌ yâme no di guieññ yâme ni runo xmeññ me leeyâme, no mod-wé we gayahcu xtâ ni naꞌ.”
9 No zegahc günii ṟeiy-Davit:
Xilni gahc yâme gac beeiy tramp, no beeiy duu ni pyshiꞌdy,
lehdy gyraḻ nieꞌ yâme, no mod-wé ycaꞌ xguîlné yâme.
10 No gac yâme beeiy ngaḻ lehdy di zaḻ zwieꞌ yâme,
no togahcs gac yâme beeiy ni nchuꞌñ.
Meññ-nehx meññ-Isṟael beeiy gylaa de lo guîlnadz
11 Hôrrieꞌ ganabdiidzaꞌ: Hor-byraḻ nieꞌ meññ-Isṟael, ¿biahb yâme togahcs la? ¡Yac, dac‑e ze leeu! Mazyg hor-di nzobdiidz meññ-Isṟael, zrieñ meññ ni nehx meññ-Isṟael, bzobdiidz yâme, no gylaa yâme de lo guîlnadz, lehdy cu ihqy meññ-Isṟael gzobdiidz zegahc.
12 Naꞌ hôrrieꞌ, bâḻ xguîl-di rieññ meññ-Isṟael nacu laꞌy ni modni rsahc par meññ ni nu lo guiedzylie, no de ni biahb meññ‑Isṟael nacu laꞌy ni modni rsahc par meññ‑nehx meññ‑Isṟael la, ¡dxiclé ru ba guibyguiat gyo yâme Dioz!
13 No laꞌd, ni nehx meññ-Isṟael, nu ni dziguiapyaꞌ laꞌd. Dioz pshahl me naa ru nu laꞌd, no par naa rsahc dziñ-rieꞌ ni bdee me naa.
14 Rtzon ze, lehdy meññ-dguiedzyaꞌ, lahd yâme cu ihqy ctzoo mod-rtzoo laꞌd, no mod-wé beeiy gylaa yâme de lo guîlnadz.
15 Bâḻ porni güloo Dioz meññ‑Isṟael diby lad, por niwé xtahl meññ ni nu lo guiedzylie ba bydzihñ yâme mos lo Dioz, ¡dxiclé hor-meññ-Isṟael gyo yâme Dioz! Zidguiahcu beeiy ni gübahñ meññ‑ba guhty.
16 Bâḻ to paṉ ni güyaa nier lee nacu par Dioz la, zegahc‑e cob ni de lee güyaau, nteru we nac par Dioz. No bâḻ ni nnaazy to yahg leññ yu nacu par Dioz la, zegahc‑e par Dioz xúzu.
17 Lahd meññ-Isṟael, zidguiahc yâme beeiy xúz ni byrug de lo yag-oliv, no lii ni nehx meññ-Isṟael, zidguiahquiꞌ beeiy xúz yag-oliv ni rgaꞌy guehsh, per byguieedyiꞌ xilgar ni byrug. No guhquiꞌ tohzy no oliv xtâ ru nnaazyu leññ yu, no de leeu mbahñiꞌ.
18 Leewe, di gyniguiay neꞌy ma rsahquiꞌ que merp xúzu ni zidguiahc meññ-Isṟael, porni ba byguieedyiꞌ coou. Bâḻ gyniguiay ze la, gax gunn, dac‑e lii nnaazy ni zu leññ yu, mazyg ni zu leññ yu we nnaazy lii.
19 Duhn naꞌ nniguiay neꞌy: “Per xúzu ni zidguiahc meññ-Isṟael byrugu par byguieedyaꞌ xilgaru lo yag-oliv.”
20 Ze we leeu; byrugu porni di nlíladzyu, no lii ba queꞌy lgar-wé porni bylíladzyiꞌ. No leewe, gax gunn di gyniguiay.
21 Porni bâḻ Dioz di ñoob me ni merp xṟam oliv la, zegahc‑e beeiy nehx ñoob me lii.
22 Bwieꞌ gaññsiꞌ xnahc‑e guîlmbañ-tziaawy rahp Dioz, per zegahc‑e nehx beeiy zehtz xtiidz me. No ze ptzoo me no meññ ni ptzoo guîlquie, per rahp me guîlmbañ-tziaawy par no lii, bâḻ di csaꞌniꞌ de ni bioob me lii; no bâḻ yac la, zegahc‑e beeiy zaḻ schuꞌ Dioz lii de ru ba queꞌy.
