6
1 مِنٛنْ، مِنْ کُودٛوٻٜ اٜ اَللَّه؞ نغَمْ مَاجُمْ اٜ مِنْ تٛرٛوعٛنْ تٛع اٛنْ اَلُ شَاحُ اَللَّه طُمْ کٜٻُطٛنْ وَرْتَ مٜىٰرٜ؞
2 نغَمْ اَللَّه وِعِي،
«ندٜ شَرٜلْ کَانُنغٜلْ وَطِ،
مِ نَنِي دٛعَارٜ مَاطَ،
ندٜ ݧَلْندٜ کِسْندَمْ وَرِ،
مِ وَلِّيمَ؞»
رَا، جٛونِ وٛنِ شَرٜلْ کَانُنغٜلْ، جٛونِ وٛنِ ݧَلْندٜ کِسْندَمْ!
3 مِنْ نغِطَا مِنْ نغَطَ کٛ وَطَتَ غٛطّٛ فٜغّٛو دٛوْ لَاوٛلْ غٛونغَ، نغَمْ تٛع طُمْ حٜٻَ کٛ طُمْ حُطَتَ ندٜرْ کُوغَلْ اَمِنْ؞
4 اَمَّا ندٜرْ کٛو طُمٜ کٛ مِنْ نغَطَتَ، اٜ مِنْ کٛلَّ مِنْ مَشُّٻٜ اَللَّه ٻٜ غٛونغَ ندٜرْ مُݧَلْ مَنْغَلْ نغَلْ مِنْ نغَطَتَ ندٜرْ تٛرَّ، اٜ شَطٜىٰلٜ، اٜ ٻِطَّارٜ؞
5 مِنْ ڤِيَامَ، مِنْ شُرَامَ، طُمْ اُمِّنِي حَوْرٜ دٛوْ اَمِنْ، مِنْ کُوِي نَاکِ ٻَلِّ اَمِنْ مبَاتِ، مِنْ مبَالِي بَلْطٜ مِنْ طَانَاکِ، بَنْݧٜ مِنْ کٜٻَتَا کٛ مِنْ ݧَامَتَ؞
6 مِنْ کٛلِّي مِنْ مَشُّٻٜ اَللَّه ٻٜ غٛونغَ ندٜرْ لَٻْکِ ٻٜرْطٜ کِ مِنْ نغٛودِ، اٜ اَنْدَلْ، اٜ مُݧَلْ، اٜ نٛ مِنْ مبَلِّرْتَ يِمْٻٜ، اٜ رُوحُ اَللَّه طُمْ مِنْ نغٛودِ، اٜ يِدّٜ ندٜ غٛونغَ،
7 اٜ مٜتُکِ غٛونغَ، اٜ بَوْطٜ اَللَّه؞ اَادِلَاکُ وٛنِ کٛ مِنْ کٛنِرْتَ طُمْ مِنْ نجٛغِي جُنْغٛ ݧَامٛ اٜ نَنٛ؞
8 اٜ مِنْ کٛکّٜىٰ مَنْغُ، اٜ مِنْ شٜمْتِنٜىٰ، اٜ مِنْ کُطٜىٰ، اٜ مِنْ مَنٜىٰ؞ مِنْ کٛشَّامَ بٛ مَجِّنٛوٻٜ يِمْٻٜ، اَمَّا مِنْ غٛونغَعٜنْ؞
9 مِنْ کٛشَّامَ بٛ طُمْ اَنْدَامِنْ، اَمَّا اٜ طُمْ اَندِمِنْ بٛطُّمْ؞ مِنْ کٛشَّامَ بٛ مَيْٻٜ، اَمَّا اٜ مِنْ ڤٛوفَ؞ اٜ مِنْ ڤِيٜىٰ، اَمَّا مِنْ مَايَايِ؞
10 اٜ طُمْ وَطَ مِنْ نَنَ شِيَ بٜلْطُمْ ٻٜرْندٜ، اَمَّا کٛو ندٜيٜ اٜ مِنْ مبٜلْمبٜلْتَ؞ مِنْ نغَلَنَا، اَمَّا مِنْ نغَرْتِرِي طُطْٻٜ رِسْکُٻٜ؞ مِنْ کٛشَّامَ بٛ کٛو کٛ مِنْ نغٛودِ، اَمَّا اٜ مِنْ نغٛودِ کٛو طُمٜ؞
11 اٛنٛنْ کٛرِنْتِيَنْکٛعٜنْ، مِنْ مٜتَنِيعٛنْ اٜ نجَيْرِ؞ مِنْ مَٻِّتَنِيعٛنْ ٻٜرْطٜ اَمِنْ؞
12 نَاع مِنٛنْ نغَݧِ حٛلُّکِعٛنْ يِدّٜ، اَمَّا اٛنٛنْ نغَݧِ حٛلُّکِمِنْ يِدّٜ؞
13 مِ مٜتَنِيعٛنْ نٛ مٜتِرَنَيْمِ ٻِٻّٜ اَمْ؞ اٜ مِ تٛرٛوعٛنْ، ندٜ اٜ مِنْ نغِطِعٛنْ، اٛنٛنْ مَا مَٻِّتَنٜىٰمِنْ ٻٜرْطٜ مٛوطٛنْ؞
تٛع اٛنْ کَوْتُ کٛعٜ اٜ يِمْٻٜ ٻٜ کٛولَاکِ يٜىٰسُ
14 تٛع اٛنْ کَوْتُ کٛعٜ اٜ يِمْٻٜ ٻٜ کٛولَاکِ يٜىٰسُ؞ کٛ حَوْتِ اَادِلَاکُ اٜ حَلّٜىٰندٜ؟ کٛو بٛو، نغٛيٜ سُمْڤٛ وٛنِ حَکُّندٜ جَيْنغٛلْ اٜ ݧِوْرٜ؟
15 کِيٜ سِرْيٛوتِرْکِ وٛنِ حَکُّندٜ اَلْمَسِيحُ اٜ شٜيْطَنْ؟ کٛو بٛو، کٛ حَوْتِ تٛکُّطٛ يٜىٰسُ اٜ مٛ تٛکَّايِ يٜىٰسُ؟
16 ندٜنْ کٛ حَوْتِ وُرٛ شٜنِينغٛ نغٛ اَللَّه اٜ غُنْکِيجِ؟ ٻَلِّ مٜىٰطٜنْ نغٛنِ وُرٛ شٜنِينغٛ نغٛ اَللَّه مٛ يٛنْکِ؞ نغَمْ اٛ وِعِ،
«مِ جٛوطٛتٛ ندٜرْ مَٻّٜ،
مِ يَادَ اٜ مَٻّٜ؞
مِ وَرْتَيْ اَللَّه مَٻّٜ،
ٻٜ نغَرْتَيْ يِمْٻٜ اَمْ؞»
17 طٛنْمَا اٛ وِعِ، «نغَمْ نٛنْ، مبُرْتٛيٜىٰ دَغَ ندٜرْ مَٻّٜ،
کَکِّتٜىٰ دَغَ ندٜرْ مَٻّٜ؞
تٛع اٛنْ مٜىٰمُ کٛ لَاٻَا،
ندٜنْ مِ جَٻَيْعٛنْ؞
18 مِ وَرْتَيْ ݧَاکٛ مٛوطٛنْ،
اٛنٛنْ بٛو اٛنْ نغَرْتَيْ ٻِٻّٜ اَمْ وٛرْٻٜ اٜ رٜوْٻٜ؞
نٛنْ جٛومِرَاوٛ جٛومُ بَوْطٜ وِعِ؞»