12
Yna ipynanohko Ritonõpo
Sero saumu tymerose Tawi a.
1 Yna ipynanohko, Ritonõpo yna Esemy,
zae ehtoh poko exiketõ tonahse mã toto,
õmiry omipona exiketõ osenepyra toehse.
2 Ajohpe oturũko mã toto oseya; imehnõ
enekunohnõko mã toto ipyrypary ke eya xine.
3 Ritonõpo, mokaro imynyhpãkapoko
imehnõ pyrypaketomo!
Ĩtarykõ apuruko mokaro epyrypaketomo.
Ynara ãko mã toto:
4 “Yna omiry ke yna penetatoh emero apoĩko ynanase.
Mynyhme yna onyrisaromepyra imehnõ mana,
tõmipona yna onyrisaromepyra mã toto.”
5 Yrome ynara ãko Ritonõpo Kuesẽkõ mana:
“Seromaroro oehnõko ase, tymõkomokãkara
tuarimaporyke imehnomo a,
pusuh ãko mã toto sam katoh ke.
Toto ewomãko ase towomarykõ se toexirykõke.”
6 Ritonõpo omiry zae ehtoh enetupuhnõko ase.
Parata kurã sã aomiry mana tukurikase ahtao
apoto ao 7me otootomosẽ pona.
7 Ritonõpo yna Esemy, yna onewomakehpyra
exiko, yna ipynanohko yna onyryhmara popyra
exiketõ ehtohme,
8 ynara exiryke, emero rokẽ po ytõko mã toto popyra ehtoh poko; moro poko “Kure nase,” ãko mã toto emero.