ལེའུ་བཞི༌པ།
དཀོན་མཆོག་གི་མི་སྡེ་ངལ་གསོའི་ནང་དུ་འཇུག་པའི༌སྐོར།
1 དེའི་ཕྱིར། ཁོང་གི་ངལ་གསོའི་ནང་དུ་ཞུགས་པའི་ཞལ་བཞེས་དེ་ད་དུང་བཞག་ཡོད་པས་ན། ཁྱོད་རྣམས་ལས་སུ་ཞིག་ཀྱང་རྗེས་སུ་ལུས་པར་སྙམ་པ་ཙམ་ལ་དོགས་ཟོན་བྱེད་དགོས་སོ།།
2 ཅིའི་ཕྱིར་ཞེ་ན། ཁོ་རྣམས་དང་འདྲ་བར་བདག་ཅག་ལའང་འཕྲིན་བཟང་དེ་བསྒྲགས་མྱོང་བའི་ཕྱིར༌ཡིན། འོན་ཀྱང་ཁོ་རྣམས་ལ་བཀའ་ཐོས་པ་དང་མཐུན་པའི་དད་པ་མེད༌པས། བཀའ་ཐོས་པ་དེ་ནི་ཁོ་རྣམས་ལ་ཕན་ཐོགས་མེད།
3 བདག་ཅག་དད་པ་བྱས་ཟིན་པ་དག་ནི་ངལ་གསོའི་ནང་དུ་ཞུགས་པ་ཡིན༌ཏེ། དཀོན་མཆོག་གིས་འདི་སྐད༌དུ།
བདག་ནི་ཁོང་ཁྲོ་ལངས་ཏེ་དམ་བཅས་པ།།
ཁོ་རྣམས་བདག་གི་ངལ་གསོ་དེའི་ནང༌དུ།།
གཏན་ནས་ཞུགས་པར་མི་བྱ་ཞེས་པ་འོ།།
ཞེས་གསུངས་པ་བཞིན༌ནོ།། དོན་དམ་དུ་ཁོང་གི་འཕྲིན་ལས་ནི་འཇིག་རྟེན་ཁམས་བཀོད་པའི་ཚུན་ལ་ཡོངས་སུ་གྲུབ༌པའོ།།
4 ཉིན་བདུན་པའི་སྐོར་ལ་གསུང་རབ་ཀྱི་མདོ་ཞིག་ལས་ཇི་སྐད༌དུ། ཉིན་བདུན་པར་དཀོན་མཆོག་གིས་འཕྲིན་ལས་ཐམས་ཅད་ནས་ངལ་གསོ་མཛད་ཅེས་གསུངས་སོ།།
5 ཡང་མདོ་དེ་ལས་ཇི་སྐད༌དུ།
ཁོ་རྣམས་བདག་གི་ངལ་གསོ་དེའི་ནང༌དུ།།
གཏན་ནས་ཞུགས་པར་མི་བྱ་ཞེས་པ་འོ།།
ཞེས་གསུངས༌པའོ།།
6 ངལ་གསོའི་ནང་དུ་ཞུགས་ངེས་པའི་མི་འགའ་ཞིག་ཡོད༌ལ། སྔོན་ཆད་འཕྲིན་བཟང་ཐོས་མྱོང་བ་རྣམས་ཀྱིས་བཀའ་མ་བསྲུངས༌པས། དེའི་ནང་དུ་ཞུགས་མ་ནུས་སོ།།
7 དེའི༌ཕྱིར། ལོ་མང་པོ་འདས་པའི་རྗེས༌སུ། དཱ་བིད་ཀྱི་མདོ་ལས་ཡང་ཉིན་གཅིག་གཏན་ཁེལ་བྱས་པ༌སྟེ། དེ་ནི་གོང་ནས་ཇི་སྐད༌དུ།
དེ་རིང་ཁྱོད་ཚོས་ཁོང་གི་བཀའ་ཐོས༌ན།།
རང་གི་སེམས་ནི་གྱོང་པོར་བྱ་མི༌རུང༌།།
ཞེས་གསུངས་པ་བཞིན༌ནོ།།
8 དེ་ཡང་སྔོན་ཆད་ཡོ་ཤུ་ཨ་ཡིས་ཁོ་རྣམས་ངལ་གསོའི་ནང་དུ་ཞུགས་པར་བྱས༌ན། ཕྱིས་སུ་དཀོན་མཆོག་གིས་ངལ་གསོ་བའི་ཉིན་གཞན་ཞིག་གསུང་བར་མ་མཛད་དོ།།
