106
Kure Ritonõpo ehtoh Izyraeu tomo a
1 Kure Ritonõpo mana!
“Kure mase,” kahtoko Ritonõpo a kure aexiryke,
kypyno xine exikehpyra mana.
2 Inyrityã kurã tyjamitunuru ke ikuhpỹme nase.
Jũme eahmaryhtao kyya xine kure aexiry
onymotyẽkara sytatose.
3 Tãkye mã mokaro, Ritonõpo omipona exiketomo,
zae ehtoh poko rokẽ exiketomo.
4 Wenikehpyra exiko ypoko, Ritonõpo,
opoetory tõ akorehmaryhtao oya;
kypynanohko roropa toto pynanopyryhtao oya.
5 Opoetory tõ kure rokẽ ehtoh enery se ase, atãkyematohme ononory põkõ maro,
oseahmatohme tosẽkõme oenetupuhnanõ maro.
6 Popyra toehse kymarokomo, zae pyra ipunaka;
iirypyryme toehse sytatose, kytamurukõ samo.
7 Ejitu po kytamurukõ ahtao onenetupuhpyra toh kynexine Ritonõpo nyrityã kurã poko.
Tuenikehse toh kynexine tahxime typyno xine Ritonõpo ehtopõpyry poko, aomipona pyra toehse toh kynexine tuna konõto Tahpiremã po.
8 Yrome tyjamitunuru enepotohme,
typynanohse toh eya, tõmihpyry ae ro.
9 Ritonõpo a tyripose ahtao tuna konõto Tahpiremã tãpaikapose;
typoetory tõ tarose eya nono tonorẽ poro.
10 Toto zehno exiketõ winoino typynanohse toto eya;
epetõkara winoino tanỹse toto.
11 Yrome epetõkara tyneryse;
epara tokurehse toto emero.
12 Moro eneryke tyya xine zae aomihpyry ehtoh
tonetupuhse eya xine,
toremiase toto Ritonõpo eahmaryme.
13 Yrome axĩ tuenikehse ropa toto inyrihpyry poko,
tamoreme tyriry se toehtoh tyrise eya xine,
aomiry oneraximara toh kynexine.
14 Typenetatoh se toehse toto ona po, ahno esao pyra,
Ritonõpo tukuhse eya xine.
15 Naeroro ise toto ehtoh tokarose eya,
yrome tyrohsẽ konõto tonehpose roropa eya xine.
16 Moroto ona po Moeze zumoxike toehse toh
kynexine, Arão roropa, Ritonõpo maro oturukety,
aomiry omipona exikety.
17 Naeroro nono totapuruhmakase, Tatã tonyohse,
kuih kary samo nono aka tomõse;
Apirão roropa, itapyĩ taõkõ maro, tonẽse nono aka.
18 Toto marõkõ pona apoto toepukase,
mokaro tyahkase, ajoajohpãkomo.
19 Ypy Xinai po pui mũkuru panõ tyrise
Izyraeu tomo a, uuru risemy,
tynyrihpyrykõ toahmase eya xine Ritonõpo myakãme.
20 Ritonõpo Imehxo Exikety tymyakãmase eya xine
okyno panõ ke, onahpoty enahne ke.
21 Tuenikehse toh kynexine Ritonõpo
Typynanohnekõ poko,
inyrityã kurã poko roropa tyjamitunuru ke Ejitu po.
22 Inyrityã osenuruhkatohme moroto!
Inyrihpyry aoserehtopõpyrykõ poko
tuna konõto Tahpiremã po!
23 Naeroro: “Toto enahkapõko ase,”
tykase Ritonõpo Izyraeu tõ poko;
yrome Moeze, inymenekahpyry typoetoryme
toexikihmase Ritonõpo ẽpataka toto ewomatohme,
toto onenahkara aehtohme.
24 Moromeĩpo aomihpyry zae exiry
onenetupuhpyra toexirykõke
Kanaã pona tomomyry se pyra toehse toh kynexine,
nono kurã pona.
