25
Hɩɩsɩ mɑ təwɑkəllɛ nɑ ń hʋlʋ-m nyɑ́ luɣu nyəntʋ
1 Tɑfiiti yontu.
Tɑcɑɑ nyɑ́ tɔɔ kɛ́ mɑ kɛɛsəɣənɑ.
2 Mɑ Ɩsɔ nyɑɣɑ mɑ pɛtɑ mɑ tɩ.
Tɑɑ yele-m nɑ fɛɛlɛ tɔɣɔ-m.
Yɑɑ mɑ kolontunɑɑ pɑɑnɑ-m.
3 Mpɑ pɑ tʋɣʋ-ŋ nɑɑni tɔ
pɑ kɑɑ wɛɛ mɑɑ nyə́mɑ tɑɑ.
Amɑ nyɑ́ wɑɑlɩ lɩɩlɑɑ kɑ́ nyɑsənɑ pɑ mpee kɛ kelɑ.
4 Hʋlʋ-m nyɑ́ mpɑɑʋ nɑ mɑ́ nyɩ-kʋ,
nɑ ń sɛɣɛsɩ-m mpi n cɑɑ mɑ lɑ tɔ.
5 Tiiki-m nyɑ́ tɑmpɑnɑ tɑɑ,
nɑ ń sɛɣɛsɩ-m-yɛ.
Mpi tɔ, Ɩsɔ nyɑ́, nyɑ́ yɑkənɑ-m.
Nyɑɣɑ mɑ tɛɛləɣɩ tɑm.
6 Tɑcɑɑ, tɔɔsɩ sɩ hɑtoo tɔ n kɛ́ kʋpɑŋ kɛ́,
nɑ ń sɔɔləɣɩ yəlɑɑ.
7 Tɑɑ tɔɔsɩ mɑ ɩfepile kʋpəntəŋ nɑ mɑ ɩsɑɣɑtʋ tɔm.
Amɑ nyənɩ mɑ pətɔɔtəlɛ nɑ ń tɔɔsɩ mɑ tɔɔ
kɛ́ nyɑ́ kʋpɑntʋ tɔɔ.
8 Tɑcɑɑ n kɛ́ kʋpɑŋ kɛ́ nɑ ń siɣisɑɑ.
Pə tɔɔ kɛ́ n hʋləɣɩ pəntəlɑɑ kɛ mpɑɑʋ.
9 N teesiɣi mpɑ pɑ ɩsɛ pɑ tɔkɩ tɔ pɑ tɔm kɛ́.
Nɑ ń hʋləɣɩ-wɛɣɛ nyɑ́ luɣu nyəntʋ.
10 Mpɑ pɑ tɔkəɣɩ Tɑcɑɑ nyɑ́ nɔɔsɩ pɛɛlʋɣʋ nɑ nyɑ́ kʋsəsɩɩtʋ tɔ
pɑ nɑɑkɩ nyɑ́ mpɑɑŋ tənɑ tɑɑ kɛ́ sɔɔlʋɣʋ nɑ kʋpɑntʋ kɛ́.
11 Hɑɩ, Tɑcɑɑ hɩɩsɩ mɑ ɩsɑɣɑtʋ
sɔsɔɔntʋ kɛ nyɑ́ hətɛ tɔɔ.
12 Ye yʋlʋ nyɑŋnɑ Tɑcɑɑ,
Tɑcɑɑ hʋləɣɩ-ɩ mpɑɑʋ ŋku ɩ kɑ́ təŋ tɔɣɔ.
13 Pə yʋlʋ wɛɛkɩ leleŋ tɑɑ kɛ́.
Ɩlɛnɑ ɩ piyɑ nɑ́ɑ́ tɔɣɔ tɛtʋ.
14 Tɑcɑɑ heeliɣi pʋntʋ kɛ ɩ lotu kɛ́,
nɑ ɩ́ hʋləɣɩ-ɩ nɔɣɔ pɛɛlʋɣʋ təmɑ.
15 Tɑcɑɑ kɛ mɑ tekiɣi tɑm.
Mpi tɔ, ɩnɩ ɩ kɑ ləsənɑ-m
kɑtɔkɑ ŋkɑ kɑ kpɑ-m tɔ kɑ tɑɑ.
16 Hɑɩ, hʋlʋ-m nyɑ́ pɛɛlɛɛ nɑ ń kɛɛsənɑ mɑ tɔɔ.
Mpi tɔ, mɑ kɛ́ kɑtɑyəlɑɣɑ kɛ́, nɑ kʋnyɔntɔɣɔlʋ.
17 Nəɣəsɛɛ sɔɔsəɣɩ mɑ lotu tɑɑ kɛ́.
Ləsɩ-m mɑ lɑŋwɑkəllɛ tɑɑ.
18 Nyənɩ mɑ kʋnyɔŋ nɑ mɑ wɑhɑlɑ
nɑ ń hɩɩsɩ mɑ kʋpəntəŋ tənɑ.
19 Nyənɩ mɑ kolontunɑɑ pɑɣɑlɛ,
nɑ ɩsənɑ pɑ tɑɑ hɑŋəɣənɑ-m sɔsɔm tɔ.
20 Kenti mɑ weesuɣu tɔɔ nɑ ń yɑ-m,
nɑ mɑ́ tɑɑ lɑ mɑɑ nyəmɑ,
kɛ ɩsənɑ mɑ pɛtɑ-ŋ mɑ tɩ tɔ pə tɔɔ.
21 Nyɑɣɑ mɑ tɛɛləɣɩ sɩ ń yele nɑ mɑ́ təŋ siɣisuɣu
nɑ mɑ́ tɑɑ wɑkələnɑ nɔɣɔlʋ.
22 Hɑɩ, Ɩsɔ, yɑ Ɩsɛɣɛlɩ nyə́mɑ
kɛ pɑ lɑŋwɑkəllɛ tənɑ tɑɑ.