9 དེས་ན་དཀོན་མཆོག་གིས་རང་གི་མི་སྡེའི་ཆེད༌དུ། ངལ་གསོ་ཞིག་བསྐྱུར་ཡོད་པ་ཤེས་ནུས་ལ།
10 ཁོང་གི་ངལ་གསོའི་ནང་དུ་ཞུགས་མཁན་ཡིན༌ན། དཀོན་མཆོག་གིས་རང་གི་འཕྲིན་ལས་ཐམས་ཅད་ནས་ངལ་གསོ་མཛད་པ་བཞིན། རང་གི་དོན་རྣམས་སྒྲུབ་མཚམས་བཞག་སྟེ་ངལ་གསོ་བྱས་པ་ཡིན༌ནོ།།
11 དེའི༌ཕྱིར། མི་སུས་ཀྱང་དཀོན་མཆོག་གི་བཀའ་མི་སྲུང་བ་དེ་རྣམས་མིག་དཔེར་བཟུང་ནས་ས་རུ་མི་འགྱེལ་བའི༌ཕྱིར། བདག་ཅག་གིས་ངེས་པར་ངལ་གསོ་དེའི་ནང་དུ་ཞུགས་པར་བརྩོན་དགོས༌སོ།།
12 དཀོན་མཆོག་གི་བཀའ་ནི་སྐྱེ་སྟོབས་དང་ནུས་མཐུ་ལྡན་ཞིང་རལ་གྲི་ཁ་གཉིས་མ་ལས་ཀྱང་རྣོ་བ༌དང༌། ཐ་ན་ཡིད་དང༌སེམས། རུས་ཚིགས་དང་རུས་རྐང་བཅས་ཀྱང་དབུག་ཅིང་གཤག་ནུས༌ལ། ཡིད་ཀྱི་བསམ་ཚུལ་དང་འདོད་ཚུལ་ལའང་བརྡར་ཤ་གཅོད་ནུས་སོ།།
13 བཀོད་པ་ཐམས་ཅད་ལས་ཁོང་གི་དྲུང་དུ་མི་སྣང་བ་གཅིག་ཀྱང་མེད། མ་གཞི་དངོས་པོ་ཐམས་ཅད་བདག་ཅག་དང་འབྲེལ་བ་ཡོད་པའི་དཀོན་མཆོག་གི་སྤྱན་སྔར་དམར་རྗེན་དུ་མངོན་པ་ཡིན༌ནོ།།
བརྗིད་ཉམས་ཆེ་བའི་མཆོད་དཔོན་ཆེན་པོ་སྐྱབས་མགོན་ཡེ༌ཤུ།
14 དེ་བས་ན། བདག་ཅག་ལ་ནམ་མཁའི་ཞིང་ཁམས་སུ་འཕགས་ཤིང་བརྗིད་ཉམས་ཆེ་བའི་མཆོད་དཔོན་ཆེན་པོ་ཞིག་ཡོད༌དེ། ཁོང་ནི་དཀོན་མཆོག་གི་སྲས་སྐྱབས་མགོན་ཡེ་ཤུ་ཡིན༌པས། བདག་ཅག་གིས་ཁས་ལེན་བྱས་པའི་དད་པ་དེ་བརྟན་པོར་བསྲུང་དགོས་སོ།།
15 ཅིའི་ཕྱིར་ཞེ་ན། བདག་ཅག་གི་མཆོད་དཔོན་ཆེན་པོས་རང་རེའི་སྟོབས་ཤུགས་ཞན་པར་ཐུགས་རྗེ་དགོངས་མི་ནུས་པ་མིན༌ཏེ། ཁོང་ལའང་དོན་ཐམས་ཅད་ཀྱི་ཆ་ནས་བདག་ཅག་དང་འདྲ་བར་ཉམས་ཚོད་ཐེབས་མྱོང་མོད། འོན་ཀྱང་ཁོང་གིས་སྡིག་པ་ཅི་ཡང་མ་བསགས་སོ།།
16 དེའི༌ཕྱིར། རོགས་སྐྱོར་དགོས་པའི་དུས་སུ་སྐྱབས་དང་ཐུགས་རྗེ་འཐོབ་པའི༌ཕྱིར། བདག་ཅག་བག་ཕེབས་ཞུམ་མེད་ཀྱིས་ཐུགས་རྗེའི་བཞུགས་ཁྲི་མདུན་དུ་ཡོང་བར༌བྱའོ།།