9
ጋባኦና አሳቱ ኢያሳ ጭሜድኖ
1 ዮርዳኖሳ ሻፋፐ አዋይ ዉልያ ባጋና ደእያ ካተቱ ኡባይ፥ ገዝያን ደእያዋንቱ፥ ጋꬋን ደእያዋንቱ፥ ሜድትራነ አባ ባዙዋ ኦይቂ ቢደ ሊባኖሳ ጋካናዉ ደእያዋንቱ፥ ሂተቱዋ፥ አሞራዋናቱዋ፥ ካናነቱዋ፥ ፓርዛዋናቱዋ፥ ሂዌቱዋነ ያቡሳዋናቱዋ ካተቱ ኡባይ እስራኤልያ አሳይ ጾኔዳዋ ስሴድኖ።
2 ኢያሳነ እስራኤልያ አሳ ኦላናዉ ባናዉ እትፐ ሺቄድኖ።
3 ጋባኦና ካታማን ደእያ ሂዌቱ ኢያሱ ያርኮ ካታማንነ አይ ካታማን ኦꬄዳዋ ስሴዳ ዎደ፥
4 ጭማናዉ ኮዬድኖ። ኡንቱንቱ ሽንቃ ቃቺደ ጩርቃ ዶንያቱዋ ዳሳ ዎꬅ ስኬዳ ኤሳ ኦጎሮቱዋ ሀርያን ጫኒደ፥ ኢያሱኮ ኪተቴድኖ።
5 ኪተቴዳ አሳቱ ዉሬዳ ኤጫ ማዩዋ ማዪደ፥ ዎꬅ ስኬዳ ጫማ ባረንቱ ገድያን ዎꬄድኖ፤ ኡንቱንቱ ሽንቃዉ ጊደ ኦይቄዳ ቁማይ ኡባይ መሌዳዋነ ፑሉሜዳዋ።
6 ሄዋፐ ጉይያን ኡንቱንቱ ኢያሱ ዱንካኔዳ ሳኣ ገልጋላ ቢደ፥ አውነ እስራኤልያ አሳዉ፥ “ኑን ሃኮ ጋድያፐ ዬዶ። ሀይ ኑናና ሳሮ ደአና ማላ ቃላ ጫቁዋ ጫቃ” ያጌድኖ።
7 እስራኤልያ አሳይ ሂዌቱዋ፥ “ህንተንቱ ኑ ጋድያን ደእያ አሰንቶነ፥ አያን ኤሪደ ህንተናና ጫቀታኔ?” ያጌዳ።
8 ሄዋፐ ጉየ ኡንቱንቱ ኢያሳ፥ “ኑን ነ ቆማቱዋ” ያጌድኖ።
ኢያሱ፥ “ህንተንቱ ኦኔ? ሀቃፐ ዬድቴ?” ያጊደ ኦቼዳ።
9 ሽን ኡንቱንቱ፥ “ኑን ነ ቆማቱ መꬍና ጎዳ ነ ጾሳ ዋርያ ስሲደ፥ ዳሮ ሃኮ ጋድያፐ ዬዶ። እ ግብጼ ጋድያን ኦꬄዳዋ ኡባ ኑን ስሴዶ።
10 ቃይ ዮርዳኖሳ ሻፋፐ ሄፍንꬃ አዋይ ዶልያ ባጋና ደእያ አሞራዋናቱዋ ካተቱዋ ላኡዋ፥ ሀሰቦና ካትያ ስሆናነ አስታሮታ ካታማን ደእያ ባሳነ ካትያ ኦጋ እ ኦꬄዳዋካ ስሴዶ።
11 ኑ ጋደ ጭማቱነ ኑ ቢታን ደእያ አሳይ ኡባይ ኑና፥ ‘ህንተ ባና ኦግያዉ ሽንቃ ኦይቂደ፥ ቢደ ኡንቱንቱና ጋከቲደ ኡንቱንታ፥ “ኑን ህንተንቱ ቆማቱዋ፤ ህንተንቱ ኑናና ሳሮ ደአና ማላ ጫቁዋ ጫቄርክተ” ያግተ’ ያጌድኖ።
12 “ኑን ህንተንቱኮ ያናዉ ኑ ሶፐ ሽንቃ አክያ ጋላስ፥ ሀ ኡክꬃይ ሆኡዋ፤ ሽን ሀእ መሌዳዋነ ፑሉሜዳዋ በእተ!