25 Tytapyĩkõ tao, okyno pihpyry risẽ tao
tehme toexirykõ se toh kynexine ikerekeremãko,
aomiry onetara, imoiry se pyra toh kynexine
Ritonõpo Tosẽkõ omiry poko.
26 Naeroro ynara tykase ynororo eya xine:
“Ourutorỹko ase, ona po oorihmanohpotorỹko ase,
27 apakomotyã sapararahme exĩko, juaro pyra
exiketõ rãnaka, imehnõ nonory po orihnõko matose.”
28 Moromeĩpo tõximõse Ritonõpo poetory tõ
ypy Peoa po, tyneponãmarykõ Paau eahmatohme,
tõtuhse toto tynekarorykõ poko
isene pyra exiketõ eahmaryme.
29 Tynyrityã ke tyehno xine
Ritonõpo tyripose eya xine,
naeroro tyrohsẽ xihpyrymã ke, tyyryhmase toto.
30 Yrome mokyro zae pyra exikety tuãnohse Pineia a,
mame moro tyrohsẽ tonahse.
31 Inyrihpyry kurã poko wenikehpyra mã toto,
zae Pineia ehtoh ekarõko jũkõ mana, imepỹ
zumakahpõkomo a jũme wenikehpyra toto ehtohme.
32 Moromeĩpo Meripa tuna enatyry po,
tyehno xine Ritonõpo tyripose eya xine,
morara ahtao sam tykase Moeze, mokaro pokoino.
33 Tyekĩtapãse ynororo taomipohtomase ynororo
eya xine, azahkuru tõturuse ynororo,
ajoajohpã samo.
34 Pohnõ onetapara tokurehse toto,
Ritonõpo Tosẽkõ nyripohpyry omipona pyra.
35 Yrome typytase toto mokaro maro,
torẽnase toto imaro xine,
typoenohse toto eya xine inyrityãkõ eahmary poko.
36 Imehnõ neponãmary toahmase
Ritonõpo poetory tomo a,
morara exiryke tonahkase toto.
37 Typoenõkomo tõxirykomo te, orutua kõ roropa
totapase eya xine jahkatohme tynekarorykõme
Kanaã põkõ neponãmary eahmatohme.
38 Poeto kurãkõ totapase eya xine,
mame moro nono nuriame toehse
mokaro etaparyke eya xine.
39 Morohne riryke eya xine
popyra toehse toh kynexine ipunaka.
Nuriame toehse toto Ritonõpo a
imeimehnõ poko exiketõ samo,
aomiry onymoipyra toh kynexine.
40 Naeroro typoetory tõ zehno toehse Ritonõpo,
typenekehse ynororo toto poko.
41 Turumekase toh eya,
typoremãkapose toto Ritonõpo waro pyra exiketomo a.
42 Izyraeu tõ tyyryhmase epetõkara a,
tyrohmanohpose toto eya xine.
43 Tuhke rokẽ typynanohse toto Ritonõpo a,
yrome Tosẽkõ rumekary sehxo toh kynexine,
yronymyrymehxo tyyrypyrykõ poko se toh kynexine.
44 Mãpyra tyxitaryme Ritonõpo a takorehmarykõ
tokaropose ahtao eya xine,
toto omiry totase Ritonõpo a.
Toytose ropa ynororo eya xine aetuarimarykohtao.
45 Mokaro eneryke tyya wenikehpyra toehse tõmihpyry etapotopõpyry poko, typoetory tõ pynohxo toexiryke toto zehno pyra toehse ropa ynororo.
46 Typoetory tõ pyno iporemãkaponanõ tyripose ropa eya.
47 Ritonõpo yna Esemy, yna ipynanohko! Yna
enehko ropa awaro pyra exiketõ nonory poe,
“Kure mase,” katohme yna a oya, atãkyemãko roropa oesety kurã eahmaryme.
48 “Kure mase,” kahtoko Ritonõpo Izyraeu tõ Esemy a. “Kure mase,” kahtoko eya seromaroro te, jũme roropa. Sero nono põkõ emero, ynara kahtoko: “Zae mase!”
“Kure mase, Ritonõpo” kahtoko!