29
Ritonõpo jamitunuru tyryrykane konõto ao
Tawi nymerohpyry.
1 Kuesẽkõ eahmatoko, Ritonõpo nenyohtyamo;
imehxo aehtoh eahmatoko,
jamihmehxo aexiryke eahmatoko roropa.
2 Ritonõpo saerehkatoh ekarotoko imehnomo a;
oesekumurukõ po oporohtoko Kuesẽkõ Kurã
ẽpataka tõsenepose ynororo ahtao.
3 Ritonõpo omiry osetãko mana tuna tõ epoe;
Ritonõpo Imehxo Exikety takararahãko mana,
tuna konõto epoe aomiry osetãko mana.
4 Ritonõpo omiry tyjamitunuru ke pehme mana;
tuisamehxo toehtoh ke pehme roropa mana.
5 Wewe konõto apupari tahkãko aomiry mana.
Apupari tahkãko mana ypy tõ Ripano po.
6 Ypy tõ Ripano pyhseky kamexipõko mana
pui poenõ samo;
Ypy Heremõ pyhseky kamexipõko mana
pui mũkuru wãtasene exikety samo.
7 Neneneh kamexipõko Ritonõpo omiry mana.
8 Ona tonorẽ tykytyky kamexipõko aomiry mana.
Ona tonorẽ Kate tykytyky kamexipõko
Ritonõpo omiry mana.
9 Wewe karawario tykytyky kamexipõko
Ritonõpo omiry mana.
Ituary emapõko mana wewe tõ poe.
Moro sã toehse ahtao Ritonõpo Tapyĩ Kurã tao
ynara kohtãko mã toto:
“Saeremehxo Ritonõpo mana, imehxo mana,” ãko toto.
10 Tuisame Ritonõpo Kuesẽkõ mana,
tuna tõ zueme exiketõ epoe;
Tuisame, jũme exikehpyra mana.
11 Typoetory tomo a tyjamitunuru
ekarõko Ritonõpo mana,
kure rokẽ toto rĩko roropa mana;
eya xine kurãkõ emero ekarõko roropa mana.