13 ሀዋንቱ ኤሳ ኦጎሮቱ ኑን ኩንꬅያ ዎደ ኦራꬃ፤ ሽን ሀእ ዳከቴዳዋ በእተ! ኦጊ ሃኮ ግዴዳዋ ጋሱዋን፥ ኑ ማዩነ ኑ ጫማይ ዉሬዳ” ያጌድኖ።
14 መꬍና ጎዳ ኦቼናን፥ እስራኤልያ አሳይ ኡንቱንቱ ሽንቃፐ አማሬዳዋ አኬዳ።
15 ያትና፥ ኢያሱ ኡንቱንቱ ፓጻ አቲደ ባረናና ሳሮ ደአና ማላ ጫቁዋ ኡንቱንቱና ጫቀቴዳ፤ ማባራ ካለꬅያዋንቱካ ሄ ጫቁዋ ቃላ አናዳን ጫቄድኖ።
16 ኡንቱንቱና ጫቁዋ ጫቀቴዳ ሄዘንꬆ ጋላሳፐ ጉይያን፥ ሀ አሳቱ ኡንቱንቱ ጋድያን ደእያ ሾሮ ግድያዋ እስራኤልያ አሳይ ስሴዳ።
17 እስራኤልያ አሳይ ሄዙ ጋላሳ ሀመቲደ፥ አሳቱ ደእያ ካታማቱዋ ጋኬድኖ። ኡንቱንቱ ካታማቱ ጋባኦና፥ ካፊራ፥ ባኤሮታነ ቅርያት-ይኣሪማ ጌተትኖ።
18 ሽን ማባራ ሱንꬃቱ ኡንቱንቶ መꬍና ጎዳ እስራኤልያ ጾሳ ሱንꬃን ጫቄዳ ድራዉ፥ ኡንቱንታ ዎꬍበይክኖ። ያትና፥ ኩመንꬃ ማባራይ ሱንꬃቱዋ ቦላን ዙዙሜዳ።
19 ሽን ካፓቱ ኡባይ ሀዋዳን ያጌድኖ፤ “ኑን ኡንቱንቶ መꬍና ጎዳ እስራኤልያ ጾሳ ሱንꬃን ጫቄዳ ድራዉ፥ ሀእ ስም ኡንቱንታ ቦቻናዉ ዳንዳዮኮ።
20 ሽን ኑን ኡንቱንታ ሀዋዳን ኦꬃና፤ ኑን ኡንቱንቶ ጫቄዳ ጫቁዋ ካድና ጾሳ ሀንቁ ኑ ቦላን ዎናዳን፥ ኡንቱንቱ ፓጻ ደእኖ።
21 ሽን ደኢደ ማባራዉ ኡባዉ ምꬃ ቃንጽያዋንታነ ሃꬃ ትክያዋንታ ግድኖ” ያጌድኖ። ሄዋ ድራዉ ጋባኦናቱዋ ሱንꬃቱ ጌዳዋዳን ሀኔድኖ።
22 ኢያሱ ጋባኦና አሳቱዋ ጼጊደ፥ “ኑ ጋድያን ደኢደ፥ ‘ኑን ዳሮ ሃኮ ጋድያፐ ዬዶ’ ጊደ፥ አያዉ ኑና ጭሜድቴ?
23 ህንተንቱ ሄዋ ሀኔዳ ድራዉ ሸቀቴድታ፤ ህንተንቱ መꬍናዉ ታ ጾሳ ጎለን ምꬃ ቃንጽያነ ሃꬃ ትክያ አይልያ ግዳና” ያጌዳ።
24 ኡንቱንቱ ኢያሱዉ ዛሪደ ሀዋዳን ያጌድኖ፤ “ኑን ነ ቆማቱ መꬍና ጎዳይ ሀ ጋድያ ኡባ ህንተንቶ እማናዳንነ አን ደእያ አሳ ኡባ ህንተንቱ ስንꬃፐ ꬋይሳናዳን ባረ ቆማ ሙሳ አዛዜዳዋ ጌሺደ ስሴዶ። ሄዋ ድራዉ ህንተፐ ኑ ሸምፖ ዳሮ ያዪደ ሀዋ ኦꬄዶ።
25 ሀእ ስም ኑን ነ ኩሽያን ደኤቶ። ኑና ነዉ ሎአነ ሱረ ማላት ቤቴዳዋዳን ኦꬃ” ያጊደ ዛሬድኖ።
26 ያትና፥ ኢያሱ ኡንቱንታ እስራኤልያ አሳይ ዎናዳን አሼዳ።
27 ሄ ጋላስ ኢያሱ ጋባኦና አሳቱዋ እስራኤልያ ማባራዉነ መꬍና ጎዳዉ ያርሽያ ሳአዉ ምꬃ ቃንጻናዳንነ ሃꬃ ትካናዳን ኦꬅና ኡንቱንቱ ሀቼ ጋካናዉ ጾሳይ አሳይ ባረዉ ጎይናናዳን ዶሬዳዌ ሳኣን ሀቃንነ ሄዋዳን ኦꬂደ ደኢኖ።