11
Ritonõpo Kuewomanekomo
Sero saumu tymerose Tawi a.
1 Ritonõpo Kuesẽkõ maro towomase ywy.
Tuaro pyra exikety sã mase ynara karyhtao ya:
“Epako torõ samo ypy tõ pona,
2 popyra exiketomo a taky tõ tapoise exiryke
tõtonẽtohkõ tao, typyrekõ tanỹse eya xine
zae ehtoh poko exiketõ wory eraximãko mã toto.
3 Ajohpe pyra exikety kure ehtoh
onyrisaromepyra mana Ritonõpo nyripohpyry,
zae ehtoh roropa turumekase ahtao ahno a.”
4 Ritonõpo Kuesẽkõ Tytapyĩ Kurã tao mana;
tuisa imehxo mana, tapõ po kapu ao.
Sero nono põkõ emero enẽko mana,
toto nyriry waro mana.
5 Tõmiry omipona exiketõ enẽko mana,
popyra ehtoh poko exiketõ roropa; imehnõ
osanumananõ se pyra Ritonõpo mana ipunaka.
6 Apoto emãko mana ẽxofere maro
popyra exiketõ pona; toto wãnohnõko mana
tyryrykane axitunety ke apoto samo.
7 Zae ehtoh rĩko Ritonõpo mana,
ajohpe pyra ehtoh jamaro mana;
aomiry omipona exiketõ jũme
isene exĩko mã toto Ritonõpo ẽpataka.