107
Ritonõpo eahmatoko kure aexiryke
1 “Kure mase,” kahtoko Ritonõpo Kuesẽkomo a,
kurãme aexiryke, kypyno xine aexiry
enahpỹme mana jũme!
2 Ah typynanohse aexityã moro nekarõ toto Ritonõpo eahmaryme! Typynanohse toh nexiase eya epetõkara wino,
3 tonehpose ropa toto eya imeimehnõ nonory
poe, inikahpoino te, ikurenaino roropa, xixi
tũtatoh winoino te, xixi omõtoh winoino roropa.
4 Toitoine toytose toh nexiase tytahse ona tonorẽ poro, pata onenepyra tokurehse toto tosarykõme.
5 Omise toh nexiase, tutunazehnase roropa,
tapotũkehse toto toorikyrykõ eraximãko
rokẽ toh toehse.
6 Mame toetuarimarykohtao tykohtase toto
Ritonõpo a takorehmatohkõme,
mame typynanohse ropa toh nexiase eya aetuarimatohkõ winoino.
7 Tarose toto eya osema zae exikety ae pata pona,
moroto toto ehtohme.
8 Ah “Kure mase,” nykã toto Ritonõpo a
kypyno xine exikehpyra exiryke,
typynanohse roropa toexirykõke eya!
9 Tutunazehnase exiketomo a tuna ekarõko mana
aukurukõme, tonahsẽ kurã ekarõko mana
omise exiketomo a.
10 Toitoine ikohmamyry ao toh nexiase,
xinukutume ehtoh ao, tyrohmanohpose
ãpuruhpyry tao, tymyhse keti kurimene risẽ ke,
11 Ritonõpo Imehxo Exikety omiry
omipona pyra toehse toexirykõke,
inyripohpyry omipona pyra toh nexiase
tamorepase tahtao xine ro.
12 Toerohtohkõ tupime ehtoh ke tapotũkehse
toh nexiase; toepukase toto,
mame toto anakorehmara imehnõ nexiase.
13 Mame toetuarimarykohtao tykohtase toto
Ritonõpo a takorehmatohkõme,
mame aetuarimatohkõ poe typynanohse toh nexiase
Ritonõpo Kuesẽkomo a.
14 Touse toto eya moro kohmamyry poe,
tymyhpokase ropa eya, keti tõ tamohse eya.
15 Ah “Kure mase,” nykã toto Ritonõpo a
kypyno xine exikehpyra exiryke,
typynanohse roropa toexirykõke eya!
16 Omõtoh apuru tõ tahkãko mana metau risemy,
ikyryry kurimene risẽ kararahnõko roropa mana.
17 Toitoine putupyra exiketõme sã toh nexiase,
toetuarimase toh nexiase tyyrypyrykõ pokoino,
Ritonõpo omiry omipona pyra toexirykõke;
18 tõtukurukõ se pyra toehse, takuruhtase toh nexiase,
ameke pyra toehse toorikyrykõ poko.
19 Mame toetuarimarykohtao tykohtase toto
Ritonõpo a takorehmatohkõme,
mame Ritonõpo Kuesẽkomo a typynanohse ropa toto
aetuarimatohkõ winoino.
20 Tõmiry ke tukurãkase toto eya,
typynanohse toto aorikyrykõino.
21 Ah “Kure mase,” nykã toto Ritonõpo a
kypyno xine exikehpyra aexiryke,
typynanohse roropa toexirykõke eya!
22 Ah tynekarorykõ enehno toto, “Kure mase,”
katohme, eremiatoh maro tãtãkyemarykõme
Ritonõpo nyrityã emero ekaroryme!
23 Toitoine toytose toto wapu tõ ae tuna konõto poro,
toerohtamitukõme tineru apoitohme tuna konõto tõ po;
24 Ritonõpo Kuesẽkõ nyriry tonese eya xine,
inyrityã osenuruhkatoh tuna konõto tõ poro.
25 Aomiry omi poe tyryry tykapitose jamihme exikety,
pohkane tõ poh tykapitose.
26 Wapu tõ tanỹse kaehxo mã kehko,
mame tyhtose ropa zue aka. Morara toehse ahtao tõserehse toto, tyneryrykõ kurũke.
27 Tõsetapase toto, aetỹtyã sã toytose toto
wapu kywyh karyke; emese kure aehtopõpyrykõ toto anakorehmara nexiase.
28 Mame toetuarimarykohtao tykohtase toto
Ritonõpo a takorehmatohkõme,
mame Ritonõpo Kuesẽkomo a typynanohse toto
aetuarimatohkõ winoino.
29 Tyryrykane konõto tymynyhpãkapose eya,
pohkane tõ mynyhme toehse.
30 Tãkye toehse toh nexiase tuna konõto
tymynyhpãse exiryke; kure rokẽ toto tarose
Ritonõpo a otyryhkatoh pona, ise aehtohkõ pona.
31 Ah “Kure mase,” nykã toto Ritonõpo a
kypyno xine exikehpyra exiryke,
typynanohse roropa toexirykõke eya!
32 Ah imehxo Ritonõpo ehtoh nekarõ toto
oximõme aepyrykohtao;
Ritonõpo eahmatoko tamuximãkõ ẽpataka
oximõme toehse toto ahtao.
33 Tuna tõ tyripose Ritonõpo a tonore rahkene,
tuna enatyry tõ tonore tyripose eya,
34 nono kurã tyrise eya patãpome,
sautu ke tyõtose moro põkõ popyra ehtoh pokoino.
35 Ona tonorẽ tyripose eya ikuhpo tõme,
nono tonore tymyakãmase eya tuna enatyry tõme.
36 Omise exiketõ tonehpose eya
aosesaritohkõme moroto.
Typatarykõ tyrise eya xine, moroto toehtohkõme;
37 tupito tõ tarykase eya xine,
uwa zoko tõ tarykase roropa eya xine,
tykyrysã itamurume tapoise eya xine.
38 Kure rokẽ typoetory tõ tyrise Ritonõpo a;
toemũkuase toh nexiase tuhke.
Eky tõ roropa tomãkapose eya,
tuhke hkopyra toto exiryino.
39 Ritonõpo poetory tõ typoremãkase ahtao,
toehxirose roropa toto ahtao, sam tykase toto ahtao tyrohmanohpose toto ahtao,
40 tãkye pyra toehtoh tonepose Ritonõpo a
tuisa tõ poko iiryhmaneme toto exiryke.
Toytoytorykõ poko taropose toto eya ona tonorẽ poro, osema pyra ehtoh poro.
41 Yrome tymõkomokãkara typynanohse eya
aetuarimatohkõ winoino,
ipoenõ tomãkapose eya, eky tõ kaneru tõ samo.
42 Moro eneryke tyya xine atãkyemãko
kure ehtoh poko exiketõ mana,
yrome popyra exiketõ tymynyhpãkapose
exĩko mã toto.
43 Ah tuaro exiketõ nosenetupuhno toto
morohne poko, kypyno xine Ritonõpo ehtoh poko
roropa, Kuesẽkomo.