30
“Kure mase,” katopõpyry typynanohse exiryke
Tawi nymerohpyry.
1 “Kure mase, Ritonõpo,” ãko ase eremiãko,
tanỹse jexiryke oya jorihtoh poe; jepetõkara
epyrypasaromepyra mã toto jenatyry poko.
2 Ritonõpo Jesemy, kykohmase jakorehmatohme,
mame tukurãkase ywy oya.
3 Kypynanopyase orihpyra jehtohme.
Mokaro orihketõ maro exiase, yhtõko mã toto
aorihtyã esaka, yrome isene ropa kyriase.
4 Eremiatoko Ritonõpo Kuesẽkõ eahmaryme,
emero aomiry omipona exiketomo!
Wenikehpyra ehtoko Ritonõpo Kurã nyrityã poko,
“Kure mase,” kahtoko eya.
5 Zehno Ritonõpo ehtoh axĩtao rokẽ mana,
yrome kure aexiry exikehpyra mana
isene ro kuahtao xine.
Kyxitarykõ poko ẽmehnõko sytatose repe,
yrome tõmehse ahtao atãkyemãko ropa sytatose.
6 Torẽtyke pyra exiase, towomase oya jexiryke.
Ynara osenetuputyase: “Sero sã exikehpyra mana,
jũme etuarimara exĩko ase.”
7 Ritonõpo Jesemy, kure rokẽ mexiase ya,
kuewomase tapyi jamihmã samo ypy po.
Yrome moromeĩpo tõtonẽse mexiase ywinoino,
mame enaromỹke toehse ywy.
8 Ritonõpo Jesemy, kykohmase jakorehmatohme.
9 Otyme kure jorikyry oya nae?
Ahno ekepyry oeahmasaromepyra mana.
“Emese kure Ritonõpo mana,
anamonohpyra mana,” kasaromepyra mã toto.
10 Ritonõpo, etako pahne ypyno exiko!
Kuakorehmako, Ritonõpo Jesemy!
11 Jemynyhmary tymyakãmase oya watoh ke,
jatãkyemary ke.
Yxitatopõpyry tymyakãmase oya tãkye ehtoh ke.
Jomye tãkye jehtoh tyrise oya.
12 Naeroro mynyhme pyra exĩko ase,
eremiãko ase oeahmaryme.
Ritonõpo, omoro mase Jesemy;
jũme “Kure mase,” kakehpyra exĩko ase.