23 No gyzac stohbyu, bâḻ meññ-Isṟael gylíladzy yâme Dioz la, beeiy zibyguiat squieedy Dioz leeyâme ru rahc cuent byrug yâme.
24 Porni sca-ze nehx meññ-Isṟael lii, no byruguiꞌ lo oliv ni nu guehsh par pquieedy Dioz lii lo oliv‑tziaawy la, ¡dxiclé meññ-Isṟael ni zidguiahc merp xṟam oliv-tziaawy, beeiy zaḻ zibyguiat iguieedy yâme gyzac ru byrug gahc yâme lo oliv-tziaawy!
Gylaa meññ-Isṟael de lo guîlnadz
25 Rman, racdadzyaꞌ gann laꞌd ni güyungaꞌdzy ni ne Dioz, lehdy di gyniguia laꞌd nlâdzy laꞌd nann laꞌd nitisy leeu: ni guhc meññ-Isṟael la, lahd yâme gucnahdy xguîlmbahñ, no gayahcu ze xtâ ru ba meññ-nehx meññ-Isṟael, gyo yâme Crist.
26 No luxu, were nter nacioṉ-Isṟael zlaa de lo guîlnadz, mod-ne lo Guehtzy ru queꞌ xtiidz Dioz:
De ciuda ni le Sioṉ gyruu to meññ-guislaa meññ,
no guidloo me meññ-Isṟael de lo ni dirquihñ.
27 No nirieꞌ we diidz ni gdedyaꞌ ctzon no leeyâme,
dze-gboon xguîlquie yâme.
28 No lguia xtiidz Crist la, xtahl meññ-Isṟael rdziadzyno yâme Dioz, no nirieꞌ gayacnou par ycaꞌ laꞌd xtiidz me; per Dioz ndzi ziaꞌ me meññ-Isṟael, porni xtadgul yâme ni güyuꞌ ba xtze, leeyâme we ni güle Dioz lee.
29 Dioz nehx rboo me ni rdee me, no nehx ntzee me de ni ba pquee me riedz xmeññ me.
30 Zegahc laꞌd ni nehx meññ‑Isṟael lee, antzy nehx bzobdiidz laꞌd Dioz, per Dioz bioob me laꞌd, porni meññ-Isṟael di nzobdiidz yâme leeme.
31 No mod-wé gahc‑e meññ-Isṟael ni naꞌ, nehx rzobdiidz yâme Dioz, lehdy mod-bioob Dioz laꞌd, mod-wé gahc zioob me leeyâme.
32 Porni Dioz ptzunahdy me gyre meññ, lehdy guioob me nyug.
33 ¡Xnahc‑e modni rsahc ni rahp Dioz! ¡Xguîlnann me no ni ngann ni nann me nehx rahp yahcu mdid! Ndruhty nehx beeiy mboxñahz ru rnii me ni ctzoo me, no ndruhty nehx nann bia nacu rtzoo meu.
34 “¿Nu dxu beeiy nzaclo xguîlriehñ Dioz la? ¿Nu dxu beeiy nluu leeme bia ctzoo me la?
35 ¿Nu dxu beeiy niscady behch ncaꞌ Dioz, lehdy nguꞌ ihqy me nguix meu la?”
36 Porni gyre ni nu ziaadu de Dioz, leeme bzaa gyre yahcu, no par leeme nu yahcu. ¡Di tzu dzé gydibylgaa ni gayuguia Dioz! Modé gacu.